سەناتورلار نۇرتورە ءجۇسىپ پەن دينار نوكەتاەۆا قازاقستاننىڭ ۇلتتىق مەملەكەتتىك كىتاپ پالاتاسىندا بولدى, دەپ حابارلادى سەناتتىڭ ءباسپاسوز قىزمەتى.
دەپۋتاتتار مەكەمە ۇجىمىمەن كەزدەسۋ بارىسىندا 2020 جىلى تاۋەلسىزدىك كۇنى قارساڭىندا پالاتادا اشىلعان سيرەك كىتاپتار مەن باسىلىمدار مۇراجايىن كوردى. وندا الاش زيالىلارىنىڭ جۇمىستارى مەن ءجۇز جىلدىق تاريحى بار ەكسپوناتتار قويىلعان بولاتىن. سەناتورلارعا پالاتا مۇراعاتىندا ساقتالعان كىتاپ قورىنىڭ جاي-كۇيى, سونداي-اق سالاداعى شەشۋدى تالاپ ەتەتىن پروبلەمالار تۋرالى ايتىلدى.
سەناتور دينار نوكەتاەۆا سوڭعى جىلدارى مامان-بيبليوگرافتاردى دايارلايتىن جالعىز جوعارى وقۋ ورنى – قازاق ۇلتتىق قىزدار پەداگوگيكالىق ۋنيۆەرسيتەتىنە مەملەكەتتىك گرانتتار بولىنبەيتىنىن اتاپ ءوتتى. «سونىڭ ناتيجەسىندە بىرنەشە گرانتتىق ورىندى رەكتور عانا ءبولىپ كەلەدى. قالعان ستۋدەنتتەر اقىلى نەگىزدە وقۋعا ءماجبۇر بولىپ وتىر. وسىعان بايلانىستى سالا ماماندارىن دايارلاۋ ءۇشىن گرانتتار ءبولۋ ماسەلەسىن شەشۋ قاجەت», دەدى ول.
سەناتور نۇرتورە ءجۇسىپ ءوز كەزەگىندە قازاق جاستارىنىڭ ساۋاتتى جانە رۋحاني دامۋى ءۇشىن الەۋمەتتىك ماسەلەلەردى شەشۋمەن قاتار, جەتكىنشەك ۇرپاقتى رۋحاني بايىتۋعا دا نازار اۋدارۋ ماڭىزدى ەكەنىن اتاپ ءوتتى. «اتاپ ايتقاندا, كوركەم شىعارمالاردىڭ تيراجىن ۇلعايتۋ قاجەت. ەگەر بۇرىن مادەنيەت سالاسى «قالدىق ەسەبىنەن» قارجىلاندىرىلعان بولسا, قازىر ولاي ەمەس. باسپاگەرلەر بۇرىنعى كەڭەستىك كەزەڭدەگى جيناقتاردى قايتا باسىپ شىعارۋدى توقتاتىپ, زامان تالابىنا سايكەس جاڭاشا جازاتىن زاماناۋي اۆتورلاردىڭ شىعارمالارىن جاريالاۋ ماڭىزدى. بۇل, اسىرەسە, بالالار ادەبيەتىنە قاتىستى», دەدى سەناتور.
دەپۋتاتتار, سونىمەن قاتار سەناتتىڭ وتكەن سەسسياداعى قىزمەتىنىڭ ناتيجەلەرى, قازاقستاندىقتاردىڭ ءومىرىن جاقسارتۋ جونىندەگى قابىلدانعان زاڭدار تۋرالى, سونداي-اق سەناتورلاردىڭ سەسسيا بارىسىندا كوتەرگەن وزەكتى ماسەلەلەرى, ونىڭ ىشىندە كىتاپحانا سالاسى قىزمەتكەرلەرىنىڭ جالاقىسىن كوتەرۋگە قاتىستى ساۋالدار تۋرالى ايتتى. سەناتورلار وسى كەزدەسۋ بارىسىندا ايتىلعان بارلىق پروبلەمالاردى باقىلاۋعا الىپ, ولاردى شەشۋگە جاۋاپتى مەملەكەتتىك ورگاندار الدىندا كوتەرۋگە نيەتتەنىپ وتىر.