Finiko قارجى پيراميداسىنىڭ نەگىزىن قالاۋشىلاردىڭ ءبىرى كيريلل دورونين رەسەيدە ۇستالدى. بۇل تۋرالى الماتى قالالىق ءىىد باستىعىنىڭ تەرگەۋ جۇمىستارى جونىندەگى ورىنباسارى رۋستام ءابدىراحمانوۆ حابارلادى, دەپ جازادى Egemen.kz.
«تەرگەۋ مالىمەتتەرى بويىنشا, 2018 جىلدىڭ ماۋسىمىنان 2020 جىلدىڭ جەلتوقسانىنا دەيىن Finiko قارجى پيراميداسى سالىمشىلاردان قاراجات تارتقان. ءوز كەزەگىندە ولار اقشانى قور بيرجالارىنا, كريپتوۆاليۋتالار نارىعىنا جانە ءار ءتۇرلى ساۋدا پلاتفورمالارىنا قۇيىپ, جوعارى پايىزدىق مولشەرلەمەمەن قايتارىپ بەرۋدى ۇسىنعان. كەيىن ۇيىمنىڭ ينۆەستيتسيالىق قىزمەتپەن اينالىسپاعانى, ينۆەستورلاردىڭ الدانعانى بەلگىلى بولدى», دەپ جازدى ول Instagram-دا.
الماتى پوليتسيا دەپارتامەنتى Finiko قارجى پيراميداسىنىڭ الدانىپ قالعان سالىمشىلارى +7 701 624 2824 تەلەفونىنا حابارلاسۋدى سۇرايدى.