اڭگىمە وزەگى – ەلباسى نۇرسۇلتان ءابىش ۇلى نازارباەۆتىڭ جىلقى جىلى جاريا ەتىلگەن قازاقستان حالقىنا جولداۋى. ەلباسى جولداۋى ەلىمىزدىڭ دامۋىنىڭ ەڭ باستى قۇجاتىنا اينالىپ, قوعامنىڭ جەتەكشى قوزعاۋشى كۇشى بولىپ قالىپتاسقانى, تۇرمىسىمىز بەن ءتىرشىلىگىمىزدىڭ كورنەكتى كورسەتكىشى بولعانى تۋرالى تولعامدارىمىزدى اعا گازەت وقۋشىلارىنىڭ نازارىنا سالىپ, بۇدان بۇرىنعى جولداۋلار تۇسىنداعى اڭگىمەنى جالعاستىرۋ نيەتىندە, ءارى جاڭا جولداۋدىڭ كەيبىر ايرىقشا ەرەكشەلىكتەرىنە دە توقتالۋدىڭ ءجونى كەلىپ تۇر.
ەڭ الدىمەن, جىل سايىنعى ەلباسى جولداۋىنىڭ مەملەكەت ومىرىندەگى ايرىقشا ورنىن, ونىڭ ەل وركەندەۋىندەگى ىقپالدىلىعىن, حالىقتىڭ ءار جىلى جاڭا جولداۋدى كۇتىپ جۇرەتىندىگىن اتاپ ءوتۋ ورىندى بولماق.
اڭگىمە وزەگى – ەلباسى نۇرسۇلتان ءابىش ۇلى نازارباەۆتىڭ جىلقى جىلى جاريا ەتىلگەن قازاقستان حالقىنا جولداۋى. ەلباسى جولداۋى ەلىمىزدىڭ دامۋىنىڭ ەڭ باستى قۇجاتىنا اينالىپ, قوعامنىڭ جەتەكشى قوزعاۋشى كۇشى بولىپ قالىپتاسقانى, تۇرمىسىمىز بەن ءتىرشىلىگىمىزدىڭ كورنەكتى كورسەتكىشى بولعانى تۋرالى تولعامدارىمىزدى اعا گازەت وقۋشىلارىنىڭ نازارىنا سالىپ, بۇدان بۇرىنعى جولداۋلار تۇسىنداعى اڭگىمەنى جالعاستىرۋ نيەتىندە, ءارى جاڭا جولداۋدىڭ كەيبىر ايرىقشا ەرەكشەلىكتەرىنە دە توقتالۋدىڭ ءجونى كەلىپ تۇر.
ەڭ الدىمەن, جىل سايىنعى ەلباسى جولداۋىنىڭ مەملەكەت ومىرىندەگى ايرىقشا ورنىن, ونىڭ ەل وركەندەۋىندەگى ىقپالدىلىعىن, حالىقتىڭ ءار جىلى جاڭا جولداۋدى كۇتىپ جۇرەتىندىگىن اتاپ ءوتۋ ورىندى بولماق.
ەكىنشىدەن, جولداۋ – اتا زاڭىمىز – كونستيتۋتسيانىڭ تالاپتارىن بۇلجىتپاي ورىنداۋ ءتارتىبىن قالىپتاستىرىپ, قۇقىقتىق مەملەكەت ورناتۋدىڭ نەگىزىن قالاۋشى ءبىردەن ءبىر ىرگەلى فاكتورىنا, سونداي-اق ءوركەنيەتتى داستۇرىنە اينالدى.
ۇشىنشىدەن, پرەزيدەنت جولداۋى – حالىق پەن بيلىكتى ءبىر ماقسات, ءبىر مۇددەگە جۇمىلدىرا وتىرىپ, بۇكىل ەلدىڭ ىنتىماعى مەن جاسامپازدىعىن ۇيىمداستىراتىن رۋحاني باستى قۇجات بولىپ, تۇرمىسىمىزعا, ومىرىمىزگە ەندى.
