قازاقستاندىق Mezzo توبى «جاڭا تولقىن-2021» حالىقارالىق ۆوكالدىق بايقاۋىندا ەكى كۇننىڭ قورىتىندىسى بويىنشا ءۇشىنشى ورىندا تۇر, دەپ حابارلايدى Egemen.kz.
بايقاۋدىڭ ءبىرىنشى كۇنى قازاقستاندىقتار مەرايا كەريدىڭ Without you ءانىن ورىنداپ, قازىلار القاسى مۇشەلەرىنەن 86 بالل الدى جانە ارمەنيادان كەلگەن قاتىسۋشىدان كەيىنگى ەكىنشى ورىندى يەلەندى.
ەكىنشى كۇنى ولار باتىرحان شۇكەنوۆتىڭ «دوجد» كومپوزيتسياسىن شىرقاپ, 170 ۇپايمەن ءۇشىنشى ورىنعا جايعاستى.
ەندى فيناليستەردى ءۇشىنشى بايقاۋ كەزەڭى - فينال كۇتىپ تۇر. ونىڭ قورىتىندىسى بويىنشا بايقاۋدىڭ جەڭىمپازى انىقتالادى.
بيىل «جاڭا تولقىن-2021» فينالىندا الەمنىڭ 9 ەلىنەن 11 قاتىسۋشى باس جۇلدەگە تالاسادى. بايقاۋعا قاتىسۋشىلاردى يگور كرۋتوي, فيليپپ كيركوروۆ, سۆەتلانا لوبودا, سەرگەي لازارەۆ, ارتيك-استي, لەونيد اگۋتين, ديما بيلان جانە ديماش قۇدايبەرگەن سەكىلدى قازىلار القاسى باعالايدى.
Mezzo – كلاسسيكالىق جانە تانىمال مۋزىكا ەلەمەنتتەرىنىڭ سينتەزى سانالاتىن كلاسسيكالىق كروسسوۆەر باعىتىندا جۇمىس ىستەيتىن قازاقستانداعى العاشقى ۆوكالدىق توپ. ولار 2012 جىلى قۇرىلعان. توپتا جاسۇلان سىدىقوۆ, جانىبەك سەيداحمەتوۆ, اسان نۇربەرگەنوۆ جانە مەيىرحان جانتۇرعانوۆ ءان ايتادى. ۇجىم 2012 جىلى X Factor Kazakhstan كونكۋرسىندا 2-ءىشى ورىن الىپ, تانىمال بولعان.