قر پرەزيدەنتى قاسىم-جومارت توقاەۆ قازاقستان حالقىنا جولداۋىندا گرانت مەرزىمىنىڭ ءۇش جىلمەن شەكتەلۋى ىرگەلى عىلىمدى دامىتۋعا ەداۋىر كەدەرگى كەلتىرىپ وتىرعانىن ايتتى, دەپ جازادى Egemen.kz.
«گرانت مەرزىمىنىڭ ءۇش جىلمەن شەكتەلۋى ىرگەلى عىلىمدى دامىتۋعا ەداۋىر كەدەرگى كەلتىرىپ وتىر. وسىنداي قىسقا جوسپارلاۋ مەرزىمىندە قانداي دا ءبىر ناتيجەگە قول جەتكىزۋدىڭ ءوزى قيىن ەكەنى انىق. عىلىم سالاسىن گرانتتىق قارجىلاندىرۋ مەرزىمىن بەس جىلعا دەيىن ۇزارتۋ ماسەلەسىن قاراستىرعان ءجون», دەدى پرەزيدەنت.
مەملەكەت باسشىسىنىڭ ايتۋىنشا, ۇلتتىق عىلىمي كەڭەس شەشىمدەرىنىڭ ادىلدىگى تۋرالى ماسەلە دە كۇن تارتىبىنەن تۇسپەي تۇر.
«وسىعان وراي, اپەللياتسيا ينستيتۋتىن ەنگىزۋ قاجەت دەپ سانايمىن. جالپى, ەلىمىزدىڭ ءبىلىم بەرۋ جانە عىلىم سالاسىنىڭ الدىندا كەزەك كۇتتىرمەس اۋقىمدى مىندەت تۇر. بۇل – ۋاقىت تالابىنا ساي بولۋمەن قاتار, ارقاشان ءبىر ادىم الدا ءجۇرىپ, تىڭ جاڭالىقتار ۇسىنا ءبىلۋ دەگەن ءسوز», دەپ تولىقتىردى ق.توقاەۆ.