جاستار – ۇلت ءۇمىتىن ارقالاعان ەل ەرتەڭى. ءۇمىت پەن سەنىمدى اقتاۋ سول بۋىننىڭ پارىزى. سول سەبەپتەن دە جاستار قازىرگى قوعامنىڭ جەتەكشى كۇشى رەتىندە ەلىمىزدىڭ دامۋى ءۇشىن جاۋاپتى ەكەنى ءمالىم. ەلىمىزدىڭ تاريحى مەن مادەنيەتىنىڭ تاعدىرى, دامۋى مەن مودەرنيزاتسيالانۋى, جالپى بۇگىنى مەن ەرتەڭى دە جاستارعا بايلانىستى. جاستار قاي زاماندا, قاي ەلدە بولماسىن, اسقاق ارمان مەن ءۇمىت, بيىك ار مەن ءور نامىستىڭ سيمۆولى بولعان.
جاستار – بولاشاقتىڭ جارقىن ايناسى ىسپەتتى. بۇل ءسوزدىڭ ماعىناسىنا ۇڭىلسەك, «ەڭبەك» دەگەن ۇعىممەن بايلانىسىپ جاتقانىن ۇعاسىز. «ەڭبەكتىڭ نانى ءتاتتى» دەپ بەكەر ايتىلماسا كەرەك. قاي سالانى الساق تا, مەرەيىن ۇستەم ەتكەن ۇكىلى ازاماتتار اششى تەرىن سىعۋمەن بيىكتەرگە جەتكەن. ماسەلەن, ونەر سالاسىندا بەتكەۇستار قابىلەتتى دە قارىمدى ديماش قۇدايبەرگەنوۆتىڭ ءبىر ءوزى توبە ەمەس پە؟! ول – قىتاي ەلىندە ۇيىمداستىرىلعان حالىقارالىق Im a singer بايقاۋىنىڭ جەڭىمپازى. سونىمەن قاتار ەرجان ماكسيم, دانەليا تۇلەشوۆا سىندى مىقتى ءانشى بالاپاندار ۇلكەن ساحنالاردى باعىندىرىپ, جارىستاردان ولجالى ورالدى. «نوۆايا ۆولنا – 2021» بايقاۋىندا جان ماكيم ۇلىمىز قازاق ەلىنىڭ كوك تۋىن اسپاندا قالىقتاتىپ كەلدى. Junior Eurovision 2020 بايقاۋىندا تاعى ءبىر جەرلەسىمىز قاراقات باشانوۆا 2-ورىندى يەلەندى. ۆيتەبسكتە وتكەن «سلاۆيانسكي بازار» حالىقارالىق فەستيۆالىنىڭ گران-پري جۇلدەسىن تالدىقورعاندىق جەرلەسىمىز, ءانشى رۋحيا بايدۇكەنوۆا جەڭىپ الدى. كەيبىر قاتىسۋشىلار ءۇشىن بۇل شىنىمەن قيىن سىناق بولىپ شىقتى. سوعان قاراماستان ۇزدىكتەردىڭ ۇزدىگى بولىپ, سۋىرىلا شىققان رۋحيانى جەڭىسىمەن شىن جۇرەكتەن قۇتتىقتاي وتىرىپ, ونەرىنىڭ ۇشتالا بەرۋىن تىلەيمىز!
توكيودا وتكەن وليمپيادا ويىندارىندا قازاقستان حالقىنىڭ اتىن شىعارىپ, قولا جۇلدەگەرى اتانعان اۋىر اتلەت يگور سون 2015 جىلى جەتىسۋ تورىندە وتكەن الماتى وبلىسى اكىمىنىڭ «كوشباسشى» جاستار سىيلىعىنىڭ «ۇزدىك جاس سپورتشى» نوميناتسياسىن, سونداي-اق گرەك-ريم كۇرەسىنەن ازيا چەمپيونى دەمەۋ جادىراەۆ 2017 جىلى «ۇزدىك جاس سپورتشى» نوميناتسياسىن يەلەنگەن. تاعى ءبىر ماقتاۋلى جەرلەسىمىز, نازارباەۆ زياتكەرلىك مەكتەبىنىڭ 12-سىنىپ وقۋشىسى, الەم بويىنشا 55 مىڭ ۇمىتكەردىڭ ىشىنەن توپ جارىپ, گارۆارد ۋنيۆەرسيتەتىنىڭ وقۋ گرانتىنا يە بولعان سەزىم ەرتاناتوۆ بار. ول ءوزىنىڭ ارمان-ماقساتتارىنا ەڭبەك پەن ءبىلىمنىڭ ارقاسىندا قول جەتكىزدى. ەلىمىزدىڭ ەرتەڭى, مەملەكەتىمىزدىڭ جارقىن بولاشاعى ءبىلىمدى دە, بىلگىر جاستاردىڭ قولىندا. جەتىسۋلىق جاستارىمىزدىڭ جەتكەن جەتىستىكتەرى مۇنىمەن عانا شەكتەلمەيدى.
