ۆاكتسينانىڭ تولىق كومپونەنتىن الىپ ۇلگەرمەگەن ستۋدەنتتەر جاڭا وقۋ جىلى باستالعان كەزدە وقۋ ورنى ورنالاسقان اۋماقتاعى مەديتسينالىق ۇيىمداردا ۆاكتسينا سالدىرا الادى, دەپ حابارلايدى Egemen.kz.
قر باس سانيتار دارىگەرى ەرلان قياسوۆتىڭ جاڭا قاۋلىسىندا ۆاكتسينا سالدىرماعان ستۋدەنتتەر وقۋ ورنى ورنالاسقان اۋماقتاعى مەديتسينالىق ۇيىمداردىڭ ەگۋ پۋنكتتەرىندە ۆاكتسيناتسيالانۋ كەرەكتىگى ايتىلعان.
شەتەلدىك ستۋدەنتتەر بولسا, قازاقستان اۋماعىنا وقۋعا تۇرعىلىقتى ەلدىڭ ۋاكىلەتتى ورگانى راستاعان COVID-19-عا قارسى ۆاكتسيناتسيالاۋدىڭ تولىق كۋرسى بولعان جاعدايدا عانا جىبەرىلەدى.
«شەتەلدىك ستۋدەنتتەر قازاقستان رەسپۋبليكاسىنىڭ مەملەكەتتىك شەكاراسىنان وتكەننەن كەيىن 3 تاۋلىكتەن كەشىكتىرمەي پتر ادىسىمەن الىنعان COVID-19-عا تەستىلەۋدىڭ تەرىس ناتيجەسى بار بولعان جاعدايدا كۇندىزگى وقۋ فورماتىنا جىبەرىلسىن», دەپ جازىلعان قۇجاتتا.
مەديتسينالىق كوللەدجدەر مەن جوعارى وقۋ ورىندارىنىڭ ءبىلىم الۋشىلارىنا كلينيكالىق بازالارعا, رەزيدەنتۋرا بازالارىنا, دەنساۋلىق ساقتاۋ سالاسىنداعى ءبىلىم بەرۋ ۇيىمدارىنىڭ كلينيكالارىنا, ۋنيۆەرسيتەت اۋرۋحاناسىنا, ينتەگراتسيالانعان اكادەميالىق مەديتسينالىق ورتالىققا ۆاكتسينالاۋ پاسپورتىمەن راستالعان COVID-19-عا قارسى ۆاكتسينالاۋدىڭ تولىق كۋرسى بار بولعان كەزدە كىرۋىنە رۇقسات ەتىلەدى.