بەلگىلى دەموگراف ومىردەن وزدى

ە.مۇسابەك 1946  جىلى  جامبىل وبلىسىنىڭ  شوقپار  ستانتسياسىندا  دۇنيەگە  كەلگەن. 1970  جىلى  اباي  اتىنداعى  قازاق  پەداگوگيكا  ينستيتۋتىن  ماتەماتيكا  ماماندىعى  بويىنشا  ۇزدىك بىتىرگەن. ەڭبەك  جولىن  1963  جىلى  قازاق  تەمىر  جولى №34  جول  بولىمىندە  تەمىر  جول  جۇمىسشىسى  بولىپ باستاعان.  25  جىلدان  استام  ۋاقىت  قازاق  كسر مەمجوسپار  كوميتەتىنىڭ  ەسەپتەۋ  ورتالىعىندا قىزمەت  ىستەدى. حالىق  شارۋاشىلىعىن  جەتىلدىرۋدى جوسپارلاۋ جۇمىستارىنا سىڭىرگەن قوماقتى ۇلەسى ءۇشىن 1977 جىلى «حالىق شارۋاشىلىعىن جوسپارلاۋ ۇزدىگى» دەگەن بەلگىسىمەن ماراپاتتالعان.

ەربولات  نىعىمان ۇلى  مەملەكەتتىك  ستاتيستيكا  ورگاندارىندا  1997  جىلدان  باستاپ  جۇمىس  ىستەدى. 1971  جىلدان  بەرى دەموگرافيالىق زەرتتەۋلەرمەن, ءار ءتۇرلى دەموگرافيالىق  ەسەپتەۋلەردىڭ  باعدارلامالىق  جاساقتاماسىن  ازىرلەۋمەن  جانە  ونى  جۇرگىزۋمەن اينالىستى. ول  تالاي  حالىقارالىق  سەمينارلار مەن  جوبالارعا  قاتىستى.  20-دان  استام جاريالانىمى  بار. كەلۋشىلەر  ءادىسى بويىنشا  «حالىق  كوشى-قونى»,  «جانباسىلىق  حالىق تىركەلىمى»  كەشەندەرىن  جاساپ,  جەتىلدىرىپ,  اكىمشىلىك-اۋماقتىق  نىساندار  جىكتەۋىشىن  قۇراستىرىپ,  ونى ۆەدومستۆولىق,  كەيىن  مەملەكەتتىك جانە ۇلتتىق جىكتەۋىش رەتىندە قولدانىسقا ەنگىزدى. 

سونىمەن قاتار  قازاقستانداعى  العاشقى مۋلتي-ينديكاتورلىق  كلاستەرلىك  زەرتتەۋدى  (ميكز) باسقارىپ,  بۇل  زەرتتەۋدىڭ  دەرەكتەر  بازاسىن قۇراستىردى  جانە  كەيىنگى  ميكز-لەردى  جۇرگىزۋگە, قورىتىندىلارىن شىعارۋعا بەلسەنە اتسالىستى. 2009 جىلى ۇلتتىق حالىق ساناعىنىڭ قورىتىندىسىن شىعارۋ كەزىندە ايانباي ەڭبەك  ەتتى. سونداي-اق ە.مۇسابەك ەلىمىزدە ەكى رەت جارىق كورگەن «قازاقستاننىڭ  ەتنودەموگرافيالىق جىلنامالىعىنىڭ»  اۆتورى.  2009  جىلى قىرعىزستانداعى  حالىق  ساناعىنىڭ  كەڭەسشىسى  قىزمەتىن اتقاردى. 2007-2011 جىلدارى  قازاقستاننىڭ  دەموگرافتار قاۋىمداستىعىنىڭ پرەزيدەنتى بودى.

مەملەكەتكە سىڭىرگەن ەڭبەگى, بەلسەندى قوعامدىق قىزمەتى  جانە  ەلدىڭ  الەۋمەتتىك-ەكونوميكالىق دامۋىنا  قوسقان  ۇلەسى  ءۇشىن  2005  جانە 2016 جىلى ەكى مارتە  قازاقستان پرەزيدەنتىنىڭ «قۇرمەت» گراموتاسىمەن  ماراپاتتالدى. 

جوعارى كاسىبيلىگى جانە قازاقستاننىڭ مەملەكەتتىك ستاتيستيكاسىن جەتىلدىرۋگە قوسقان زور ۇلەسى ءۇشىن 2005 جىلى «قازاقستان ستاتيستيكاسىنىڭ ۇزدىگى» اتاعى جانە «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسى بەرىلدى. 2011 جىلى «قۇرمەت» وردەنىمەن جانە «قازاقستان رەسپۋبليكاسىنىڭ تاۋەلسىزدىگىنە 20 جىل» مەرەيتويلىق مەدالىمەن, 2014 جىلى «ەڭبەك ارداگەرى» مەدالىمەن جانە «ستاتيستيكا ۇزدىگى» توسبەلگىسىمەن, 2015 جىلى «قازاقستان حالقى اسسامبلەياسىنا 20 جىل» مەرەيتويلىق مەدالىمەن, 2016 جىلى «يۋنيسەف-كە 70 جىل» مەرەيتويلىق مەدالىمەن, 2021 جىلى 75 جىلدىق مەرەيتويىنا العىس حاتتارمەن ماراپاتتالعان.

ەربولات نىعىمان ۇلى قازاقستاننىڭ بەلگىلى دەموگرافى, ەڭبەك سىڭىرگەن قايراتكەرى, ءوز ءىسىنىڭ شەبەرى جانە تالانتتى ادام ەدى. ونىڭ بارلىق ەڭبەگى قازاقستاننىڭ دەموگرافيانسىن دامىتۋعا جانە قالىپتاستىرۋعا باعىتتالدى جانە ونىڭ جۇمىستارى تمد ەلدەرىندە دە كەڭىنەن تانىمال بولدى. 

«ەربولات نىعىمان ۇلىنىڭ دەموگرافيالىق عىلىم مەن دەموگرافيالىق تالداۋدىڭ دامۋىنا قوسقان ۇلەسى باعا جەتپەس. مارقۇمنىڭ جارقىن بەينەسى ءبىزدىڭ ەسىمىزدە ماڭگى ساقتالادى! ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسى مارقۇمنىڭ ارىپتەستەرىنە, تۋعان-تۋىستارىنا, جاقىندارىنا قايعىرىپ كوڭىل ايتادى», دەدى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ.