جەلىدە ادام تولىپ وتىرعان ۇشاق بورتىنان سۋرەت جاريالاندى, بۇل ۇشاق امەريكالىق ەۆاكۋاتسيالىق اۋە كەمەسى دەلىنەدى, دەپ حابارلايدى Egemen.kz.
سۋرەتتى پەنتاگوننىڭ ءباسپاسوز قاۋىمداستىعى ۆيتسە-پرەزيدەنتى ماركۋس ۆايسگەربەر تwitter جەلىسىندە جاريالادى. كادر 15 تامىزدا كەشكى ۋاقىتتا تۇسىرىلگەنى ايتىلادى.
سۋرەتتە اۋعانستاننان اقش-قا ۇشاتىن امەريكالىق كولىك ۇشاعىنىڭ سالونى بەينەلەنگەن. باستاپقىدا ادامداردى بۇلايشا بورتقا الۋ جوسپارلانباعانى اتاپ ءوتىلدى, بىراق ەلدەن كەتكىسى كەلەتىن اۋعانداردىڭ اعىنىن توقتاتۋ مۇمكىن بولماپتى. ناتيجەسىندە, ۆايسگەربەردىڭ ايتۋىنشا, ۇشاق سالونىنا شامامەن 640 بوسقىن جينالعان. ەسكە سالايىق, تالىپتەر ەلدەگى بيلىكتى تەز باسىپ الۋىنا بايلانىستى اۋعانستان استاناسى كابۋلدا دۇربەلەڭ بولىپ جاتىر. 16 تامىزدا جۇزدەگەن ادام ەلدەن كەتۋگە تىرىسىپ, كابۋل اۋەجايىنا جينالعان.كەيىنىرەك جۇرت ەلدەن كەتۋگە تىرىسىپ, ۇشاقتىڭ قاپتاماسىنا جابىسىپ جاتقانى تۇسىرىلگەن ۆيدەو پايدا بولدى. باق اۋەجايداعى تارتىپسىزدىك كەزىندە كەم دەگەندە 7 ادام قايتىس بولدى دەپ حابارلايدى. ولاردىڭ قاتارىندا امەريكالىق اۋە كەمەسىنە جارماسقاندار دا بار.