شىمكەنت قالاسىندا ەرەكشە قاجەتتىلىكتەرى بار جانداردىڭ كىتاپقا قولجەتىمدىلىگىن ارتتىرۋعا ارنالعان اۋقىمدى جوبا قولعا الىندى, دەپ حابارلايدى Egemen.kz.
بۇگىنگى كۇنگە دەيىن «سويلەيتىن كىتاپتار شىعارۋ» بولىمىندە كىتاپتاردىڭ جالعىز قىزمەتكەر تاراپىنان دىبىستالىنۋىنا بايلانىستى اۋديوكىتاپ قورىنىڭ تولىعۋى باياۋ جۇرگىزىلەتىن. ەندى, كىتاپحانانىڭ اۋديوكىتاپتار قورى تەاتر ارتىستەرى جانە باسقا مادەنيەت سالاسى قىزمەتكەرلەرى دىبىستاعان كىتاپتارمەن تولىعۋدا.
بۇل جوباعا قاتىسۋشىلار قاتارىندا شىمكەنت قالالىق وپەرا جانە بالەت تەاترىنىڭ ديرەكتورى, قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى مايرا مۇحامەدقىزى, شىمكەنت قالالىق ورىس دراما تەاترىنىڭ ديرەكتورى, قر ەڭبەك سىڭىرگەن قايراتكەرى يگور ۆەربيتسكي, شىمكەنت قالالىق ج.شانين اتىنداعى اكادەميالىق قازاق دراما تەاترىنىڭ كوركەمدىك جەتەكشىسى, قر ەڭبەك سىڭىرگەن قايراتكەرى, پروفەسسور, رەجيسسەر بەكبولات قۇرمانعوجاەۆ, شىمكەنت قالالىق ج.شانين اتىنداعى اكادەميالىق قازاق دراما تەاترىنىڭ اكتەرى, قر مادەنيەت قايراتكەرى ەركىن شىمىرقۇلوۆ, شىمكەنت قالاسىنىڭ مادەنيەت, تىلدەردى دامىتۋ جانە ارحيۆتەر باسقارماسىنىڭ باسشىسى حانزادا ەسەنوۆا جانە ت.ب. قىزمەتكەرلەر بار.
قازىرگى تاڭدا, ارنايى كىتاپحانانىڭ كىتاپ قورى 140376 دانانى قۇرايدى. نەگىزگى كىتاپ قورى بەدەرلى-نۇكتەلى ءارىپتى, جازىق باسپالى, ديسكىدە, ناشار كورەتىندەرگە ارنالعان ءماتىنى ۇلكەيتىلگەن ارىپتەر جازىلعان ادەبيەتتەر مەن مەرزىمدى باسىلىمدار, كىشى قالىپتاعى مۇسىندەر, بەدەرلى-گرافيالىق قۇرالداردى قۇرايدى. 2003 جىلدان بەرى دىبىستالىپ كەلە جاتقان اۋديوكىتاپتار سانى 5000-نان اسادى.