كوكتەن يگەنى كوپ بولماسا دا استىقتى وڭىردەگى ەگىننىڭ شىعىمى تاۋبە دەرلىك. قازىر اقمولالىق ديقاندار استىق جورىعىن ۇدەتە ءتۇستى
كۇزگى دالانىڭ ديدارىنا جۇپ-جۇقا سارى بوياۋ جاعىلىپ قالىپتى. بەرەكەنىڭ بەينەسى ىسپەتتى قۇتتى التىنداي جالت-جۇلت ەتكەن سارعىش بوياۋ ەگىندى القاپتىڭ ۇستىنە قوناقتاعان. قاي تاراپقا قاراساڭ دا, استىق ءۇشىن ارپالىسىپ جاتقان ەڭبەك ادامدارىن كورەسىڭ. ءدال وسىنداي بەرەكە ءۇشىن بەل بۋىپ, ەڭبەك ەتىپ جاتقان دالا ەرلەرىن اتباسار قالاسىنان تاياقتاستام جەردەگى ەگىن القابىنان كەزىكتىردىك. ءبىزدى ءتانتى ەتكەنى, سەكسەننەن اسقان قارت ديقان رۋبيك مانۋكياننىڭ وكشەسىن باسىپ كەلە جاتقان كەيىنگى تولقىنعا اقىل-كەڭەسىن ايتىپ, ەڭبەك مايدانىنىڭ الدىڭعى شەبىندە جۇرگەنى.
– جاستايىمىزدان دالا سىرىن جادىمىزعا جاتتاپ وستىك, – دەيدى قارت ديقان, – ءدال بيىلعىداي قۇرعاقشىلىقتى كوپتەن بەرى كورمەپ ەدىك. الاڭداۋ باسىم بولدى. ءبىزدىڭ باستى بايلىعىمىز – وسى التىن استىق ەمەس پە؟ كوكتەمدە دە كەلىپ كۇن رايىنان كوكىرەككە تۇيگەنىمدى ايتىپ كەتكەنمىن. ءتاۋىر استىق الۋ ءۇشىن تاجىريبەدەن قول ۇزبەۋ كەرەك. وزىق تەحنولوگيا دەگەنىمىز جەرگىلىكتى جەردىڭ ەرەكشەلىگىمەن قوسا ورىلسە عانا تابىستى بولادى. بيىل كوكتەم ەرتە كەلگەنىمەن, توپىراق كوپكە دەيىن جىلىنعان جوق. ال سۋىق جەرگە ءدان سالساڭ بۇعىپ جاتادى دا, بويىنداعى ىلعالىن جوعالتىپ, كۇشى كەمىپ, ونە المايدى. ونگەن كۇننىڭ وزىندە ءدال بيىلعىداي قۇرعاقشىلىق بولسا, بوي سالىپ جايقالىپ ءوسىپ كەتۋى قيىن.
از-كەم تاجىريبەسىمەن بولىسكەن قارت ديقان ەل پرەزيدەنتى قاسىم-جومارت توقاەۆتىڭ تاياۋداعى حالىققا جولداعان «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» جولداۋىنا توقتالدى. اسىرەسە, «ەگىس القابىنا ءار جىلى ءارتۇرلى داقىل ەگۋ تالابىن ساقتاۋ ءۇشىن ءتيىستى باقىلاۋدى كۇشەيتكەن ابزال» دەگەن وي كوڭىلىنەن شىققان. جالپى ديقان قاۋىم جەردىڭ قۇتىن كەتىرىپ الماۋدى كوبىرەك ويلايدى. ول ءۇشىن ەگىستىككە ەگىلەتىن داقىل تۇرلەرىن اۋىستىرىپ وتىرعان دۇرىس. كۇتىلمەگەن جەردەن بەرەكە قاشادى.
قۇرعاقشىلىق جىلدىڭ وزىندە ءار گەكتاردان 10 تسەنتنەردەن ءونىم جينالۋدا. بۇل بيىلعى جىل ءۇشىن ءتاپ-ءتاۋىر جاقسى ءونىم. ءدال قازىر وبلىستاعى گەكتار بەرەكەسى ورتاشا ەسەپپەن 7 تسەنتنەردەن اينالىپ تۇرعاندا, اتباسارلىق ديقانداردىڭ ءۇمىتى اقتالعان سىڭايلى. ەندىگى مىندەت, جەردە ونگەندى جەردە قالدىرماي, ۋاقىتىندا جيناپ الۋ.
– كۇننىڭ اشىق كەزىن ءتيىمدى پايدالانۋدامىز, – دەيدى كومباينشى يۋري گۋزەۆ, – قازان تۋسا سۇمبىلەگە ىلىگىپ قالۋىمىز مۇمكىن, سوندىقتان بار كۇش-جىگەردى جۇمىلدىرعانىمىز ابزال. ونىڭ ۇستىنە قازىرگى شەتەلدىك كومباينداردىڭ ونىمدىلىگى دە ايتا قالارلىقتاي عوي. رۋبيك مانۋكيان اقساقال كەلگەن سايىن تاڭىرقاپ, قىزىعىپ كەتەدى. اعا بۋىننىڭ قانشالىقتى قياپات قيىندىققا شىداعاندىعىن سول كىسىنىڭ اۋزىنان ەستىگەن سايىن بۇگىنگىنىڭ جۇمىسى ولارعا قاراعاندا ويىنشىق سياقتى بولىپ كورىنەدى. كومبايننىڭ ءىشى جىپ-جىلى ءارى جايلى, بارلىق جۇمىس كومپيۋتەر ارقىلى اتقارىلادى. بۇرىنعىداي جان قينايتىن قول ەڭبەگى جوق دەسەڭ دە بولار.
ءبىر قۋانارلىعى, جازدىڭ العاشقى ايلارى ەرەسەن ىستىق بولعاندىقتان بيىلعى استىقتىڭ قامىرلىلىعى وتە جوعارى ەكەن. ازىرگە 31 پايىزدىڭ توڭىرەگىندە. استىقتى القاپقا قاراعان سايىن جانىڭ جادىرايدى. كەيبىر القاپتاردا ارا-كىدىك كەزدەسىپ قالاتىن ءارامشوپ اتاۋلىدان ادا. تاپ-تازا, ءموپ-ءمولدىر. بۇل دا قاراپايىم ديقانداردىڭ ماڭداي تەرىنىڭ وتەۋى عوي.
ىمىرت ءۇيىرىلىپ, كوز بايلانا باستاعان ۋاقىت. استىقتى القاپتاعى تەحنيكانىڭ جارىعى سامالاداي جارقىراپ تۇر. ماڭگىلىك ەلدىڭ جۇرەگىڭدى ۋىلجىتاتىن نۇرى ىسپەتتى.
اقمولا وبلىسى,
اتباسار اۋدانى