تاليبان اۋعانستاندى تەرروريزم وشاعىنا اينالدىرماۋى كەرەك. بۇل تۋرالى ناتو-نىڭ باس حاتشىسى يەنس ستولتەنبەرگ بريۋسسەلدە وتكەن جوسپاردان تىس وتىرىس قورىتىندىسىنىڭ ءباسپاسوز ءماسليحاتىندا مالىمدەدى, دەپ حابارلايدى Egemen.kz.
ول اۋعانستان ۇلتتىق اسكەرى تەز جەڭىلىسكە ۇشىرايدى دەپ كۇتپەگەنىن ايتتى. ناتو كۇشتەرى كابۋلداعى اۋەجاي جۇمىسىن ءالى باقىلاۋدا ۇستايدى, سەبەبى شەتەلدىك جانە جەرگىلىكتى ارىپتەستەردى كوشىرۋ قاجەت.
«اۋعانستان قارۋلى كۇشتەرىنىڭ ءبىراز بولىگى جان اياماي سوعىستى, بىراق ەلدىڭ قاۋىپسىزدىگىن قامتاماسىز ەتە المادى. سەبەبى اۋعانستاننىڭ ساياسي باسشىلىعى تاليبانعا قارسى شىعا المادى, بەيبىت كەلىسسوزگە قول جەتكىزە المادى. وسى ساتسىزدىكتىڭ سوڭى بۇگىنگى قاسىرەتتى جاعدايعا اكەلدى. ءوزىمىزدىڭ جانە اۋعان ارىپتەستەرىمىزدى كوشىرىپ بولدىق. تاليبان ەلدەن كەتكىسى كەلەتىندەردىڭ بارلىعىنا مۇمكىندىك بەرۋى كەرەك. اۋەجايدى, سونداي-اق جولدار مەن شەكارا بەكەتتەرىن اشۋ قاجەت», دەدى ناتو باس حاتشىسى يەنس ستولتەنبەرگ.