قازاقستان تاۋەلسىزدىگىنىڭ 30 جىلدىعىنا وراي قر اقپارات جانە قوعامدىق دامۋ مينيسترلىگىنىڭ باستاماسىمەن «Balapan» تەلەارناسىنىڭ جانىنان «ەرەكشە ءبىلىم الۋ قاجەتتىلىكتەرى بار بالالارعا ارنالعان انيماتسيا مەكتەبى» العاشقى تۇلەكتەرىن ۇشىردى, دەپ جازادى Egemen.kz قر اقپارات جانە قوعامدىق دامۋ مينيسترلىگىنىڭ سايتىنا سىلتەمە جاساپ.
2021 جىلدىڭ ناۋرىز ايىندا باستالعان جوبانىڭ التى ايلىق وقۋ كۋرسىن ارنايى ىرىكتەۋدەن وتكەن 30 قاتىسۋشى ءساتتى ءتامامداپ, ارنايى سەرتيفيكاتتارمەن ماراپاتتالدى.
وقۋ كۋرسى اقىسىز نەگىزدە, جەكە انيماتسيالىق ستۋديالاردىڭ اتسالىسۋىمەن قايىرىمدىلىق جوبا رەتىندە جۇزەگە اسىرىلدى. بالالاردى وقۋعا قاجەت ارنايى پلانشەتتەر مەن وزگە دە تەحنيكالىق قۇرالدارمەن «Qazaqstan» تەلەكورپوراتسياسى قامتاماسىز ەتكەن.
مينيسترلىكتىڭ باستاماسىمەن بالالارعا ساپالى ءبىلىم بەرۋ ماقساتىندا حالىقارالىق بايلانىستار ورناتىلدى. وڭتۇستىك كورەيانىڭ مۋلتيپليكاتسيالىق فيلمدەردى ناسيحاتتاۋ اگەنتتىگىمەن ىنتىماقتاستىق مەموراندۋمىنا قول قويىلىپ, كەلىسىم جاسالدى. ناتيجەسىندە وڭتۇستىك كورەيا مەن جاپونيانىڭ ۇزدىك مۋلتيپليكاتور ماماندارى انيماتسيا مەكتەبىنىڭ قاتىسۋشىلارىنا ونلاين ءدارىس وقىپ, شەبەرلىك ساباقتارىن وتكىزدى.
ەرەكشە ءبىلىم الۋ قاجەتتىلىكتەرى بار بالالارعا بولاشاقتا ماماندىعىنا اينالاتىن كاسىپتى ۇيرەتۋ ارقىلى جاڭا مۇمكىندىك سىيلاۋ, ەرەكشە بالالاردى الەۋمەتتىك بەيىمدەۋگە جاردەمدەسۋ جانە ولاردىڭ بوس ۋاقىتىن ءتيىمدى وتكىزۋدى ۇيىمداستىرۋ ماقساتىندا قۇرىلعان مەكتەپتىڭ العاشقى تۇلەكتەرى قازاقستاننىڭ ءتۇرلى ايماعىندا تۇراتىن 14-16 جاس ارالىعىنداعى دارىندى بالالار. وقۋ باعدارلاماسى ونلاين فورماتتا, ارنايى ساباق كەستەسىنە ساي جۇرگىزىلگەن.
وقۋشىلار العاشقى ايدا «انيماتسيا نەگىزدەرى» تاقىرىبىنداعى جالپى دارىسكە قاتىسىپ, انيماتسيا سالاسىمەن تانىستى. كەيىن قىزىعۋشىلىعى مەن بەيىمىنە, مۇمكىندىگىنە قاراي 2D اnimation, 3D اnimation جانە Stop Motion توپتارىنا ءبولىنىپ, ءبىلىم الدى.
ءساتتى جۇزەگە اسىرىلعان جوباعا قاتىسۋعا وتىنىمدەردىڭ ءالى دە تولاستاماۋىنا بايلانىستى انيماتسيا مەكتەبىنىڭ جۇمىسىن تۇراقتى تۇردە جالعاستىرۋ جوسپارلانىپ وتىر.