جولداۋ ارقىلى ەلدىڭ ءال-اۋقاتى جاقسارىپ, الەۋەتى كوتەرىلىپ, ءومىرگە, ادامداردىڭ, قوعامنىڭ قارىم-قاتىناستارىنا جاڭا كوزقاراس, جاڭا سانا قالىپتاسا باستادى.
سوندىقتان جىل سايىنعى قازاقستان حالقىنا پرەزيدەنت جولداۋىنىڭ قوعام, مەملەكەت دامۋىنداعى اتقارار ءرولى وتە زور.
ەكونوميكالىق داعدارىس, داعدارىستان شىعا باستاعان العاشقى جىلدار كەزىندە كۇندەلىكتى تۇرمىسىمىزدا مۇقتاجدىق مول بولعانى دا كوپشىلىگىمىزدىڭ ەسىندە. ۋاقىتتىڭ تەزدىگى سونشاما – ءتىپتى قازىر داعدارىستى كورمەگەن, ول تۋرالى حابارى جوق ۇرپاق تا ەسەيىپ, ەڭبەككە ارالاستى. قانداي دا داعدارىس اۋەلى ءومىر ساباعى, تاعىلىم ەكەندىگىن دە ەسكەرگەنىمىز ورىندى بولار. داعدارىس ساباقتارىنان شىعارعان قورىتىندى بولاشاق دامۋعا سەپتىگىن تيگىزەتىنى دە بولادى. سوندىقتان دا سول جىلدارداعى جولداۋلاردى ساراپتاي قالساڭىز – حالىقتىڭ تۇرمىسىنا تىكەلەي مەملەكەتتىك كومەك, اتاپ ايتساق – ماسەلەن, انا مەن بالاعا, مۇگەدەكتەرگە, تۇرمىسى تومەن, اسىراۋشىسى جوق وتباسىلارىنا جاردەماقى سياقتى ماسەلەلەر نەمەسە الەۋمەتتىك نىساندار قۇرىلىسى سياقتى كەمىستىكتەردىڭ ورنىن تولىقتىرۋ ماسەلەلەرى قارالعان. ولار ءوزىنىڭ وڭ ناتيجەلەرىن بەردى. اسىرەسە, سوڭعى ون ەكى جىلدا ەلىمىزدە بۇرىن-سوڭدى بولماعان الەۋمەتتىك جاقسىلىقتار مەن وزگەرىستەرگە قول جەتكىزە الدىق.
استانادا, الماتىدا, وڭىرلەردە سەگىز جۇزگە جۋىق مەكتەپتەر مەن بالاباقشالارى, 450-دەن استام اۋرۋحانالار مەن دارىگەرلىك قىزمەت ورىندارى, تاعى دا باسقا كوپتەگەن الەۋمەتتىك نىساندار مەملەكەت ەسەبىنەن سالىندى. كەڭەس وداعىنىڭ تۇسىنداعى احۋالىمىزدى بىلە بەرمەيتىن جاس ۇرپاق نازارىنا سالىستىرمالى تۇردە ايتار بولساق, ول كەزدە ءاربىر مەكتەپ, اۋرۋحانا كەشەندەرىن سالۋ ءۇشىن ماسكەۋدەگى وداقتىق جوسپارلاۋ كوميتەتىنىڭ كەلىسىمىن, رۇقساتىن الۋ ارقىلى ءار جىلدا ءار وبلىستا مىقتاسا 2-3 مەكتەپ نەمەسە اۋرۋحانا سالۋعا زورعا قول جەتكىزەتىن ەدىك. بۇل – ءبىر عانا باعىتتى ايتقانىمىز. جالپى, بۇكىل الەۋمەتتىك تۇرمىسىمىز ماسكەۋدەگى ورتالىق بيلىكتىڭ قۇزىرىنا بايلانىستى بولدى.
