قازاقستان مۇسىلماندارى ءدىني باسقارماسى مەن تۇركيا ءدىن ىستەرى باسقارماسى اراسىنداعى ەكى جاقتى كەلىسىم نەگىزىندە حاسەكي اكادەمياسىنىڭ 2021-2022 وقۋ جىلىنا قابىلدانعان شاكىرتتەر تۇركياعا شىمكەنتتەن اتتاندى, دەپ جازادى Egemen.kz.
بيىلعى قمدب-عا قاراستى ءدىني وقۋ ورىندارىن بىتىرگەن, ءبىلىمدى, دايارلىق كۋرستان جانە قابىلداۋ ەمتيحانىنان «وتە جاقسى» باللعا يە بولعان 40 شاكىرتكە حاسەكي اكادەمياسىنىڭ جولداماسى بەرىلگەن بولاتىن.
حاسەكي اكادەمياسىنداعى وقۋ مەرزىمى – 3 جىل.
شارا بارىسىندا قمدب ءدىني ءبىلىم جانە كادر دايارلاۋ ءبولىمىنىڭ مەڭگەرۋشىسى سمايىل سەيتبەكوۆ شاكىرتتەرگە بىرقاتار اقىل-كەڭەستەر بەرىپ, وقۋ ورداسىنداعى تالاپ, ەرەجەلەردى ايتىپ ءوتتى. سونداي-اق اتالمىش وقۋ ورنىندا ءبىلىم دەڭگەيىمەن قاتار ستۋدەنتتەرگە بارلىق جاعدايدىڭ جاسالعانىن تىلگە تيەك ەتتى.