10 تامىزدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اباي قۇنانباەۆتىڭ تۋعان كۇنىنە وراي «ادامزاتتىڭ ءبارىن ءسۇي, باۋىرىم دەپ» اتتى ونلاين-كونتسەرت ۇيىمداستىرىلىپ, ونىڭ اياسىندا «اباي مەرەيتويى» كىتابىنىڭ تۇساۋى كەسىلدى.
شارا فورماتى – ءدارىس-كونتسەرت. ماقساتى – الىس-جاقىن شەتەلدەگى قانداستارىمىزعا اباي مۇراتىنىڭ تاۋەلسىزدىكپەن بايلانىستى ەكەنىن بايىپتاتۋ.
ءىس-شاراعا «اباي مەرەيتويى» كىتابىنىڭ اۆتورى, تاريح عىلىمدارىنىڭ دوكتورى, اكادەميك, قازاقستان تاريحشىلارى ۇلتتىق كونگرەسىنىڭ توراعاسى ەرلان سىدىقوۆ, «وتانداستار» قورىنىڭ ۆيتسە-پرەزيدەنتى ماعاۋيا قاناپيا ۇلى, پروفەسسورلار شاكىر يبراەۆ پەن سەرىك نەگيموۆ, گەرمانياداعى Deutsch-Kasachische Gesellschaft گەرمانيا-قازاقستان قوعامىنىڭ جەتەكشىسى گالينا نۇرتازينا, يران, تۇركيا, رەسەي جانە موڭعولياداعى قازاق قوعامدىق بىرلەستىكتەرىنىڭ وكىلدەرى, قازاقستاننىڭ ەڭبەك سىڭىرگەن ءارتىسى كەنجەعالي مىرجىقباي, سونداي-اق وزگە دە وتاندىق ونەر قايراتكەرلەرى قاتىستى.
−اباي بىزگە قاجەت ەكەنىن سوڭعى كەزدەردە سەزىنە باستادىق. تەك قازاق قوعامى ەمەس, بۇكىل دۇنيە سەزىنە باستادى. ويتكەنى الەمدەگى قىم-قيعاش ساياسات, قوعامدىق ۇردىستەر, نەگىزگى قۇندىلىقتارعا نۇقسان كەلتىرىپ, كوپ جاعدايداعى پروگرەستىڭ ءوزى كەرى اسەر ەتىپ, ۇرپاق تاربيەلەۋدە كەمشىلىكتەر كوبەيىپ كەتتى. وسى تۇرعىدا ءبارىمىز ءوز ابايىمىزدى ىزدەي باستادىق, – دەدى اكادەميك ەرلان سىدىقوۆ.
سونداي-اق اباي جىلىندا 200-گە جۋىق ءىس-شارا وتكەنىن, ونىڭ نەگىزىندە ەۇۋ-دىڭ مۇرىندىق بولۋىمەن وتكەندىگىن, سونىڭ ءبىرى پرەزيدەنت قاسىم-جومارت توقاەۆتىڭ تاپسىرماسىمەن ەۇۋ-دا قۇرىلعان «اباي اكادەمياسى» ەكەندىگىن باسا ايتتى.
– اباي جىلىندا جيىرمادان استام زەرتتەۋ كىتاپ شىعارىلدى, «اباي اكادەمياسىنىڭ» بەرەرى كوپ ءالى, وسىمەن توقتاپ قالمايدى. ابايدىڭ تويى ءبىر كۇندە, ءبىر جىلدا ءبىتىپ قالاتىن توي ەمەس, بىزگە ساباق بولۋى ءتيىس, – دەدى ەرلان ءباتتاش ۇلى.
كەلەسى كەزەكتە ءسوز العان «وتانداستار» قورىنىڭ ۆيتسە-پرەزيدەنتى ماعاۋيا قاناپيا ۇلى ابايدىڭ الەمدىك دەڭگەيدەگى تۇلعا ەكەنىنە توقتالا كەلىپ, وسىنداي شارالار قازاق ءتىلىن, مادەنيەتىمىزدى دامىتۋعا سۇبەلى ۇلەس قوساتىنىن جەتكىزدى.
– بىلتىر اباي جىلى مەملەكەتتىك دەڭگەيدە وتە اۋقىمدى اتالىپ ءوتتى. «وتانداستار» قورى دا ءوز تاراپىنان اتسالىسىپ, ونلاين-كونتسەرتتەر, كونفەرەنتسيالار مەن شىعارماشىلىق سايىستار ۇيىمداستىردى. شەتەلدەگى قانداستارىمىز دا قىزىعۋشىلىقپەن قاتىسىپ, العىستارىن ءالى كۇنگە دەيىن ءبىلدىرىپ جاتىر, – دەدى ماعاۋيا قاناپيا ۇلى.
ايتا كەتكەن ءجون, كىتاپقا ABAI TV تەلەارناسىنىڭ اشىلۋى, عىلىمي كونفەرەنتسيالار مەن سيمپوزيۋمدار, مەرەيتويلىق مونەتالار مەن ماركالار, شەتەلدەردەگى اباي ەسكەرتكىشتەرى, ساياباقتار, كوشەلەر مەن مادەني-اقپاراتتىق ورتالىقتارىنىڭ اشىلۋى سىندى مەرەيتوي جىلىندا اتقارىلعان ماڭىزدى وقيعالار ەنگەن. اقىننىڭ جاپون, كورەي, تۇرىك, اعىلشىن, قىرعىز, پورتۋگال, اراب, يتاليان, قىتاي جانە الەمنىڭ باسقا دا كوپتەگەن تىلدەرىندەگى اۋدارىلعان شىعارمالارى مەن ماتەريالدار بولەك جاريالانباق.
سونداي-اق كىتاپ-البومنان اباي شىعارمالارى مەن ابايتانۋ بويىنشا ەڭبەكتەرى بار بارلىق باسىلىمداردىڭ بيبليوگرافيالىق كورسەتكىشىن تابۋعا بولادى.
ۇلى اقىننىڭ تۋعان كۇنىنە ارنالعان شارانى ەۇۋ-دىڭ الەۋمەتتىك-مادەني دامۋ جونىندەگى پرورەكتورى, ۇعا اكادەميگى ديحان قامزابەك ۇلى قورىتىندىلادى.
«ەگەمەن-اقپارات»