قازىر استانادا سالىنعان مەديتسينالىق كلاستەردى ەسكە الساق تا جەتكىلىكتى. قانشاما جاڭا ءارى ەڭ وزىق الەمدىك تەحنولوگيالارمەن جابدىقتالعان وراسان اۋقىمدى مەديتسينالىق ورتالىقتار ەلگە قىزمەت ەتە باستادى. سونداي-اق, ءاربىر وبلىس ورتالىقتارىندا اشىلعان كارديولوگيالىق اۋرۋحانالاردا ءوز حيرۋرگ ماماندارىمىز تەك ءبىر جىلدا جۇرەك قان تامىرلارىنا وتا جاساۋ ارقىلى ون مىڭ ادامنىڭ ومىرىنە اراشا ءتۇسىپ, امان الىپ قالعانىن دا بۇرىن ارمان بولىپ, بۇگىن قول جەتكىزگەن تاماشا تابىس دەۋىمىزدىڭ ابدەن ءجونى بار. وسى قىسقا عانا ءبىر ۇزىك مىسالدىڭ ءوزى ويلانعان ادامعا تاۋەلسىزدىكتىڭ قادىرى مەن قاسيەتىن كورسەتسە كەرەك.
بۇگىنگى بارلىق رۋحاني ەركىندىگىمىز بەن ورلەۋىمىز, تۇرمىستاعى بارشىلىعىمىز بەن كەلىستىلىگىمىز تۇتاستاي ۇلتتىق, مەملەكەتتىك تاۋەلسىزدىگىمىزدىڭ ناتيجەسى ەكەندىگىن ەسىمىزدەن شىعارماعانىمىز ءجون. سونداي-اق, تاۋەلسىزدىكتىڭ قادىر-قاسيەتىن ەرەكشە قۇرمەتتەۋ ارقىلى سانامىزدىڭ شەكتەۋلىگى مەن توقىراۋشىلىعىنان دا ارىلىپ, ەلگە, جەرگە, وتانعا دەگەن جاۋاپكەرشىلىگىمىز بەن سۇيىسپەنشىلىگىمىز قالىپتاسىپ, ارتا تۇسپەك.
تاۋەلسىزدىك, تاۋەلسىز مەملەكەتتىگىمىز بولماسا بۇگىنگى اڭگىمەنىڭ ءبىرى دە بولمايتىنى حاق.
نۇرسۇلتان ءابىش ۇلىنىڭ كەشەگى جولداۋىنىڭ بۇكىل مازمۇنى, ونىڭ تۇجىرىمدارى مەن ايشىقتاعان ءمىندەتتەرى تۇتاستاي وسىناۋ تاۋەلسىزدىگىمىزدى كوزدىڭ قاراشىعىنداي قورعاپ, ونى ساقتاپ, نىعايتۋ شارالارىنا, دامۋ, ءوسۋ, وركەندەۋ ارقىلى جاھاندىق باسەكەلەستىك پەن قاقتىعىستاردىڭ الاپات تولقىندارىندا قاپى قالماي, توتەپ بەرە الارلىق ءبىلىم, ساۋاتتى ءارى وزىق تەحنولوگيالىق ۇردىستەرگە ساي ءوندىرىس قۇرۋ, ەلدىڭ, وتانىمىزدىڭ قۋاتتىلىعى جولىنداعى رۋحاني بىرلىگىن قامتاماسىز ەتەرلىك ناقتى قادامدار مەن باعدارلامالارعا ارنالعان.
