بيىل كورنەكتى مەملەكەت قايراتكەرى, «الاش» قوزعالىسىنىڭ كوسەمى, ءاليحان نۇرمۇحامەد ۇلى بوكەيحاننىڭ تۋعانىنا 155 جىل.
وسىعان وراي, سەمەي قالاسىندا قازاق يننوۆاتسيالىق گۋمانيتارلىق-زاڭ ۋنيۆەرسيتەتى قايراتكەر ءاليحان بوكەيحاننىڭ تۇلعاسىنا, ەل تاريحىنا قۇرمەت رەتىندە ءاليحان بوكەيحان بەينەسىن سەمەيدەگى كوپ قاباتتى ۇيلەردىڭ بىرىنە كوركەم مۋرال تۇرىندە سالۋ باستاماسىن جۇزەگە اسىردى.
ەكى-ءۇش اي دايىندىق جانە ەكى جۇماعا سوزىلعان جۇمىس ناتيجەسىندە كوركەم مۋرال سالۋ جۇمىسى اياقتالدى.
سونىمەن قاتار ۋنيۆەرسيتەت ءوز ەسەبىنەن مۋرال ورنالاسقان كوپقاباتتى ءۇيدىڭ اينالاسىنا جوندەۋ, اباتتاندىرۋ, اۋلاسى مەن كىرە بەرىس جايلارىن جارىقتاندىرۋ جۇمىستارىن جۇرگىزدى.
مۋرال سەمەي قالاسى, شاكارىم داڭعىلى, 15 مەكەنجايى بويىنشا ورنالاسقان كوپقاباتتى تۇرعىن ءۇيدىڭ قابىرعاسىنا سالىندى.
مۋرالدى سۋرەت شەبەرى الەكساندر رومانوۆ سالدى.
ال فوتو سۋرەتتىڭ اۆتورى - جاسۇلان قاسىمبەك.