سەنات دەپۋتاتتارى مۇحتار جۇماعازيەۆ پەن باۋىرجان قانيەۆ اقتوبە وبلىسىنىڭ ىرعىز جانە شالقار اۋداندارىنا باردى, دەپ حابارلادى جوعارعى پالاتانىڭ ءباسپاسوز قىزمەتى.
ساپار بارىسىندا سەناتورلار جەرگىلىكتى شارۋالارمەن جانە اگروونەركاسىپ سالاسىندا ەڭبەك ەتىپ جۇرگەن ماماندارمەن كەزدەستى.
ولار ىرعىز اۋدانىنىڭ قۇمتوعاي اۋىلىندا قوي شارۋاشىلىعىمەن, جىلقى, ءىرى قارا وسىرۋمەن اينالىساتىن شارۋا قوجالىقتارىنىڭ الداعى قىسقا جەمشوپ دايىنداۋ بارىسىمەن تانىستى. شارۋالارمەن كەزدەسۋلەردە اۋىل شارۋاشىلىعى مەن كاسىپكەرلىكتىڭ وزەكتى ماسەلەلەرىن شەشۋ جولدارى تالقىلاندى. ءوز سوزىندە مۇحتار جۇماعازيەۆ فەرمەرلەر ءۇشىن مال دارىگەرلەرىنىڭ تاپشىلىعى جانە ساپالى ۆەتەرينارلىق كومەك الۋ ماسەلەسى ءالى دە وزەكتى بولىپ وتىرعانىن ايتتى.
سونداي-اق دەپۋتاتتار شالقار اۋدانىنىڭ جىلتىر اۋىلىندا سالىنىپ جاتقان دارىگەرلىك امبۋلاتوريانىڭ قۇرىلىس بارىسىمەن تانىستى. ولار شولەيتتەنۋگە قارسى كۇرەسۋ جانە قۇمداردىڭ قوزعالىسىن توقتاتۋ ءۇشىن سەكسەۋىل كوشەتتەرىن وتىرعىزۋمەن اينالىساتىن ورمان شارۋاشىلىعى مەكەمەسىنە دە باردى. سەناتور باۋىرجان قانيەۆ ءوڭىردىڭ ەكوجۇيەسىن جاقسارتۋ ءۇشىن مۇنداي ءىس-شارالاردىڭ ماڭىزدى ەكەنىن اتاپ ءوتتى.
ودان بولەك سەناتورلار شالقار قالاسىنىڭ ميكروكليماتىن قالىپتاستىراتىن شالقار كولىنىڭ قازىرگى احۋالىن تالقىلاۋ ءۇشىن مەردىگەر كومپانيانىڭ وكىلدەرىمەن كەزدەسىپ, بيىل ءساۋىر ايىندا باستالعان كولدىڭ تابانىن تازارتۋ جۇمىستارىمەن تانىستى.