قاراعاندى قالاسىنىڭ 54 جاستاعى تۇرعىنى وساكاروۆ اۋدانى پيونەر اۋىلدىق وكرۋگى اكىمىنىڭ ۇستىنەن پوليتسياعا ارىز بەرگەن. تۇرعىن شەنەۋنىككە ۇردى دەپ ايىپ تاققان, دەپ حابارلايدى Egemen.kz.
ارىزدانۋشى قاراعاندى قالاسىنىڭ وڭتۇستىك-شىعىس پوليتسيا بولىمىنە جۇگىنگەن. ونىڭ ايتۋىنشا, ونىمەن شەنەۋنىك اراسىنداعى جانجال شاحتەرلەر داڭعىلىنداعى ءۇيدىڭ كىرەبەرىسى ماڭىندا بولعان. جابىرلەنۋشى دەنە جاراقاتىن العانىن ايتتى.
سوت-مەديتسينالىق ساراپتاما قورىتىندىسىنا سايكەس, ءوتىنىش بەرۋشىنىڭ دەنساۋلىعىنا جەڭىل زيان كەلتىرىلگەن. بۇل وقيعاعا پوليتسيا پىكىر ءبىلدىردى.«دەرەك بويىنشا پوليتسيا قىزمەتكەرلەرى وساكاروۆ اۋدانىنىڭ 49 جاستاعى تۇرعىنىن انىقتادى. ەر ادامعا قاتىستى قر اقبك-ءنىڭ 73-1-بابى «دەنساۋلىققا قاساقانا جەڭىل زيان كەلتىرۋ» بويىنشا اكىمشىلىك حاتتاما تولتىرىلدى», دەدى قاراعاندى وبلىسى پد ءباسپاسوز قىزمەتىندەگىلەر.
سونداي-اق جاعدايعا قاتىستى مەملەكەتتىك قىزمەتكەردىڭ ادەپ جونىندەگى ۋاكىلى, وساكاروۆ اۋدانى اكىمىنىڭ ورىنباسارى نۇرلان لامبەكوۆ تە پىكىر ءبىلدىردى. ول قازىرگى ۋاقىتتا پيونەر اۋىلدىق وكرۋگىنىڭ اكىمى دەمالىستا ەكەنىن ايتتى.
«ول 1 قىركۇيەككە دەيىن دەمالىستا. بۇل وقيعانىڭ ءمان-جايىن بىلمەيمىز. ول جۇمىسقا شىققان بويدا ارنايى تەكسەرۋ جۇرگىزەمىز. بىلۋىمىزشە, ءوتىنىش بەرۋشى ونىڭ تۋىسى. بۇل تۇرمىستىق جانجال شىعار, مۇمكىن ولار تاتۋلاسادى. قالاي بولعاندا دا, سوت شەشىمىن كۇتەمىز. ول دەمالىستا جۇرگەندە ءبىز ەشتەڭە ىستەي المايمىز», دەدى نۇرلان لامبەكوۆ.