تۇرىكمەنستان پرەزيدەنتى گۋربانگۋلى بەردىمۇحامەدوۆ جاقىن ارادا وزبەكستانعا رەسمي ساپارمەن بارادى. ءىس-ساپار بارىسىندا ىنتىماقتاستىق تۋرالى قۇجاتتار پاكەتىنە قول قويىلادى. بۇل تۋرالى بەردىمۇحامەدوۆ جۇمىس بەينەكونفەرەنتسياسى بارىسىندا ايتتى, دەپ حابارلايدى Egemen.kz تۇركىمەنستان مەملەكەتتىك اقپارات اگەنتتىگىنە سىلتەمە جاساپ.
گ.بەردىمۇحامەدوۆ پرەمەر-ءمينيستردىڭ ورىنباسارى ەسەنمىرات ورازگەلديەۆكە الداعى اپتادا قول قويۋعا دايىندالىپ جاتقان ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق جونىندەگى قۇجاتتاردى تۇرىكمەن-وزبەكستان بىرلەسكەن كوميسسياسىنىڭ الداعى وتىرىسىندا وزبەكستاندىق ارىپتەسىمەن تالقىلاۋدى تاپسىردى.
گ.بەردىمۇحامەدوۆ سوڭعى رەت وزبەكستانعا 2019 جىلدىڭ قاراشاسىندا كەلگەن. سونداي-اق 2021 جىلدىڭ تامىزىندا ەكى ەل باسشىلارى كاسپي تەڭىزى جاعالاۋىنداعى «اۆازا» ۇلتتىق تۋريستىك ايماعىندا ورتالىق ازيا ەلدەرى پرەزيدەنتتەرىنىڭ ءۇشىنشى كونسۋلتاتيۆتىك كەزدەسۋى اياسىندا جۇزدەسكەن.