قاراعاندىدا ەلباسى ن.ءا.نازارباەۆتىڭ قازاقستان حالقىنا ارناعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋى تالقىلانعان وبلىس اكتيۆىنىڭ جينالىسى بولىپ ءوتتى.
قاراعاندىدا ەلباسى ن.ءا.نازارباەۆتىڭ قازاقستان حالقىنا ارناعان «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋى تالقىلانعان وبلىس اكتيۆىنىڭ جينالىسى بولىپ ءوتتى.
القالى باسقوسۋدا ايماق باسشىسى باۋىرجان ابدىشەۆ بۇل ماڭىزدى قۇجاتتا العا قويىلعان مىندەتتەردى قاتىسۋشىلارعا جان-جاقتى تالداپ-ءتۇسىندىرىپ, سوعان بايلانىستى ءوڭىر الدىندا تۇرعان كەلەلى ماسەلەلەرگە كەڭىنەن توقتالدى. مەملەكەت باسشىسى ۇسىنعان 10 ىلكىمدى يدەياعا سايكەس, ارقايسىسى بويىنشا ءىس-شارالاردى جىكتەپ, ونى اتقارۋشى مەملەكەتتىك ورگاندار مەن ءوندىرىس, ءبىلىم بەرۋ, دەنساۋلىق ساقتاۋ, الەۋمەتتىك سالالارعا ناقتى تاپسىرمالار بەرىلدى. ايماقتىڭ ەكونوميكالىق ەرەكشەلىگىنە وراي تاۋ-كەن مەتاللۋرگياسى, ماشينا جاساۋ, فارماتسەۆتيكا ونەركاسىبىن ودان ءارى دامىتۋعا باسىم كوڭىل بولىنەتىندىگى اتالدى. سونداي-اق, تابيعي قازىنالاردى ۇتىمدى قولدانا ءبىلۋدىڭ ماڭىزدىلىعىنا توقتالا كەلىپ, بۇل رەتتە, ماسەلەن, مەتان گازىن پايدالانۋدى ىسكە اسىرۋ, مىس قورلارى قالدىقتارىن قايتا كادەگە جاراتۋ جونىندە مىندەتتەر جۇكتەلدى.
سونىمەن قاتار, يندۋستريالىق-يننوۆاتسيالىق دامۋدا ۇلكەن ىلگەرىلەۋشىلىك كۇتىپ تۇرعاندىعى ايتىلدى. اعىمداعى جىلى 13 ءوندىرىس اشىلىپ, 2 مىڭعا تارتا ادام جۇمىسپەن قامتىلۋى ءتيىس. سالىناتىن 2 جىلۋ-ەلەكتر ستانساسى تەمىرتاۋ مەن جەزقازعان قالالارىن جىلۋ جانە ەلەكتر قۋاتىمەن قامتاماسىز ەتۋدى جاقسارتادى.
جيىندا «سارىقازىنا» جشس ديرەكتورى پاۆەل سەميچەنكو, قاراعاندى مەملەكەتتىك مەديتسينالىق ۋنيۆەرسيتەتىنىڭ رەكتورى راۋشان دوسماعامبەتوۆا, وبلىستىق وسىمدىك شارۋاشىلىعى جانە سەلەكتسيا عىلىمي-زەرتتەۋ ينستيتۋتىنىڭ باسشىسى راشيد نۇرعازيەۆ, «ليتۋانيكا» ليتۆان ەتنومادەني بىرلەستىگىنىڭ جەتەكشىسى ۆيتالي تۆارينوس, گۋمانيتارلىق كوللەدج وقۋشىسى ولگا تاتۋنوۆيچ ءسوز سويلەپ, جاڭا جولداۋ ەلىمىزدىڭ ءوسىپ-وركەندەي تۇسۋىنە تىڭ سەرپىلىس تۋعىزاتىنىنا ريزالىق ءبىلدىردى.
«قازاقستان» شاحتاسىنىڭ كەنشىسى قانات مۇستافين شاحتەرلەردىڭ پرەزيدەنت ن.ءا.نازارباەۆتىڭ ساليقالى دا سارابدال ساياساتىنا قولداۋ بىلدىرگەن ۇندەۋىن تانىستىرىپ, وبلىس اكىمىنە تابىس ەتتى.
ايقىن نەسىپباي,
«ەگەمەن قازاقستان».
قاراعاندى.