Egemen.kz سوڭعى اپتادا توتەنشە جاعداي دەپارتامەنتتەرىنەن تۇسكەن ءورت تۋرالى حابارلامالارعا شولۋ جاسادى.
باتىس قازاقستاندا 480 گا جەر ورتەنىپ جاتىر
«تامىز ايىنىڭ باسىنان بەرى باتىس قازاقستان وبلىسىندا اۋا تەمپەراتۋراسىنىڭ +41°قا دەيىن جوعارىلاۋى بايقالادى. وسىعان بايلانىستى وبلىس اۋماعىندا ءورت جيىلەپ كەتتى. ءورت سوندىرۋشىلەر اقجايىق, بايتەرەك جانە تەرەكتى اۋداندارىندا ءتىلسىز جاۋمەن ارپالىسۋدا. ءورتتىڭ اۋدانى شامامەن 480 گا قۇرايدى, ونىڭ 90 گا ورمان القابى بولسا, 390 گا قۇرعاق ءشوپ», - دەپ جازىلعان بقو توتەنشە جاعدايلار دەپارتامەنتىنىڭ حابارلاماسىندا.
ءورتتى سوندىرۋگە وبلىستىق تجد بولىمشەلەرىنىڭ, ء«ورت ءسوندىرۋشى» اق, «قازاۆياقۇتقارۋ» اق, كەنتتىك وكرۋگتەر مەن شارۋا قوجالىقتارىنىڭ ەرىكتى ءورت ءسوندىرۋ قۇرىلىمدارى جانە ورماندار مەن جانۋارلار دۇنيەسىن قورعاۋ جونىندەگى ينسپەكتسيانىڭ كۇشتەرى مەن قۇرالدارى قاتىستى.
ءورتتى اۋەدەن ءسوندىرۋ ءۇشىن «قازاۆياقۇتقارۋ» تىكۇشاعى جۇمىلدىرىلدى. ءورت وشاقتارىنا 198 تەكشە مەتر سۋ قۇيىلدى.
ازىرگە قازا بولعاندار مەن زارداپ شەككەندەر جوق. ءورتتىڭ سەبەپتەرى, ماتەريالدىق شىعىن انىقتالىپ جاتىر.
22 تامىز كۇنى وسى ايماقتا 280 توننا پىشەن ورتەنىپ كەتكەن ەدى.
زەرەندىدە ورمان ءورتى 7 گا اۋماقتى شارپىدى
ءباسپاسوز قىزمەتىنىڭ مالىمەتىنشە, 25 تامىزدا «كوكشەتاۋ» مۇتپ زەرەندى فيليالىنىڭ گريبنوۆسكوە ورمان شارۋاشىلىعى اۋماعىندا ورمان ورتەنگەن, ونى سوندىرۋگە 154 ادام مەن ءورت دەسانتى بار تىكۇشاق قاتىسقان.
ورمان ءورتىن جويۋعا 20 تەحنيكا, 1 تىكۇشاق جانە جەكە قۇرامنىڭ 142 ادامى, ونىڭ ىشىندە اقمولا وبلىسى تجد-نىڭ 5 تەحنيكاسى جانە 51 ادامى, 6 تەحنيكا جانە ورمان مەكەمەلەرىنىڭ 54 قىزمەتكەرى, «قازاۆياورمانقورعاۋ» اق-نىڭ 1 تىكۇشاعى, جەرگىلىكتى اتقارۋشى ورگانداردىڭ 7 تەحنيكاسى مەن 33 ادامى جانە ورتكە قارسى قۇرىلىمداردىڭ 2 تەحنيكاسى مەن 4 قىزمەتكەرى تارتىلدى», دەلىنگەن حابارلامادا.
ء«ورتتى ءسوندىرۋ وڭايعا سوقپادى, سەبەبى قاتتى جەل مەن اعاشتاردىڭ باسى ورتەنۋى كەدەرگى كەلتىردى. الايدا, جەدەل ءىس-قيمىلدار جانە كۇشتەر مەن قۇرالداردىڭ ۋاقتىلى جۇمىلدىرىلۋىنىڭ ارقاسىندا ءورت ساعات 18.50-دە وقشاۋلاندى, قازىرگى ۋاقىتتا ورمان ءىشىن بارلاۋ جۇرگىزىلۋدە. ورماننىڭ 7 گەكتارىن ءورت شارپىعان», دەلىنگەن حابارلامادا.
ماماندار «ورتەپ جىبەردى» دەگەن بولجام جاساپ وتىر. ءورت بولعان جەردە زەرەندى اۋداندىق پوليتسيا ءبولىمىنىڭ جەدەل تەرگەۋ توبى جۇمىس ىستەيدى.