بۇگىندە جاستار قوعامنىڭ قوزعاۋشى كۇشى رەتىندە وزىق يدەيالارىمەن قارۋلانىپ, ەلىمىزدىڭ دامىپ, وركەندەۋىنە بارشا ۇلەس قوسىپ كەلەدى. الماتى وبلىسىنىڭ اكىمى اماندىق باتالوۆتىڭ باستاماسىمەن اۋدانداردا جاستارعا قىزمەت كورسەتۋ ورتالىقتارىنا ارنالعان مەكەمەلەر بوي كوتەرمەك. الماتى وبلىسىنىڭ اۋداندىق جانە قالالىق ءماسليحاتتارىندا 65 جاس حالىق اتىنان داۋىس بەرسە, وبلىستىق ماسليحاتتاعى 37 دەپۋتاتتىڭ التاۋى – جاستار. ياعني بارلىعى 71 جاس دەپۋتاتىمىز بار. وسىنى ەسكەرە وتىرىپ, جاستارمەن تۇراقتى تۇردە بايلانىس جاساپ, تۇيتكىلدى ماسەلەلەرىنىڭ شەشىمىن تابۋعا ۇلەس قوساتىن «وبلىستىق جاس دەپۋتاتتار» ليگاسى قۇرىلدى.
ەلىمىز ەگەمەندىك العاننان كۇنى بۇگىنگە دەيىن وڭىردەگى بالالار ۇيىنەن 1541 تۇلەك شىققان ەكەن. ولارمەن تىعىز بايلانىستا بولىپ, قوعامدا ءوز ورنىن تابۋعا, تۇلعالىق دامۋىنا قولداۋ كورسەتۋ – وزەكتى ماسەلەنىڭ ءبىرى. بۇل رەتتە ءبىز «الماتى وبلىسىنىڭ بالالار ءۇيى تۇلەكتەرىنىڭ» قاۋىمداستىعىن قۇرۋدى ءجون كوردىك. قاۋىمداستىق ماقساتى بالالار ۇيىندەگى جانە پوستينتەرناتتىق ءومىردى قاداعالاۋعا, بالالار ۇيىنەن شىققان تۇلەكتەردى جۇمىسپەن قامتۋعا جانە پسيلوگيالىق قولداۋ كورسەتۋگە باعىتتالعان.
تاعى ءبىر ايتۋلى جوبا جاستاردىڭ بوس ۋاقىتىن ءتيىمدى ۇيلەستىرۋ, مارگينال جانە NEET ساناتىنداعى جاستارمەن جۇمىس جۇرگىزۋ جانە جاستاردى الەۋمەتتەندىرۋ باعىتىنا نەگىزدەلگەن. ياعني Namys جوباسى اياسىندا تانىمال سپورتشىلارمەن كەزدەسۋلەر, شەبەرلىك ساعاتتارى ۇيىمداستىرىلدى. شاراعا مارگينال, دەۆيانتتى, جۇمىسسىز جاستار جانە قانداستار قاتىستى. «جەتىسۋ جايدارمان» ليگاسى وبلىس اۋماعىندا 7 مىڭ جاستى قامتىپ, ءار ايماقتاعى كوڭىلدى تاپقىرلاردىڭ باسىن قوستى. ناتيجەسىندە, رەسپۋبليكالىق ليگالاردا شامامەن 30 كوماندا ونەر كورسەتەدى دەپ كۇتىلۋدە.
مەملەكەت باسشىسى قاسىم-جومارت توقاەۆتىڭ «تاۋەلسىزدىك بارىنەن قىمبات» ماقالاسىندا ايتىلعانداي, «تاۋەلسىزدىك ۇرپاقتارى» گرانتىن تاعايىنداۋ تۋرالى قاۋلى قابىلداعان. جوبا اياسىندا مەملەكەت تاراپىنان سان ءتۇرلى سالادا دارىندى جاستارعا گرانتتار بەرىلەدى. يگى ءىس وبلىسىمىزدا دا جالعاسىن تاپپاق. «جاس عالىم» جوباسى ءوڭىر جاستارىنىڭ عىلىمي الەۋەتىن ارتتىرۋعا, جاس كاسىكەرلەردىڭ تۇلعالىق جانە كاسىبي دامۋىنا سەپتىگىن تيگىزەدى. عىلىمي جوبالاردىڭ بايقاۋىنا الماتى وبلىسىنىڭ عىلىمي تانىمى مەن قىزىعۋشىلىعى بار كەز كەلگەن جاستارى قاتىسا الادى. ال «جاس تالانت» – ونەر بايقاۋى. وڭىردەگى شىعارماشىل جاستاردى ىرىكتەپ قانا قويماي, ءتۇرلى مادەني باعىتتارعا قىزىعۋشىلىعى بار جاستاردى قولداۋ ارقىلى وڭدى قوعامدىق پىكىرلەرىن قالىپتاستىرۋعا ۇلەس قوسادى.
