بىرىككەن ۇلتتار ۇيىمى قىزمەتكەرلەردىڭ ءبىر توبىن ۋاقىتشا الماتىعا كوشىردى. ولار اۋعانستانداعى بۇۇ وتباسىنىڭ جۇمىسىنا ماڭىزدى قولداۋ كورسەتەدى, دەپ جازادى Egemen.kz.
جالپى سانى 100-گە جۋىق ادام بولاتىن بىرىككەن ۇلتتار ۇيىمىنىڭ اۋعانستانعا جاردەمدەسۋ بويىنشا ميسسياسى (موونسا), سونداي-اق بۇۇ اگەنتتىكتەرى, قورلارى مەن باعدارلامالارىنىڭ حالىقارالىق قىزمەتكەرلەرى الماتىدا ۋاقىتشا كەڭسە قۇرادى دەپ جوسپارلانعان.
بۇل شارا بۇۇ-عا اۋعانستان حالقىنا بارىنشا از قاۋىپ-قاتەرمەن ومىرلىك ماڭىزدى كومەك كورسەتۋدى جالعاستىرۋعا مۇمكىندىك بەرەدى, سونىمەن بىرگە بۇۇ قىزمەتكەرلەرىنە تونەتىن قاۋىپتى ازايتادى. جاعداي بىرقالىپتى بولعاننان كەيىن قىزمەتكەرلەر اۋعانستانعا ورالادى.
بۇۇ اۋعان حالقىنا قيىن ۋاقىتتا قولداۋ كورسەتۋگە مىندەتتەلەدى. گۋمانيتارلىق قىزمەتكەرلەردىڭ كوپشىلىگى ميلليونداعان مۇقتاج جانعا ومىرلىك ماڭىزى بار كومەك بەرۋ ءۇشىن اۋعانستاندا قالادى.
الماتى قالاسىنداعى ۋاقىتشا كەڭسە اۋعانستانداعى قاۋىپسىزدىك جاعدايىنا بايلانىستى اۋعانستاندا جانە ودان تىس جەرلەردەگى بۇۇ قىزمەتكەرلەرىنىڭ ۋاقىتشا روتاتسيا ورتالىعى رەتىندە بولا الادى.
«بىرىككەن ۇلتتار ۇيىمى قازاقستان ۇكىمەتىنە موونسا-نىڭ قاشىقتاعى كەڭسەسىن ورنالاستىرۋعا بەرگەن كەلىسىمى ءۇشىن, سونداي-اق كەشە بىرىككەن ۇلتتار ۇيىمىنىڭ اۋعانستانعا جاردەمدەسۋ بويىنشا ميسسياسىنىڭ العاشقى قىزمەتكەرلەرىن الماتىدا قارسى الۋ كەزىندەگى تاماشا ىنتىماقتاستىعى مەن قولداۋى ءۇشىن ۇلكەن ريزاشىلىعىن بىلدىرەدى», دەپ جازدى ۇيىمنىڭ قازاقستانداعى ءباسپاسوز قىزمەتى.