كەشە, قاڭتاردىڭ 17-ءسى كۇنى ءۇش جىلدان بەرى ايلىقتارىن الا الماي جۇرگەن ءبىر توپ جۇمىسشى ورتالىق الاڭعا شىقتى. بۇل تۋرالى Ras. kz حابارلادى.
«قىزىلوردالىق ءبىر توپ جۇمىسشى, مەكتەپتى بيۋدجەتتەن بولىنگەن قاراجاتقا ەمەس, نەسيەگە سالدىق, دەپ الاڭعا شىقتى», – دەلىنگەن حابارلامادا.
بەلگىلى بولعانداي, بۇدان ۇش جىل بۇرىن ارال اۋدانىنا قاراستى سازدى اۋىلىندا مەكتەپ سالعان 300-گە جۋىق جۇمىسشى مەن 10 كاسىپكەر ءالى كۇنگە دەيىن ايلىقتارىن تولىق الا الماعان كورىنەدى. «مەملەكەتتىڭ وزدەرىنە بەرەشەگىن 55 ميلليون تەڭگەگە بالاپ وتىرعان نارازى توپ «قوماقتى قاراجات ۇشتى-كۇيلى جوق بولىپ كەتتى» دەپ قاپالى», – دەدى ارنا ءتىلشىسى.
راسىندا دا ولار سازدى اۋىلىندا 140 ورىندىق مەكتەپ قۇرىلىسىن جۇرگىزگەن. ءتىپتى, قازىنا كارجىسىمەن قابىرعاسى قالانعان مەكەمە قۇرىلىسىن مەجەلەنگەن مەرزىمىنەن بۇرىن وتكىزىپتى. الايدا, ءالى كۇنگە ايلىقتارىن تولىق الا الماعان. مەردىگەر مەكەمە كەيبىر كاسىپكەرمەن ەسەپ ايىرىسۋ ءۇشىن بانكتەن نەسيە دە العان كورىنەدى. «تەك ول سوما قارىزدان قۇتقارمادى», – دەيدى ولار.
«سازدى مەكتەبىندە ەكسكاۆاتور تراكتورىمدى جالعا العان. سودان 2009-دان بەرى 2 ملن. 200 مىڭ تەڭگەمىزدى ءالى الا الماي ءجۇرمىز. 4 جىل بولدى», – دەدى تەحنيكانى جالعا بەرۋشى مەكەمە وكىلى تەمىرحان ماحانوۆ.
جۇمىسشىلاردىڭ ايتۋىنشا, مەملەكەتتىك تاپسىرىسپەن قۇرىلىسى جۇرگەن مەكتەپتى تامامداۋعا 10 كاسىپكەر مەن 300-گە جۋىق جۇمىسشى جۇمىلا كىرىسكەن. ءتىپتى, الىس اۋدانعا بارار جولدىڭ جوقتىعى دا جۇمىستارىنا كەدەرگى كەلتىرمەپتى, جولاي اۋىلعا اپارار جول سالعان, اۋىز سۋ ءۇشىن, قۇدىق قازىپتى. تەك بۇل ەرەن ەڭبەك ەلەنبەدى, جەمە-جەمگە كەلگەندە, قازىنادان بولىنگەن تيەسىلى تەڭگەدەن قاعىلىپ قالعان.
«ءبىز 55 ميلليون تەڭگەنى الا الماي وتىرمىز. ونىڭ تولىپ جاتكان سەبەپتەرى بار, بۇل بويىنشا وبلىستىق قارجى پوليتسياسى قىلمىستىق كودەكستىڭ 325-بابى 2-بولىگىمەن قىلمىستىق ءىس تە قوزعاعان», – دەدى مەردىگەر كومپانيانىڭ ديرەكتورى ابىلاي قاليلاەۆ.
بىراق قوزعالعان قوس قىلمىستىق ءىس تە قىسقارتىلعان. سەبەبىن تۇسىندىرمەدى دەيدى نارازى توپ. قازىر مەردىگەر مەكەمە باسشىسىنىڭ قولىندا ءبىر-بىرىنەن اۋمايتىن, ءبىر كۇندە شىعارىلعان قوس قۇجات بار. ايىرماشىلىعى – بيۋدجەتتەن بولىنگەن سومانىڭ الشاقتىعى عانا. بىراق ءبىر كۇندە شىعارىلعان ءبىر بۇيرىقتاعى سانداردىڭ ءسال عانا تۇزەتىلۋى قۇرىلىسشىلاردى قوماقتى قارجىدان قاققان. ال وبلىستىق اكىمدىكتەگىلەر, مەردىگەر مەكەمە سانداعى بۇل سايكەسسىزدىكتى سوت ارقىلى دالەلدەي الاتىن بولسا, شىعىندى وتەۋگە ءازىرمىز دەپ وتىر.
«ەگەر سوت دالەلدەپ, 346 ميلليون ەمەس 384 ميلليون تەڭگە دەپ دالەلدەپ بەرىپ جاتسا, بىزگە ەشقانداي قيىنشىلىق تۋىپ تۇرعان جوق. وندا مىندەتتى تۇردە وبلىستىق بيۋدجەتتەن قاراستىرىپ بەرۋگە دايىنبىز», – دەدى وبلىس اكىمىنىڭ ورىنباسارى نۇرجان الىباەۆ.
ال نارازى توپ ماسەلە قاڭتاردىڭ اياعىنا دەيىن شەشىلمەسە, ناقتى قادامدارعا باراتىندارىن ايتىپ وتىر. مەملەكەتتىك تاپسىرىسپەن مەكتەپ سالىپ, ءۇش جىلدان بەرى جالاقىلارىن الا الماي جۇرگەن جۇمىسشىلار توبى ۇكىمەت ەندى ۇندەمەسە, وندا ماسەلەمىزدى حالىقارالىق دەڭگەيدە كوتەرەمىز دەيدى.
حاميت مۇستافا.
دەرەككوز: Ras.kz
فوتو: Ras.kz.