اۋستراليادا دەلتا شتامىنىڭ تەز تارالۋىنا بايلانىستى كارانتيندىك تالاپتار كۇشەيتىلىپ جاتىر. سيدنەيدە وقشاۋلاۋ ەرەجەلەرىنىڭ ساقتالۋىن قامتاماسىز ەتۋ ءۇشىن قوسىمشا اسكەري قىزمەتشىلەر شاقىرىلماق.
اۋستراليانىڭ استاناسى كانبەررا قالاسىندا سەيسەنبىدە جەرگىلىكتى تۇرعىننىڭ ۆيرۋس جۇقتىرعانى انىقتالعاننان كەيىن شاھاردا ءبىر اپتالىق لوكداۋن جاريالاندى. كانبەررا سيدنەيدەن وڭتۇستىك-باتىسقا قاراي 260 كم قاشىقتىقتا ورنالاسقان. سوندىقتان جەرگىلىكتى بيلىك قاۋىپتى ىندەتتىڭ تارالۋى كۇشەيىپ كەتۋىنەن قاۋىپتەنىپ وتىر.
وسىلايشا, اۋستراليا ەكى ءىرى قالادا – سيدنەي مەن مەلبۋرندە قاتاڭ كارانتيندىك شەكتەۋلەر ەنگىزدى. بۇل قادام دەلتا شتامىنىڭ بۇدان ءارى تارالۋىنا توسقاۋىل بولۋعا ءتيىس.
قورعانىس ءمينيسترىنىڭ وكىلى پيتەر داتتون Reuters-كە بەرگەن سۇحباتىندا New South Wales شتاتىنىڭ بيلىگى جاقىن ارادا رەسمي تۇردە قوسىمشا اسكەري قولداۋ سۇرايتىنىن ايتتى.
قازىرگى تاڭدا 580-گە جۋىق اسكەري قىزمەتشى اۋستراليانىڭ حالىق ەڭ كوپ قونىستانعان قالاسى سيدنەيدە كارانتيندىك تالاپتاردىڭ ساقتالۋىن قامتاماسىز ەتۋ ءۇشىن پوليتسياعا كومەكتەسىپ ءجۇر.
شتات شەنەۋنىكتەرى الىستا ورنالاسقان بىرنەشە قالادا ۆيرۋستىڭ تارالۋى باقىلاۋدان شىعىپ كەتۋى مۇمكىن دەپ قاۋىپتەنەدى. سوعان بايلانىستى جەدەل تۇردە كارانتين ەنگىزدى.
سيدنەيدە لوكداۋن جاريالانعانىنا جەتى اپتا وتكەنىنە قاراماستان, كۇندەلىكتى ينفەكتسيا جۇقتىرعاندار سانى رەكوردتىق دەڭگەيدەن تۇسپەي تۇر. قالا ماڭىنداعى ءۇش اۋداندا لوكداۋن ەرەجەلەرى كۇشەيتىلدى. سوعان سايكەس ادامداردىڭ ۇيلەرىنەن 5 كم قاشىقتىققا بارۋى شەكتەلگەن.