وساكاروۆ اۋدانىندا جوعارى ساپالى اك وندىرەتىن زاۋىتتىڭ قۇرىلىسى باستالدى. بولاشاق كاسىپورىن ءوز ءونىمىن تەك ىشكى نارىققا عانا ەمەس, ەكسپورتقا دا جەتكىزەتىن بولادى, دەپ حابارلايدى Egemen.kz.
زاۋىتتى «Saryopan Operating» جشس سالادى. تەحنيكالىق سەرىكتەس Carmeuse Group بەلگيالىق ترانسۇلتتىق كومپانيا بولماق. جوبالىق قۋاتى – جىلىنا 300 مىڭ توننا دايىن ءونىم, كەلەشەكتە بۇل كورسەتكىش 600-گە دەيىن ۇلعايتىلادى. 300-گە جۋىق جۇمىس ورنى اشىلادى.
«بۇل وڭىرگە 30 ميلليارد تەڭگەگە جۋىق ينۆەستيتسيا, جاڭا جۇمىس ورىندارى, جاڭا تەحنولوگيالار اكەلەتىن ماڭىزدى جوبا. ەڭ باستىسى – زاۋىت قارا جانە ءتۇستى مەتاللۋرگياعا, حيميا ونەركاسىبىنە جانە باسقا دا سالالارعا قاجەتتى ءونىم شىعاراتىن بولادى. بۇل ءوندىرىس وساكاروۆ اۋدانى ءۇشىن جاڭا ءوسۋ نۇكتەسى بولاتىنىنا سەنىمدىمىن», دەپ اتاپ ءوتتى قاراعاندى وبلىسىنىڭ اكىمى جەڭىس قاسىمبەك.
ءبىرىنشى سۇرىپتى اك ءوندىرۋ كەشەنى وتاندىق قارا جانە ءتۇستى مەتاللۋرگيا, شىنى ونەركاسىبى كاسىپورىندارىنىڭ قاجەتتىلىكتەرىن قامتاماسىز ەتەدى.
«سارىوپان كەن ورنى مەتاللۋرگيالىق اك وندىرۋگە مۇمكىندىك بەرەتىندىگىمەن ەرەكشە», دەيدى SaryopanOperating تەحنيكالىق ديرەكتورى ەسكەندىر قولداسوۆ.
كارەر اشىق تاسىلمەن ازىرلەنەتىن بولادى. تاۋ ماسساسى بىردەن ەكى فراكتسيالى وندىرىسكە تۇسەدى. ۇلكەن بولىگى – قارا مەتاللۋرگيادا, ال كىشىسى – ءتۇستى. زاۋىت اكتىڭ ءۇش ءتۇرىن شىعارادى: كەسەك, ۇساقتالعان جانە گيدراتتالعان. نەگىزگى تۇتىنۋشىلار «ارسەلورميتتال تەمىرتاۋ», «قازاقمىس», «قازحروم» جانە KAZ Minerals كومپانيالارى بولادى. كاسىپورىندى ىسكە قوسۋ 2022 جىلدىڭ ءتورتىنشى توقسانىنا جوسپارلانعان.
وندىرىستىك ينفراقۇرىلىم زاۋىتقا «بيزنەستىڭ جول كارتاسى – 2025» مەملەكەتتىك باعدارلاماسى بويىنشا جەتكىزىلۋدە.