ەلباسىنىڭ مەملەكەتتىك تاۋەلسىزدىگىمىزدىڭ 21 جىلدىعىندا جاريالاعان قازاقستان دامۋىنىڭ 2050 جىلعا دەيىنگى ستراتەگياسى ەلدى ايقىن ماقسات, جارقىن بولاشاققا جۇمىلدىرىپ وتىرعان اسا ماڭىزدى قۇجات. ارينە, ول الدىمەن جاس ۇرپاقتىڭ كەمەل شاعىنا باعىتتالعان وراسان ەڭبەكتى تالاپ ەتەرى دە بەلگىلى. سول دامۋدىڭ جاقسىلىعىن كورسەم دەپ ارمانداۋ اعا ۇرپاققا دا ءتان. مۇنداي ءتۇيسىنۋ مەن سەزىمنىڭ ءوزى دە ەلباسى جولداۋلارىنىڭ رۋحاني قۋاتىن كورسەتسە كەرەك. ياعني, وسى ۇزاق كەزەڭگە ارنالعان ۇلى جوبانىڭ ءوزى ۇرپاقتار ساباقتاستىعىن مەڭزەپ, مەملەكەت تۇراقتىلىعى مەن ۇلت ءوسۋىن دە كومكەرىپ قامتىپ تۇرعانى انىق.
سونىمەن قاتار, «قازاقستان-2050» ستراتەگياسى بۇگىنگى ەڭبەك پەن تىرشىلىكتىڭ ناتيجەلەرىنەن باستالارى دا حاق.
ءوز جولداۋىندا نۇرسۇلتان ءابىش ۇلى ماسەلەنىڭ وسى باعىتىنا ايرىقشا ەكپىن بەردى. جولداۋ وركەنيەت جولىندا جاڭا تەحنولوگيالىق دامۋ بيىكتەرىن يگەرە وتىرىپ, حالىق تۇرمىسى مەن مۇمكىندىگىن جاقسارتۋ, كۇشەيتۋ ارقىلى الەمدەگى ەڭ دامىعان 30 مەملەكەتتىڭ قاتارىنا ەنۋ باعدارلاماسىن ەگجەي-تەگجەيلى بايانداۋعا ارنالدى. جوسپارداعى 40 جىلعا جۋىق مەرزىمدى ەلباسى ەكى كەزەڭگە ءبولدى. ونىڭ ءبىرىنشى كەزەڭى 2030 جىلمەن شەكتەلسە, كەلەسى كەزەڭى 2030-2050 جىلدار ارالىعى بولماق. وسى كەزەڭدەردەن اسۋ جولىندا قازاقستان جەتى بەسجىلدىقتان وتەرى كوزدەلۋدە. ول بەسجىلدىقتاردىڭ ارقايسىسىندا جاھاندىق دامۋ مەن وركەندەۋدىڭ ەڭ ۇزدىك ۇلگىلەرىنە ءبىزدىڭ مەملەكەتىمىزدىڭ, ەلىمىزدىڭ قول جەتكىزۋى – باستى ماقساتىمىز.
بۇل جولداۋدا دا ادەتتەگىدەي كوپتەگەن الەۋمەتتىك جاڭالىقتار, اتاپ ايتقاندا مەملەكەتتىك بيۋدجەتتىڭ قۇزىرىنداعى ءارتۇرلى سالالار قىزمەتكەرلەرىنىڭ جالاقىسىنىڭ, ستۋدەنتتەر ستيپەندياسىنىڭ, مۇگەدەكتەرگە كومەك, قامقورلىق شارالارىنىڭ ساپاسى مەن اۋقىمىن كەڭەيتۋ سياقتى جاقسىلىقتار مەيلىنشە كوزدەلگەن. ءسوز جوق, بۇل سياقتى كوپتەگەن الەۋمەتتىك توپتارعا مەملەكەت تاراپىنان جاسالاتىن قامقورلىق باعىتىنداعى باعدارلامالار كوپتەگەن ادامداردىڭ ەڭسەسىن, كوڭىلىن كوتەرىپ, الەۋەتىن جاقسارتارى دا قوعام دامۋىنا وڭ ىقپالىن تيگىزەدى.
