شىمكەنت قالاسىنداعى «وڭتۇستىك» ارنايى ەكونوميكالىق ايماعىندا تاعى ءبىر جاڭا كاسىپورىن اشىلماق. وتكەن اپتاداعى ينۆەستيتسيالىق شتابتا جاڭا جوبا تانىستىرىلىپ, نەگىزگى ماسەلەلەر تالقىلاندى, دەپ حابارلايدى Egemen.kz.
«تاراز-INTERSERCO» جشس اياق كيىم شىعارۋدى قولعا الدى. جاڭا كاسىپورىن ءۇشىن ارنايى ايماقتان 1 گەكتار جەر بەرىلدى. جوبانىڭ ينۆەستيتسيالىق قۇنى - 400 ميلليون تەڭگەنى قۇرادى. كاسىپورىن جىلىنا 150 مىڭ اياق كيىم تىگۋدى جوسپارلاپ وتىر. شىعارىلعان ءونىم ىشكى نارىقتى تولىعىمەن قامتيتىن بولادى.
جاڭادان ىسكە قوسىلاتىن كاسىپورىن 60 ادامدى جۇمىسپەن قامتىماق. بۇگىنگى تاڭدا ينۆەستور تاراپىنان بارلىق قاجەتتى قۇرال-جابدىقتار الىنعان. ۆەتنامدىق كاسىپكەرلەرمەن سەرىكتەستىك ورناتۋ ماقساتىندى قۇجاتتاردى راسىمدەۋ جۇمىستارى جۇرگىزىلۋدە.
شتابتا جەر مەن ينفراقۇرىلىم, ەكونوميكالىق ايماقتىڭ جەڭىلدىكتەرىن ۇيىمداستىرۋ باعىتىندا مەملەكەتتىك قولداۋ كورسەتۋ جونىندەگى شەشىم قابىلداندى.