پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ «اشىق ديالوگ» سۇحباتىنىڭ كەزەكتى سانىندا جامبىل وبلىسىنىڭ اكىمى بەردىبەك ساپارباەۆتىڭ سوگىس الۋىنا قاتىستى پىكىر ءبىلدىردى, دەپ حابارلايدى Egemen.kz.
«فورمالدى تۇرعىدان الساق, شەنەۋنىكتى جاڭا قىزمەتكە تاعايىنداۋ بويىنشا ەشقانداي پروبلەما بولماعان شىعار. ءبارى زاڭ نۇسقاعان جولمەن ىستەلگەن دە بولۋى كەرەك. بىراق مەملەكەتتىك قىزمەت قۇرعاق زاڭعا عانا نەگىزدەلمەيدى. سونىمەن قاتار ەتيكا, قوعامعا قىزمەت ەتۋ دە ونىڭ مىندەتىنە كىرەدى. .
ەگەر قاتەلەسپەسەم, قازاقستاندا 100 مىڭعا جۋىق مەملەكەتتىك قىزمەتشى بار. ونىڭ ءبارىن پرەزيدەنت قىزمەتتەن بوساتىپ جاتقان جوق قوي, وعان كەلىسەتىن شىعارسىز. بۇل ەرەكشە جاعداي», دەپ ءتۇسىندىردى داۋرەن اباەۆ.
ونىڭ پايىمىنشا, پرەزيدەنت قابىلداعان بۇل شەشىمنىڭ رەسمي جاعىنان بولەك, سيمۆولدىق ءمانى بار.
«بۇل – بيلىك پەن قوعامنىڭ ورەسكەل ىستەر بويىنشا ىنتىماقتاستا بولا الاتىنىنىڭ كورىنىسى. مۇنى ءاربىر اكىم, ءاربىر مينيستر ءتۇسىنۋى ءتيىس. بۇل جۇمىستان بوساتىلعان شەنەۋنىك جامان باسقارما باستىعى بولار ەدى دەگەن ءسوز ەمەس. جوق. بۇل جەردە بيلىكتىڭ بەدەلى, بيلىك پەن قوعامدىق سەنىم تۋرالى ايتىلىپ وتىرسا كەرەك. سەنىم بولماسا, بيلىكتىڭ جۇمىسى دا مۇمكىن ەمەس. مەملەكەتتىك اپپاراتتىڭ مۇنى ەستۋى ماڭىزدى دەپ ويلايمىن», دەپ اتاپ ءوتتى داۋرەن اباەۆ.