سونىمەن بىرگە, ءوز جولداۋىندا ەلباسى ەلدى ءار ادامعا يگىلىكتى ۇكىمەت, بيلىك, مەملەكەت جاساپ بەرەدى ەكەن دەپ ارقا سۇيەۋشىلىكتەن, كەرەناۋلىقتان, ماسىلدىقتان دا ساقتاندىرادى. ەلىمىزدە قانداي دا تۇرمىس, تىرشىلىك الەۋەتى بۇكىل حالىقتىڭ قاتىناسۋىمەن, قوعامنىڭ بەلسەندىلىگىمەن جاقساراتىنىنا ەكپىن تۇسىرە ايتتى. ءاربىر ادامنىڭ, ءاربىر وتباسىنىڭ ءوز تاعدىرىنا ءوزى بەيجاي قاراماي, زور جاۋاپكەرشىلىكپەن قاراۋىنا پارمەن بەردى.
ءتىپتى, مۇمكىندىگى شەكتەۋلى ادامداردىڭ وزدەرىن السىزدىكتەن, شاراسىزدىقتان, بويكۇيەزدىكتەن, ءۇمىتسىزدىكتەن, سەنىمسىزدىكتەن ارىلىپ, ەڭسەسىن كوتەرىپ, ەڭبەككە ارالاسۋعا شاقىردى. وسى ورايدا بارلىق اتقارۋشى بيلىك بۋىندارىنا, ۇكىمەتكە دە ولاردىڭ قوعامدىق ەڭبەككە ارالاسۋىنا جاعداي تۋعىزۋعا ارنايى تاپسىرما دا بەرىلدى. ويتكەنى, بۇل – ءوركەنيەتتى ەلدەردىڭ تاجىريبەسىندەگى قالىپتاسىپ, ادام قۇقىن, ونىڭ قوعامنىڭ باسقا مۇشەلەرىمەن تەڭ قۇقىقتىعىن قامتاماسىز ەتە الاتىن, كونستيتۋتسيامىزدىڭ تالاپتارىنا ساي قۇقىقتىق كەڭىستىكتىڭ شىنايى جۇمىس ىستەۋ كورىنىسى بولماق. وسى باعىتقا سايكەس, ەلىمىزدە مۇمكىندىگى شەكتەۋلى 400 مىڭنان استام مۇگەدەك ازاماتتاردىڭ قوعامدىق تىرشىلىككە ارالاسۋىن قامتاماسىز ەتۋ ۇكىمەتكە, پارلامەنتكە تاپسىرىلادى. بۇل ورايدا كوپتەگەن ۇكىمەتتىك ەمەس ۇيىمدار مەن مەيىرىمدىلىك قورلارىنىڭ دا اتسالىساتىنىنا سەنىم ءبىلدىرىلدى. وسى ىستە, ارينە, مەملەكەت تاراپىنان نەمەسە ءارتۇرلى قوعامدىق قۇرىلىمدار, بيزنەس تاراپىنان كورسەتىلەتىن قامقورلىق نەمەسە كومەك تەك قانا ءارتۇرلى مەرەكەلەر قارساڭىنداعى سىي-سياپاتپەن شەكتەلمەۋى ءتيىس ەكەندىگىنە دە ءمان بەرىلدى. نەگىزگى قامقورلىق مۇمكىندىگى شەكتەۋلى ازاماتتاردى مەيلىنشە وزدەرىنە لايىق ەڭبەكپەن قامتاماسىز ەتىپ, قوعاممەن ارالاسۋىنا ىقپال ەتۋگە ەكپىن تۇسىرگەنىن دە پرەزيدەنتتىڭ ۇسىنىسى, ءارى تاپسىرماسى دەپ قابىلداعانىمىز ءجون.
