سەنبى كۇنى كەشكە قاراي تاليبان اۋعانستاننىڭ سولتۇستىگىندەگى مازاري-شاريف قالاسىن باسىپ الدى, دەيدى جەرگىلىكتى شەنەۋنىكتەر. بۇل تۋرالى Egemen.kz ۆۆس-گە سىلتەمە جاساپ حابارلايدى.
بۇعان دەيىن مازاري-شاريف قالاسى تاليبانعا قارسى تۇرا الاتىن قالا بولىپ ەسەپتەلدى. قالاعا ماڭىزدى اسكەري كۇش شوعىرلاندى.
قالانىڭ تەز جەڭىلىپ قالۋى كۇتپەگەن جاعداي بولدى.
كابۋلداعى شەتەلدىك تىلشىلەردىڭ حابارلاۋىنشا, كابۋل مەن ءبىر-بىرىنەن اجىراتىلعان قارسىلاسۋ ورتالىقتارىن قوسپاعاندا, ءىرى قالالاردان كورشىلەس نانگارحار پروۆينتسياسىنىڭ استاناسى مەن ورتالىعى دجالالاباد عانا قالدى.
ەكى كۇن بۇرىن اۋعانستان پرەزيدەنتى اشراف عاني اسكەر كوڭىلىن كوتەرۋ ءۇشىن مازاري-شاريفكە بارعان ەدى. كەزدەسۋىندە عاني حالقىنا ۇندەۋ جولداپ, بيلىك اقساقالدار مەن ساياسي كوشباسشىلارمەن, اۋعان قوعامىنداعى ءار ءتۇرلى توپ وكىلدەرىمەن جانە حالىقارالىق سەرىكتەستەرمەن كەڭەسىپ جاتقانىن ايتتى.
«مەن ءسىزدىڭ پرەزيدەنتىڭىز رەتىندە تۇراقتىلىقتى ساقتاپ, زورلىق-زومبىلىقتى جانە حالقىمنىڭ قونىس اۋدارۋىن بولدىرماۋعا تىرىسامىن», دەپ قوستى ول.
بۇعان دەيىن عانيدىڭ وتستاۆكاعا كەتەتىنى تۋرالى قاۋەسەت تاراعان, بىراق ولاي بولمادى. كەيبىر مالىمەتتەرگە سايكەس, پرەزيدەنت قىزمەتىنەن كەتپەيىنشە, تاليباندار بەيبىت كەلىسسوزدەرگە قاتىسۋدان باس تارتىپ وتىر.
سەنبى كۇنى تاليبان سودىرلارى ەلدىڭ شىعىسىنداعى تاعى ەكى پروۆينتسيانىڭ استاناسى پاكتيكا مەن كۋناردى باسىپ الدى. كابۋلدان وڭتۇستىك-باتىسقا قاراي 40 شاقىرىم جەردە, مايدان ۆارداك پروۆينتسياسىنىڭ ورتالىعى مايدان شارانىڭ ماڭىندا دا شايقاستار ءجۇرىپ جاتىر.
جەرگىلىكتى ءجۋرناليستىڭ ايتۋىنشا, اقش اسكەرلەرى جۇما كۇنى تاليبان باقىلاۋىنا العان كانداگار پروۆينتسياسىنىڭ حالىقارالىق اۋەجايىنا اۋە شابۋىلىن باستادى.
سودىرلار قازىردىڭ وزىندە اۋعانستانداعى 34 پروۆينتسيانىڭ كوپشىلىگىنىڭ اكىمشىلىك ورتالىعىن باسىپ الدى.