بۇگىندە الماتى وبلىسىنىڭ جاستارعا قىزمەت كورسەتۋ ورتالىعىنىڭ جانىنان «مەيىرىمدى جەتىسۋ» وبلىستىق فرونت-ءوفيسى رەسمي تۇردە اشىلىپ, ازاماتتاردى ۆولونتەرلىككە تارتۋ, كومەككە مۇقتاج جاندارعا الەۋمەتتىك كومەك كورسەتۋ ماقساتىندا جۇمىستار اتقارىلىپ جاتىر. 17 اۋدان مەن 3 قالادا وڭىرلىك فرونت-وفيستەردىڭ قىزمەتكەرلەرى ۆولونتەرلەردى كوبىرەك تارتۋ ءۇشىن بەلسەندى ۇگىت-ناسيحات قىزمەتىن جۇرگىزەدى. وبلىستىڭ ۆولونتەرلىك توپتارى جۇدىرىقتاي جۇمىلىپ, پاندەميا ءورشىپ تۇرعان كەزدە دەمەۋشىلەردى تارتۋ ارقىلى 30 مىڭ وتباسىعا ءارتۇرلى كومەك كورسەتتى, 100 مىڭ دانادان استام بەتپەردە تاراتتى, 9 مىڭ شاماسىندا قايىرىمدىلىق اكتسيالارىن ۇيىمداستىردى. ناتيجەسىندە, وبلىسىمىزدىڭ بەلسەندى 15 ۆولونتەرى ەل پرەزيدەنتى ق.توقاەۆتىڭ «حالىق العىسى» مەدالىمەن ماراپاتتالدى.
بيىل تاۋەلسىزدىكتىڭ 30 جىلدىعى اياسىندا «قايىرىمدى ىستەر مارافونى» جالپىۇلتتىق جوباسى جۇزەگە اسىرىلىپ جاتىر. جوبا اياسىندا ازاماتتاردى قايىرىمدىلىق جاساۋعا تارتۋ, ۆولونتەرلىكتى دامىتۋ ماقساتىندا ءارتۇرلى اقپاراتتىق ناسيحات جۇمىستارى جۇرگىزىلدى. وسى ورايدا جىل باسىنان ەرىكتىلەر ۇيىمدارىنىڭ سانى ۇلعايىپ, 95 بىرلىكتى قۇرادى, 7 مىڭ ەرىكتى تىركەلدى. جاستاردىڭ باستامالارىن قولداۋعا ارنالعان مەملەكەتتىك الەۋمەتتىك تاپسىرىس كولەمى 2 ەسەگە كوبەيتىلىپ, 2021 جىلى 76 ملن تەڭگە ءبولىندى. مەملەكەت باسشىسى ايقىنداعان ەرىكتىلىكتىڭ جەتى باعىتى جانە «قايىرىمدى ىستەر مارافونى» اياسىندا وبلىستا 1 216 اكتسيا وتكىزىلدى. مۇقتاج بولعان 75 وتباسى باسپانالى بولىپ, 9 مىڭ وتباسىنا 170 ملن تەڭگەنىڭ ازىق-ت ۇلىك سەبەتتەرى تاراتىلدى. «بىرگەمىز. تازا الەم» جوباسى اياسىندا 50 مىڭ ادامنىڭ قاتىسۋىمەن 134 ەكولوگيالىق اكتسيا ۇيىمداستىرىلىپ, 41,8 مىڭ ءتۇپ اعاش وتىرعىزىلدى. «Egov – جارشىسى» جوباسى اياسىندا 100 ەرىكتى وزىنە-ءوزى قىزمەت كورسەتۋ بۇرىشتارىندا تۇرعىندارعا قىزمەت كورسەتتى. بۇل ىستەردىڭ بارلىعى جاستاردىڭ الەۋەتىن كوتەرۋگە, باستامالارىن دامىتۋعا جانە جاڭا باعىتتارعا جول سىلتەۋگە ارنالادى.
ەلدار ساپاروۆ,
وبلىستىق جاستار ساياساتى باسقارماسىنىڭ باسشىسى