مىنە, وسىنىڭ ءبارى ءار ادامنىڭ, قوعامنىڭ, رەسمي ۇكىمەتتىك ورىندار قىزمەتكەرلەرىنىڭ ساناسىن وزگەرتۋى ءتيىس. ياعني, پرەزيدەنت سانا, دۇنيەتانىم باعىتىنداعى ەجەلدەن قاتىپ-سەمىپ قالعان كوزقاراستى تۇبىرىمەن وزگەرتۋگە شاقىرىپ وتىر. بۇل – جاڭا كوزقاراس, مۇنداي كوزقاراس كوپشىلىك قولداۋىنا يە بولارى دا ءسوزسىز.
جالپى, ءار ادامنىڭ دەنساۋلىعىن ساقتاۋ جاۋاپكەرشىلىگى تۋرالى پرەزيدەنت ۇنەمى ايتىپ, ەسكەرىپ كەلەدى. وسى جولداۋدا بۇل ماسەلەگە دە جاڭا سيپات بەرىپ, ەندى تالاپ جاعىنا ەكپىن قوستى. دارىگەرلىك كومەك, اۋرۋحانالار, باسقا دا مەديتسينالىق قىزمەت قاجەتتىگىن ايتا كەلىپ, ءار ادامنىڭ ءوز دەنساۋلىعىنا مەملەكەت تۇرعىسىنان قاراۋعا كەڭەس بەردى. قوعامدا سالاماتتى ءومىر سالتىن قالىپتاستىرۋ ارقىلى ازاماتتاردىڭ دەنساۋلىق ساپاسىن جاڭا ساتىعا, جاڭا ساپاعا كوتەرۋ قاجەتتىلىگىنە زور ءمان بەردى. مەملەكەتىمىزدىڭ ازاماتتارىنىڭ ورتا جاسىن 80 جاسقا جەتكىزۋ كوزدەلەتىنىنە توقتالدى. ارينە, بۇل دۇنيە ءجۇزى ەلدەرىندەگى قازىرگى زامانداعى جوعارى كورسەتكىش. الايدا, بۇعان مۇمكىندىك بار. ەلىمىزدىڭ وركەندەۋى ارقىلى ەلدىڭ تۇرمىس الەۋەتى جىلدان-جىلعا جاقسارىپ كەلەدى. بارلىق جاسالىپ جاتقان شارالار الدىمەن ادام يگىلىگى ءۇشىن ەكەندىگى دە بەلگىلى. دارىگەرلىك كومەك مۇمكىندىگى دە جاڭا ساپاعا يە بولۋدا. بالالار, جاستار باراتىن سپورت كەشەندەرى دە اياسىن كەڭەيتە تۇسۋدە, بۇل باعىتقا بولاشاقتا دا زور ءمان بەرىلەتىن بولادى. سوندىقتان, اسىرەسە, جاستاردىڭ مەكتەپ جاسىنداعى وقۋشىلاردىڭ جاپپاي سپورتپەن ۇنەمى, جۇيەلى تۇردە شۇعىلدانۋى ۇلتتىڭ دەنساۋلىعىن, مۇمكىندىگىن ارتتىرا تۇسەتىنىنە سەنىم مول. ءدال وسى تالاپ تا مەملەكەتتىك قىزمەتكەرلەردىڭ, باسقا قوعامدىق قوزعالىس بەلسەندىلەرىنىڭ اتالمىش پروبلەماعا جاڭا كوزقاراسپەن, ياعني, سانا وزگەرىسىمەن كىرىسۋىنە جول اشادى.
جولداۋدىڭ ءاربىر تياناقتالعان ويى, ۇسىنىسى, تاپسىرماسى, تۇجىرىمداماسى جەكە-جەكە ماقالاعا, ساراپتاپ-تالداۋعا جۇك ەكەنىنە ەشكىمنىڭ كۇمانى بولا قويماس. سوندىقتان, ولاردىڭ ءبارىن جۇمانىڭ تۇنىندە قاعازعا تۇسە قالعان ءبىر ماقالادا قامتۋ ءمۇمكىن بولماعانمەن, كەيبىر قوعام سۇرانىسىنىڭ الدىڭعى شەبىنە بۇگىن شىعىپ تۇرعان جاعدايلارعا توقتالا كەتپەسەك بولماس.
