قاراعاندى وبلىسىندا سوتتالعاندار ءۇشىن تاعى ءبىر جاڭالىق ەنگىزىلدى. ەندى جازاسىن وتەپ جاتقان ازاماتتار ارنايى ەلەكتروندى دۇكەن ارقىلى وزدەرىنە قاجەتتى تاۋارلاردى ساتىپ الا الادى, دەپ حابارلايدى Egemen.kz.
قاراعاندى وبلىسى بويىنشا قاجد اك-159/5 مەكەمەسىندە وبلىستاعى العاشقى ەلەكتروندى دۇكەن ءوز جۇمىسىن باستادى.
جاڭاشىلدىقتىڭ باستاماشىسى مەكەمە باسشىلىعى مەن وبلىستىڭ مامانداندىرىلعان پروكۋراتۋراسى بولدى.
سوتتالعانداردىڭ وزدەرى ۇسىنىلعان تاۋارلار اسسورتيمەنتىمەن تانىسىپ, العاشقى ساتىپ الۋلارىن جۇزەگە اسىرا باستادى. تاۋاردى ساتىپ الۋ ءۇشىن سوتتالعاندار تەرمينال ارقىلى لوگين مەن پارول ەنگىزەدى, جەكە كابينەتكە تۇسەدى, مەكەمەنى, ودان ءارى ساناتتى جانە قاجەتتى تاۋاردى تاڭدايدى. راستالعاننان كەيىن تاپسىرىس بازاعا تۇسەدى دە, ونى مەنەدجەر وڭدەيدى, تاۋارلار ءتىزىمى جينالىپ, مەكەمەدەگى تاپسىرىس بەرۋ ورنىنا جەتكىزىلەدى.
سونىمەن قاتار, سوتتالۋشىنىڭ تۋىستارى ەلەكتروندى دۇكەننىڭ ۆەب-سايتى ارقىلى تاپسىرىس بەرە الادى. بۇل رەتتە سوتتالعان ادامدى ۇستاۋ شارتتارى ەسكەرىلەدى.
ونىڭ قانشا سوماعا تاۋار الا الاتىنى وسىعان بايلانىستى بولادى. دۇكەننىڭ اسسورتيمەنتى قاتاڭ تۇردە سوتتالعاندارعا قر ءىىم «قاج مەكەمەلەرىنىڭ ىشكى ءتارتىپ ەرەجەلەرىن بەكىتۋ تۋرالى» بۇيرىعىنا سايكەس وزىمەن بىرگە الىپ جۇرۋگە رۇقسات ەتىلگەن زاتتار مەن تاۋارلاردىڭ تىزىمىنە سايكەستەندىرىلگەن.
«مەن سەمەي قالاسىنىڭ تۋماسىمىن. تۋىستارىم ماعان ءاردايىم كەلىپ, سالەمدەمەلەر بەرە المايدى. بىراق ەلەكتروندى دۇكەن ارقىلى ولار مەنىڭ شوتىمدى تولتىرا الادى, نەمەسە وزدەرى ماعان ونىمدەردى تاڭداي الادى, بۇل وتە ىڭعايلى قىزمەت», دەپ اتاپ ءوتتى اك-159/5 مەكەمەسىندە وتىرعان سوتتالعان ازامات.
كوبىنەسە سوتتالعاندار تەمەكى ونىمدەرىن, تاتتىلەر مەن ەتتەن جاسالعان جارتىلاي فابريكاتتارىن ساتىپ الادى.