شىمكەنتتەگى ەتنواۋىلدان ءورت شىقتى
«26 تامىزدا تۇنگى ساعات 00.49-دا «101» باسقارۋ پۋلتىنە ءال-فارابي اۋدانىنداعى ساپاق داتقا كوشەسى بويىندا ورنالاسقان «شىمقالا» ەتنواۋىل اۋماعىندا ءورت شىققانى تۋرالى حابار كەلىپ تۇسكەن.
ەتنواۋىلدا قۇرىلىس جۇمىستارى جۇرگىزىلىپ جاتقان. ءورت ءسوندىرۋ بولىمدەرى شاقىرتۋعا 7 مينۋتتا كەلگەن. وقيعا ورنىندا ەتونواۋىل اۋماعىندا ورنالاسقان كولەمى 80 شارشى مەتر باستىرما جانە كولەمى 8 شارشى مەتر قورانىڭ قامىس توبەسى جانعاندىعىن انىقتادى», دەلىنگەن حابارلامادا.
ءورت ساعات 01:10-دا وقشاۋلانىپ, ساعات 01:19-دا تولىعىمەن ءسوندىرىلدى. وقىس وقيعادان ەشكىم زارداپ شەكپەگەن.
قازىر ءورتتىڭ شىعۋ سەبەپتەرى انىقتالىپ جاتىر. ءورتتى سوندىرۋگە شىمكەنت قالالىق تجد ءورت ءسوندىرۋ قىزمەتىنىڭ 25 قىزمەتكەرى مەن 5 تەحنيكاسى جۇمىلدىرىلدى.
قاراعاندى وبلىسىندا 3 مىڭ گەكتار جەر ورتەنىپ كەتتى
قاراعاندى وبلىسىنداعى اقباستاۋ اۋىلىندا جايىلىمدىق جەر, شابىندىق, شاۋىپ قويعان ءشوپ ورتەنىپ كەتتى. قىزىل جالىننان زارداپ شەككەن ادامدار جوق.
ستەپنوگوردە كوپقاباتتى ۇيدەن ءورت شىقتى
ستەپنوگور قالالىق ءورت ءسوندىرۋ بولىمىنە 9-شى شاعىن اۋدانداعى 46-ۇيدە پاتەردىڭ ورتەنگەنى تۋرالى حابار تۇسكەن.
ء«ورت التىنشى قاباتتاعى ءبىر بولمەلى پاتەردەن شىقتى. ورتتەن كورشى پاتەرلەردىڭ ەسىكتەرى زاقىمدالدى, ءورت اۋماعى 30 شارشى مەتردى شارپىدى», دەپ ءتۇسىندىردى ستەپنوگور قالاسىنىڭ تجب باستىعىنىڭ مىندەتىن اتقارۋشى ارمان شاياحمەتوۆ.
اۆتوساتىنىڭ كومەگىمەن بەس ادام قۇتقارىلدى, باسپالداق مارشى بويىنشا 15 ادام, ونىڭ ىشىندە ءبىر بالا ەۆاكۋاتسيالاندى.
تالدىقورعاندا زاۋىت ورتەنىپ, ءۇش ادام زارداپ شەكتى
تالدىقورعانداعى اۆتوموبيل شينالارىن وڭدەۋ زاۋىتىندا ءورت شىعىپ, تسەحتىڭ ءۇش قىزمەتكەرى زارداپ شەكتى. ەكى ادامنىڭ جاعدايى ورتاشا, بىرەۋى اۋىر. ولاردىڭ بارلىعى تالدىقورعانداعى كوپسالالى اۋرۋحاناعا جەتكىزىلدى.
وقيعا ورنىنا وبلىستىق تجد-دان 24 قىزمەتكەر مەن 9 تەحنيكا جىبەرىلدى.
«جارىلىستىڭ بولجامدى سەبەبى بالقىتۋ كەزىندە پايدا بولعان جانعىش زاتتاردىڭ سىيىمدىلىعىنىڭ جۇمىس ايماعىندا بۋ جينالۋىنىڭ تەحنولوگيالىق پروتسەسس بۇزىلعانىنان بولۋى مۇمكىن», دەپ تولىقتىردى ءباسپاسوز قىزمەتى.
جامبىل وبلىسىندا 37 توننا ءشوپ ورتەنىپ كەتتى
مەركى اۋدانى, مەركى اۋىلى, نيزامي كوشەسى 41 «ا», جەكە تۇرعىن ءۇيدىڭ اۋلاسىندا 1700 تۇك ءشوپ ورتەنىپ, جالىن 70 شارشى مەتر اۋماقتى شارپىعان.
ءورتتى سوندىرۋگە 7 قىزمەتكەر, 2 تەحنيكا جۇمىلدىرىلعان. جالپى, 37 توننا ءشوپ ورتەنىپ كەتكەن.