مەنىڭ پايىمداۋىمشا, سونداي ماسەلەلەردىڭ بىرەگەيى – ورتا جانە شاعىن كاسىپكەرلىكتىڭ ورنىعۋى, قوعامعا قىزمەت ەتۋى. ەلباسى بۇل ماسەلەگە ايرىقشا ءمان بەرىپ, ۇكىمەتكە, قۇقىق قورعاۋ ورگاندارىنا, ۇلتتىق بانككە ناقتى تاپسىرما بەردى. ەلىمىزدە 2,4 ميلليونعا جۋىق ادام وسى ورتا جانە شاعىن بيزنەسپەن كۇنەلتەتىنىن دە, وسى سالا ونىمدەرىن تاياۋ جىلداردا جالپى ءونىمنىڭ 50 پايىزعا جەتكىزۋ قاجەتتىگىن دە ايتتى. اسىرەسە, بۇكىل حالىقتىڭ جۇرەگىنە جەتكەنى – نۇرسۇلتان ءابىش ۇلىنىڭ شاعىن جانە ورتا بيزنەستى «وتباسىلىق داستۇرگە» اينالدىرۋ قاجەتتىلىگى. بۇل – ءبىزدىڭ حالقىمىز ءۇشىن تىڭ وي, جاڭا ۇسىنىس, جاڭا سەرپىلىس, جاڭا ماقسات, ۇكىمەتىمىز, بانكتەر, قۇقىق قورعاۋ ورگاندارى ءۇشىن – جاڭا مىندەت. اسىرەسە, قۇقىق قورعاۋ, جەرگىلىكتى اكىمشىلىكتەر سانالارىنا ءسىڭىپ, جايىلىپ, تەرەڭ بويلاپ, ۋلاپ كەتكەن بيۋروكراتتىق, ۇستەمشىلدىك مىنەز-ق ۇلىقتارىنان ارىلىپ, تازارىپ, ەلباسىنىڭ سوزىنە ايرىقشا جاۋاپكەرشىلىكپەن قاراپ, ءتۇسىنىپ, ىسكەرلىككە كومەكتەسۋگە جۇمىس ىستەپ, وسى ماسەلەگە تۋرا ەلباسىنىڭ كوزىمەن قاراۋعا تىرىسقاندارى ءجون بولار ەدى. سوندا وزدەرى دە سەرپىلىپ, ىشتەي تازارىپ, ەلباسىنىڭ تاپسىرماسىنا كەدەرگى بولماي, كەرىسىنشە, شىنايى قولداۋشى بولار ەدى. اۋانىمىز دا بۇلتتاي تورلاعان جەمقورلىقتان سەيىلىپ, قوعامنىڭ تىنىسى كەڭىپ, كاسىپكەرلىكتىڭ تۇساۋلى, شىدەرلى اياقتارى كوسىلىپ, كوپ ەلدىڭ تۇرمىس-الەۋەتى جاقسارىپ قالار ەدى.
بيزنەستى تەكسەرگىشتەر مەن ولارعا سىنىقتان سىلتاۋ تاۋىپ سوقتىققىش اكىمشىلىك قىزمەتكەرلەرى ورتا جانە شاعىن بيزنەس ارقىلى ەلدە جۇمىسسىزدىققا جول بەرمەيتىنىن, سونداي-اق ولاردىڭ ءالى ەشقانداي الپاۋىت, وليگارح ەمەستىگىن, الدىمەن كۇن كورىسىن قامتاماسىز ەتىپ جۇرگەندەرىن ەسكەرە, تۇسىنە الماي جۇرگەندەرىنە تاڭ قالماسقا بولمايدى. مىنە, بۇل دا ءبىزدىڭ مەملەكەتتىك قىزمەتكەرلەردىڭ ساناسىنىڭ جەتىمسىزدىگى, مەملەكەتشىل سانانىڭ ورنىقپاعاندىعى. وسىدان ايىعۋ, ارىلۋ قاجەت. سوندا ولاردىڭ دا, قوعامنىڭ دا دەنى ساۋ بولماق.
