الماتىدا پتر ناتيجەلەرىن قولدان جاساپ ساتقان مەديتسينا ۋنيۆەرسيتەتىنىڭ ستۋدەنتى جاۋاپكەرشىلىككە تارتىلدى, دەپ حابارلايدى Egemen.kz Polisia.kz-كە سىلتەمە جاساپ.
جەدەل-ىزدەستىرۋ شارالارى ناتيجەسىندە جەكە مەديتسينالىق ورتالىقتىڭ ەگۋ بولمەسىندە مەديتسينالىق قىزمەتكەر بولىپ جۇمىس ىستەيتىن 25 جاستاعى ح. ەسىمدى مەديتسينا ۋنيۆەرسيتەتىنىڭ ستۋدەنتى ۇستالدى.
«بىزگە كەلىپ تۇسكەن جەدەل اقپاراتتى ءبىز بىرنەشە كۇن بويى تەكسەردىك. ناتيجەسىندە, بۇل اقپارات راستالدى. كۇدىكتى ءوز قىزمەتىن 20 مىڭ تەڭگەگە باعالاعان. اتالعان فاكت بىرىڭعاي سوت الدى تەرگەۋ رەەسترىنە قر قك 385-بابى 1-تارماعى بويىنشا تىركەلىپ, قىلمىستىق ءىس قوزعالدى. ءوز كىناسىن تولىق مويىنداپ وتىرعان ح. ەسىمدى ازامات تەك قانا ءبىر رەت جالعان پتر ناتيجەسىن جاساعانىن العا تارتىپ وتىر. تەرگەۋ بارىسىندا ونىڭ قانشا ادامعا جالعان قۇجات دايىنداپ بەرگەندىگىن انىقتايتىن بولامىز», دەپ مالىمدەدى الماتى قالاسى پد-ءنىڭ كريمينالدىق پوليتسيا باسقارماسىنىڭ باستىعى قۋاتبەك ناۋاتوۆ.