ءماجىلىس بۋللينگ پەن كيبەربۋللينگ ۇعىمدارىن زاڭداستىراتىن تۇزەتۋلەردى ءبىرىنشى وقىلىمدا ماقۇلدادى, دەپ جازادى Egemen.kz.
وتىرىس بارىسىندا دەپۋتاتتار مەن مەملەكەتتىك ورگان وكىلدەرى بالالاردىڭ قۇقىعىن قورعاۋعا قاتىستى پىكىر الماسىپ, زاڭ جوباسىن جان-جاقتى تالقىلادى.
ءماجىلىس توراعاسى نۇرلان نىعماتۋلين دەپۋتاتتاردىڭ باستاماسىمەن ازىرلەنگەن زاڭ جوباسىندا بالالاردىڭ تۇرعىن ءۇي جانە وتباسىلىق جاعدايدا مۇددەلەرىن قورعاۋعا, قاداعالاۋسىز جانە پاناسىز قالۋدىڭ الدىن الۋ ماسەلەلەرى قاراستىرىلعانىن اتاپ ءوتتى.
نۇرلان نىعماتۋليننىڭ ايتۋىنشا, سونىڭ ىشىندە, بۋللينگ پەن كيبەربۋللينگ قوعامدا قاتتى الاڭداتۋشىلىق تۋدىرىپ وتىر. بالالاردى وسى قاۋىپتەن قورعايتىن ناقتى نورمالار قاجەت.
ستاتيستيكاعا جۇگىنسەك, وتكەن جىلى كامەلەتكە تولماعاندار اراسىندا 143 سۋيتسيد جانە 306 ءوز-وزىنە قول جۇمساۋعا ارەكەت ەتۋ جاعدايى تىركەلگەن. تەك جارتى جىلدىڭ ىشىندە 105 سۋيتسيد پەن 193 وزىنە قول جۇمساۋ ارەكەتى بولعان.
«شىنىمەن بۋللينگ جانە كيبەربۋللينگ وتە قاۋىپتى. ول بالالاردىڭ پسيحولوگياسىن بۇزاتىن, سۋيتسيدكە الىپ باراتىن جول. سوندىقتان, جاڭا ايتىپ كەتكەندەي, بالالاردى, اسىرەسە, مەكتەپ وقۋشىلارىن بۋللينگ جانە كيبەربۋللينگتەن تولىقتاي قورعايتىن ناقتى نورمالار ەنگىزۋىمىز كەرەك. وسىعان بايلانىستى, ەكىنشى وقىلىمعا دەيىن ءتيىستى جۇمىس جۇرگىزۋ قاجەت», دەدى پالاتا سپيكەرى.
نۇرلان نىعماتۋليننىڭ ايتۋىنشا, بۇل زاڭ جوباسى قازىرگى قوعامعا قاجەت كوپتەگەن ماسەلەنى, اسىرەسە, بالالاردىڭ قۇقىعىن قورعاۋ جولىنداعى پروبلەمالاردى شەشۋگە ءتيىس.
پالاتا سپيكەرى اتاپ وتكەندەي, قازىر بالالاردى قورعاۋ ءۇشىن وتباسىلىق قاتىناستار, ءبىلىم بەرۋ, دەنساۋلىق ساقتاۋ سالالارىندا قوسىمشا شارالار قاراستىرىلدى.
زاڭ جوباسىندا جازىلعان نورمالار, سونىڭ ىشىندە ينتەرنەتتە ازاماتتاردى, اسىرەسە, بالالاردى وسىنداي بۋللينگ جانە كيبەربۋللينگ سياقتى قۇبىلىستاردان قورعاۋ كەرەك. بۇل نورمالار زامان تالابى ەكەنىن ايتقان نۇرلان نىعماتۋلين وسى زاڭ جوباسى مەملەكەت باسشىسى قاسىم-جومارت كەمەل ۇلى توقاەۆتىڭ ازاماتتاردى ينتەرنەت ارقىلى قىسىم كورسەتۋدەن زاڭ دەڭگەيىندە قورعاۋ جونىندەگى تاپسىرماسىن ورىنداۋعا باعىتتالعانىن ايتتى.
سونىمەن قاتار, ءماجىلىس توراعاسىنىڭ پىكىرىنشە, ءبىر عانا زاڭ جوباسىمەن بالالاردىڭ قۇقىعىن قورعاۋ سالاسىنداعى پروبلەمالاردى شەشۋ مۇمكىن ەمەس.
«بۇل جەردە, ارينە, جۇيەلى شارالار, كەشەندى تاسىلدەر قاجەت. ول ءۇشىن بارلىق مۇددەلى مەملەكەتتىك ورگاننىڭ, پەداگوگتار مەن اتا-انالار قاۋىمىنىڭ بىرلەسىپ جۇمىس ىستەۋى قاجەت. ال دەپۋتاتتىق كورپۋس ءوز تاراپىنان بالالاردىڭ قۇقىعىن قورعاۋ تەتىگىن جەتىلدىرۋ بويىنشا زاڭنامالىق جاعىنان قولداۋ كورسەتۋگە دايىن», دەدى نۇرلان نىعماتۋلين.