شىعىس قازاقستاندا دالا ءورتى باسىلماي تۇر
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءورت سوندىرۋشىلەر كوكپەكتى جانە اياگوز اۋداندارىندا ءشوپتى شارپىعان ءتىلسىز جاۋمەن كۇرەسىپ جاتىر. ولارعا جەرگىلىكتى اتقارۋشى ورگان وكىلدەرى مەن ورمانشىلار كومەكتەسۋدە.
«كوكپەكتى اۋدانىنداعى «كليۋچي» ۋچاسكەسىندە قىزىل جالىننىڭ جالپى اۋدانى 45 گەكتاردى, اياگوز اۋدانىنداعى قارا بوجىر ۋچاسكەسىندە 25 گەكتاردى جانە ۇمبەتاي ۋچاسكەسىندە 10 گەكتاردى قۇراعان. وقيعا ورنىندا بارلىعى 88 ءورت ءسوندىرۋشى, جەرگىلىكتى اتقارۋشى ورگاننىڭ 92 قىزمەتكەرى, 10 ورمانشى جانە 27 تەحنيكا جۇمىلدىرىلعان», دەپ حابارلادى ۆەدومستۆو وكىلدەرى.
جىل باسىنان بەرى وبلىستا 950 ءورت تىركەلىپ, 582 جەر ءۇيدى جالىن شارپىعان. ءتىلسىز جاۋدان 33 ادام مەرت بولىپ, ءيىس تيگەن 56 ادام اۋرۋحاناعا جەتكىزىلدى.
كوپ جاعدايدا ءورتتىڭ شىعۋىنا – وتتى ابايسىز قولدانۋ (249 وقيعا), پەش پايدالانۋ كەزىندە قاۋىپسىزدىك تالاپتارىن ساقتاماۋ (160), ەلەكتر جابدىقتارىن مونتاجداۋ جانە پايدالانۋ ەرەجەلەرىن بۇزۋ (81) سەبەپ بولعان.
سونىمەن قاتار سەمەيدە ءشوپ تاسىعان جۇك كولىگىنىڭ ورتەنىپ كەتكەنى تۋرالى دەرەك تىركەلدى.
الماتى تاۋلارىنىڭ باۋرايىندا وتشاشۋدان ءورت شىقتى
الماتى قالاسى توتەنشە جاعدايلار دەپارتامەنتىنىڭ حابارلاۋىنشا, 21 تامىز كۇنى الماراسان شاتقالىندا ەكوپوستتان جوعارى تاۋ باۋرايىندا ءورت شىقتى.
«وقيعا ورنىنا دەرەۋ الماتى تجد تابيعي ورتتەردى ءسوندىرۋ جونىندەگى جيىنتىق جاساق, سونداي-اق ىلە-الاتاۋ ۇلتتىق پاركىنىڭ مۇتپ قىزمەتكەرلەرى جىبەرىلدى. ءورتتىڭ تارالۋىنا جول بەرمەۋ ءۇشىن ىلە-الاتاۋ مۇتپ ورمانشىلارى تەز ارادا جانىپ جاتقان ءولى اعاشتاردى قازىپ الدى», دەپ حابارلادى ۆەدومستۆودان.
ءورت ءبىر ساعاتتان از ۋاقىت ىشىندە جويىلدى. جالىندى الاۋىزدىقتاۋعا ىلە-الاتاۋ ۇلتتىق پاركىنىڭ مۇتپ 24 قىزمەتكەرى, 4 بىرلىك تەحنيكا, تجد جەكە قۇرامىنىڭ 25 ادامى مەن 5 بىرلىك تەحنيكا جۇمىلدىرىلدى.
كۋاگەرلەردىڭ ايتۋىنشا, ءورتتىڭ الدىن-الا سەبەبى وقيعا ورنىنان تەز جوعالىپ كەتكەن دەمالۋشىلار توبىنىڭ وتشاشۋ شاشقانى بولۋى مۇمكىن.
ء«ورت شىققان جەردەن بىرنەشە شاقىرىم جەردە وتشاشۋدىڭ شاشىلعانى بايقالدى. قر اقبتك-ءنىڭ 367-بابىنىڭ 3-بولىگىنە سايكەس, ەرەكشە قورعالاتىن تابيعي اۋماقتاردا جاسالعان ءورت قاۋىپسىزدىگى تالاپتارىن بۇزعانى ءۇشىن 35 جاستاعى ەر ادام 100 اەك (291 مىڭ 700 تەڭگە) كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى», دەپ ءتۇسىندىردى قالالىق تجد-دە.
سونداي-اق, الماتىدا, تارازدا كوپقاباتتى تۇرعىن ءۇي, قاپشاعايدا قاراۋسىز قالعان ۇيدەن, اتىراۋدا دا تۇرعىن ۇيدەن, جامبىل وبلىسىندا قمدب فيليالىنان ءورت شىقتى.