بريتاندىق اقىندار شون و’برايەن مەن دجون بەرنسايد II دارەجەلى «دوستىق» وردەنىمەن ماراپاتتالدى. قۇرمەتتى اتاق ەل پرەزيدەنتى قاسىم-جومارت توقاەۆتىڭ جارلىعىمەن قازاقستان مەن ۇلىبريتانيا جانە سولتۇستىك يرلانديا قۇراما كورولدىگى اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن, سونداي-اق قازاقتىڭ ۇلى اقىنى, فيلوسوف جانە اعارتۋشىسى اباي قۇنانباي ۇلىنىڭ مۇراسىن حالىقارالىق ارەنادا ىلگەرىلەتۋگە سىڭىرگەن ەڭبەگى ءۇشىن بەرىلدى.
ەكى اقىن اباي شىعارمالارىنىڭ اعىلشىن تىلىندەگى العاشقى تولىق جيناعىن كەمبريدج ۋنيۆەرسيتەتى باسپاسىندا دايىنداپ, باسۋ جوباسىنا تىكەلەي اتسالىسقان. «ۇلتتىق اۋدارما بيۋروسى» قق-مەن (ۇاب) سەرىكتەستىكتە جۇزەگە اسىرىلعان جوبا شەڭبەرىندە بريتاندىق اقىن پروفەسسور ش.و’برايەن اباي پوەزياسىنىڭ اۋدارماسىن دايىنداسا, قاراسوزدەرىن شوتلاند اقىنى, پروفەسسور دج.بەرنسايد ءتارجىمالادى. ايتا كەتەيىك, اعىلشىن تىلىندەگى باسىلىم – قازاق اقىنىنىڭ شىعارمالارىن الەمنىڭ ون تىلىندە جاريالاۋ جونىندەگى ۇاب-نىڭ اۋقىمدى جوباسىنىڭ ءبىر بولىگى ەدى.
وردەندەردى تابىستاۋ راسىمىندە قازاقستاننىڭ ۇلىبريتانياداعى ەلشىسى ەرلان ىدىرىسوۆ قازاقستان تاۋەلسىزدىگىنىڭ 30 جىلدىعىن مەرەكەلەۋ جىلىندا جوعارى ناگ- رادالاردى يەلەنۋدىڭ سيمۆولدىق ءمانى بار ەكەنىن ايتتى. ول سونداي-اق دج.بەرنسايد پەن ش.و’برايەننىڭ جاھاندىق اعىلشىنتىلدى اۋديتوريا اراسىندا اباي مۇراسىن تانىمال ەتۋگە جانە ەكى ەل مادەنيەتىن ءوزارا جاقىنداستىرۋ ىسىنە قوسقان زور ۇلەستەرىن اتاپ ءوتتى.
پروفەسسور شون و’برايەن – بريتاندىق اقىن, سىنشى, دراماتۋرگ. ەليوت, «Forward Prize», سومەرسەت موەم سىيلىقتارىمەن ماراپاتتالعان. ال پروفەسسور دجون بەرنسايد – شوتلاند اقىنى جانە جازۋشىسى, سەنت-ەندريۋس ۋنيۆەرسيتەتىنىڭ اعىلشىن ءتىلى پروفەسسورى. پوەزيا مەن پروزانىڭ بىرقاتار جيناعىن جاريالاعان. ەليوت, «Forward Prize», و.گەنري سىيلىقتارىنىڭ لاۋرەاتى. ونىڭ شىعارمالارىنىڭ اۋدارمالارى گەرمانيا, فرانتسيا, يسپانيا, يتاليا, تۇركيا, نيدەرلاند, قحر, يندونەزيا, حورۆاتيا, برازيليا جانە ارگەنتينادا باسىلعان.