جاڭا جولداۋدىڭ بەل ومىرتقاسى – جوعارىدا ايتىلعان ءبىلىم, عىلىم ەكونوميكا, تەحنولوگيا, بيزنەس, كۇندەلىكتى تۇرمىس كورسەتكىشتەرىنىڭ ءبارىنىڭ ساياتىن ەڭ ۇلكەن ارناسى – نۇرسۇلتان نازارباەۆتىڭ «ماڭگىلىك ەل» يدەياسى. ەلباسى بۇل ويىن تۇڭعىش رەت رەسمي تۇردە ەل الدىندا «قازاقستان-2050» ستراتەگياسىندا جاريالاسا دا, ونى ۇزاق جىلدار وي-ساناسىندا تولعاتىپ, جۇرەگىندە تەربەتىپ كەلگەنى ەلگە ءمالىم. وعان دالەل نۇرسۇلتان ءابىش ۇلىنىڭ ەلباسىلىق مەملەكەتتىك قايراتكەرلىگى, مەملەكەت باسىنداعى قىزمەتى ۇستىندە جاريا ەتكەن شىعارماشىلىق ەڭبەكتەرى, دۇنيەجۇزىلىك بۇقارالىق اقپارات قۇرالدارىنا بەرگەن سۇحباتتارى.
ەلباسىنىڭ جىلقى جىلىنداعى جولداۋى «قازاقستان-2050» ستراتەگياسىنىڭ ءارى جالعاسى, ءارى سول ارمانعا جەتۋ بەيبىت جورىعىنىڭ ءبىر ارناسى. قويىلعان مىندەت, ايتىلعان ماقساتتى جيناقتاپ تۇيىندەي كەلە نۇرسۇلتان ءابىش ۇلىنىڭ: «قازاقتىڭ ماڭگىلىك عۇمىرى ۇرپاقتىڭ ماڭگىلىك بولاشاعىن باياندى ەتۋگە ارنالادى.
ەندىگى ۇرپاق – ماڭگىلىك قازاقتىڭ پەرزەنتى. ەندەشە, قازاق ەلىنىڭ ۇلتتىق يدەياسى – ماڭگىلىك ەل!
مەن ماڭگىلىك ەل ۇعىمىن ۇلتىمىزدىڭ ۇلى باعدارى – «قازاقستان-2050» ستراتەگياسىنىڭ ءتۇپ قازىعى ەتىپ الدىم» دەگەن ۇراندى سوزدەرى قانى بار, جانى بار, ساناسى بار ءار قازاقتىڭ, ءار قازاقستاندىقتىڭ جۇرەگىنە جەتەر دەپ ويلايتىن, جىلقى جىلعى اقجولتاي جولداۋ جۇرتشىلىقتى جاپپاي جىگەرلەندىرەدى, سىپىرا سىلكىندىرەدى دەپ سەنەتىن مەن دە ءبىر قازاقپىن.
ەلىمىزدىڭ ماڭگىلىگى ءۇشىن باس تىگە الۋىمىز, ءباس تىگە ءبىلۋىمىز اركىمگە دە زور ابىروي بولسا كەرەك.
جىلقىمەن جانى جاراسقان قازاقتىڭ تۇلپارى, الاشتىڭ ارعىماعى جال-قۇيرىعى جەلكىلدەپ الەمدىك بايگەدە وزا شاۋىپ جۇرگەي.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى,
«نۇر وتان» پارتياسى ساياسي كەڭەسىنىڭ بيۋرو مۇشەسى.