بيىل ەلىمىزدە العاش رەت اۋىل اكىمدەرىنىڭ سايلاۋى ءوتىپ, وڭىرلەردىڭ 730 اۋىل اكىمى سايلاندى. جىل سوڭىنا جاڭا سايلانعان اكىمدەر ءوز بىلىكتىلىكتەرىن ارتتىراتىن كۋرستاردان وتەتىن بولادى, دەپ حابارلايدى Egemen.kz.
بۇل تۋرالى قر ۇلتتىق ەكونوميكا مينيسترلىگى وڭىرلەردى تالداۋ جانە جەرگىلىكتى ءوزىن-ءوزى باسقارۋدى دامىتۋ دەپارتامەنتى ديرەكتورىنىڭ ورىنباسارى ميرجان يمانباەۆ ايتتى.
«بيىل شىلدەدە ەلىمىزدە العاش رەت اۋىل اكىمدەرىنىڭ سايلاۋى ءوتتى. ناتيجەسىندە بارلىق ءوڭىر بويىنشا 730 اۋىل اكىمى سايلاندى. بۇگىندە ولار ءوز قىزمەتىنە كىرىسىپ كەتتى. ولاردىڭ اراسىندا مەملەكەتتىك قىزمەتتە بۇرىننان ەڭبەك ەتىپ كەلە جاتقاندارمەن قاتار, تاجىريبەسى از ماماندار دا بارشىلىق. وسى ورايدا جاڭا سايلانعان اۋىل اكىمدەرى 3 اپتالىق بىلىكتىلىگىن ارتتىرۋ كۋرسىنان وتەدى. ونى قر پرەزيدەنتى جانىنداعى مەملەكەتتىك باسقارۋ اكادەمياسى ۇيىمداستىرادى. وندا جاڭا اكىمدەردى مەملەكەتتىك ساتىپ الۋ, بيۋدجەت, كىرىس پەن شىعىستى دۇرىس ەسەپتەۋگە ۇيرەتەدى. ودان بولەك, حالىقپەن قارىم-قاتىناس ياعني كوپشىلىكپەن جۇمىس ىستەي ءبىلۋدى ۇيرەنەدى. سونداي-اق, مەملەكەتتىك قىزمەتكەر ءبىلۋى ءتيىس زاڭداردى تىڭداپ شىعادى», دەدى ميرجان يمانباەۆ.
اۋىل اكىمدەرىنىڭ كۋرسى جىلدىڭ سوڭىنا دەيىن ونلاين فورماتتا وتكىزىلەدى.