بەرەكەگە بوگىپ تۇراتىن قوڭىر كۇزدە دالا ءتوسى ەڭبەك دۇبىرىنە بولەنگەن. الىستاعى استراحان اۋدانىنىڭ ديقاندارى قاۋىرت قيمىل ۇستىندە. بيىلعىداي قۋاڭشىلىق جىلى داتكە قۋاتى – ورىلعان استىق ساپاسىنىڭ جىلداعىعا قاراعاندا جوعارىلىعى.
ەرتە كوكتەمدە اۋدان ديقاندارى 400 مىڭ گەكتاردان استام القاپقا ءداندى داقىلدار تۇقىمىن سىڭىرگەن بولاتىن. كوكتەن ءيۋى كەم بولسا دا جەردەن بەرگەنىنە ازىرگە كوڭىل تويارلىق. جازدىڭ ىستىق بولۋىنا بايلانىستى جىلداعىعا قاراعاندا, استىق تا ەرتە ءپىستى. بيىل 15 مىڭ گەكتار جەرگە ءدان ەككەن اk Hilal سەرىكتەستىگىنىڭ ەگىستىك القابىندا سەكسەننەن استام دالا ەرلەرى ۋاقىتپەن ساناسپاي جۇمىس ىستەۋدە. بۇگىنگە دەيىن ماتەريالدىق-تەحنيكالىق بازاسىن نىعايتىپ, تەحنيكالارىن جاڭالاپ ۇلگەرگەن ۇجىمنىڭ ەڭبەك قارقىنى دا جوعارى.
سەرىكتەستىك بيىل بيداي مەن ارپا ەگىپتى. ازىرگە بارلىق القاپتىڭ ۇشتەن ءبىرىن تاپ-تۇيناقتاي ەتىپ جيناپ العان. ديقانداردىڭ ايتۋىنا قاراعاندا, استىقتىڭ شىعىمدىلىعى ماقتانارلىق بولماعانىمەن, ەسەسىنە ساپاسى ءتاۋىر. دەنى ەكىنشى كلاستى. دەمەك, باعاسى دا جوعارى بولماق. قامىرلىلىعى دا جىلداعىعا قاراعاندا جاقسى.
– ديقان قاۋىم ءار جىل سايىن كوكتەمدە ءۇمىت ەتەدى ەمەس پە؟ – دەيدى سەرىكتەستىك قۇرىلتايشىسى ماگومەت ەكاجەۆ. – اگروتەحنيكالىق شارالاردى تالاپقا ساي ۋاقتىلى اتقاردىق. تىڭايتقىشتاردى دا سىڭىردىك. الايدا جازدىڭ اپتاپ ىستىق بولعاندىعى بەلگىلى. ەندىگى ءۇمىت استىق ساپاسىنىڭ جاقسىلىعىندا.
جيىرما جىلدان استام ەڭبەك ەتىپ كەلە جاتقان ۇجىم جەتەكشىسى بەرەكەنىڭ ەڭبەككە بايلاۋلى ەكەندىگىن جىر قىلىپ ايتادى. ەگەر جاڭا تەحنولوگيانى باتىل ەنگىزىپ, جۇمىس ىستەيتۇعىن بولسا, قۇنارى مول جەر دە ءيىپ سالا بەرمەك. تاعى ءبىر ەسكەرەتىن جايت, اۋا رايى قۇبىلمالى وڭىردە ەندىگى ارادا قۇرعاقشىلىققا شىدامدى بيداي تۇقىمىن قولدانعان ابزال. سوڭعى جىلدارى كۇن قاباعى دا وزگەرىپ كەلەدى. سوندىقتان بيىلعىداي قۋاڭشىلىققا دا دايىن بولۋ كەرەك.
دالا ەرلەرىنە بارلىق جاعداي جاسالعان. ەڭبەكاقىلارى دا تولىمدى. كوكتەمگى جانە كۇزگى ناۋقاندىق جۇمىس كەزىندە قاۋىرت قيمىلداپ, جاقسى ناتيجە كورسەتكەن ەڭبەككەرلەر تۇپ-تۋرا بىرجىلدىق تابىستارىن تابا الادى. ۋاقىتتان ۇتۋ ءۇشىن تۇسكى جانە كەشكى استارى القاپ باسىنا جەتكىزىلىپ بەرۋدە. ونىمدىلىگى جوعارى 12 كومباين مەن وننان استام جۇك كولىگى تاۋلىك بويى دەرلىك پايدالانىلۋدا.
ەل ىرىسىن مولايتۋعا ۇمتىلعان سەرىكتەستىك ديقاندارى كەيبىر القاپتاردان ءار گەكتارىنا 10 تسەنتنەردەن ءونىم جيناۋدا. بيىلعىداي قۋاڭشىلىق جىلى ءتاپ-ءتاۋىر كورسەتكىش. ەندىگىسى ونگەن ەل ىرىسىن جەردە قالدىرماي جيناپ الۋ.
اقمولا وبلىسى,
استراحان اۋدانى