وبلىستىق سانيتارلىق-ەپيدەميالىق باقىلاۋ دەپارتامەنتى ءباسپاسوز قىزمەتىنىڭ اقپاراتىنا سۇيەنسەك, 27 شىلدەدە قازاقستان-رەسەي شەكاراسىنداعى «قۇرمانعازى» بەكەتى ارقىلى 216 ادام وتكەن. مەملەكەتتىك شەكارادان وتكەندەردىڭ اراسىندا 32 جولاۋشى مەن حالىقارالىق جۇك تاسىمالدارىن جۇزەگە اسىراتىن 184 جۇرگىزۋشى بار.
«انىقتاماسىز كەلگەن قازاقستان رەسپۋبليكاسىنىڭ 6 ازاماتىنان الىنعان كوروناۆيرۋس ينفەكتسياسىنا قارسى پتر-تەست زەرتتەۋى تەرىس ناتيجە كورسەتتى. ال بىلتىرعى 6 قازاننان بەرى اتىراۋ وبلىسىنا 56 996 ادام, ونىڭ ىشىندە 8 577 جاياۋ جۇرگىنشى, 48 419 جۇرگىزۋشى كەلدى. وبلىس اۋماعىنا كىرۋگە انىقتاماسىز كەلگەن 355 شەتەل ازاماتىنا تىيىم سالىندى. سونداي-اق قازاقستاننىڭ 4 757 ازاماتىنا پتر-تەستىلەۋ جۇرگىزىلدى. ونىڭ ىشىندە 54 ازاماتتان (49 جۇرگىزۋشى, 5 جولاۋشى) COVID-19-دىڭ بەلگىسى تابىلدى», دەپ حابارلادى دەپارتامەنتتىڭ ءباسپاسوز قىزمەتى.
كارانتيندىك شەكتەۋ شارالارىنىڭ كۇشەيتىلۋىنە بايلانىستى اتىراۋ قالاسى مەن اۋداندار اكىمدەرىنىڭ وكىمىمەن 64 ءموبيلدى توپ قۇرىلعان. قازىر ءموبيلدى توپتار كارانتيندىك شەكتەۋ شارالارىنىڭ ساقتالۋىنا مونيتورينگ جۇرگىزىپ كەلەدى. ءموبيلدى توپتار قۇرامىندا پوليتسيانىڭ, «اتامەكەن» ۇكپ وڭىرلىك فيليالى مەن اكىمدىكتەردىڭ وكىلدەرى بار. ماسەلەن, بيىلعى 1 قاڭتار مەن 29 شىلدە ارالىعىندا 10 976 رەيد وتكىزىلىپ, 44 777 نىسان تەكسەرىلدى. ءموبيلدى توپتاردان قۇقىق بۇزۋشىلىققا قاتىستى 620 ماتەريال ءتۇستى. كارانتين تالابىن ەلەمەگەن شاعىن جانە ورتا بيزنەس نىساندارىنا, جەكە تۇلعالارعا قۇقىق بۇزۋشىلىق تۋرالى كودەكستىڭ 425-بابىنىڭ 1-بولىگىمەن 423 ايىپپۇل سالىنىپتى.
دەگەنمەن ايىپپۇلعا ايىلىن جيمايتىندار توي وتكىزۋدى توقتاتار ەمەس. وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنە جۇگىنەر بولساق, يساتاي اۋدانىندا 7 ءموبيلدى توپ مۇشەلەرى ءارتۇرلى ءىس-شارا, توي تۇرىندەگى باسقوسۋ وتكىزگەن 15 دەرەك تىركەلىپتى. ناقتىسىن ايتقاندا, «لوتو كلۋب» كەڭسەسى مەن 14 تۇرعىن ۇيدە توي-دۋمان وتكىزىلگەن. ال قىزىلقوعا اۋدانىندا 6 ءىس-شارا مەن 4 توي وتكەنى انىقتالدى. اتىراۋ قالاسىنا تاياۋ ورنالاسقان دامبى اۋىلدىق وكرۋگىندە 1 تامىزدا ساعات 19.00 شاماسىندا «ادينا» مەيرامحاناسىندا ءوتىپ جاتقان ۇيلەنۋ تويى توقتاتىلدى.
ءتىپتى بىرنەشە رەت ايىپپۇل تولەگەن كاراوكە-باردىڭ كۇزەتشىسى مونيتورينگ توبىنىڭ مۇشەسىنە قول كوتەردى. مۇنايلى شاھارداعى ەمحانانىڭ ەكى مەدبيكەسى جالعان ۆاكتسينا پاسپورتىن جاساۋمەن اينالىسىپ كەلگەن. جارعا جىعار جالعان ىسكە بەل بۋعان مەدبيكەلەر پوليتسيا دەپارتامەنتى مەن وبلىستىق پروكۋراتۋرا قىزمەتكەرلەرىنىڭ بىرلەسكەن جەدەل ءىس-شاراسى كەزىندە ۇستالدى. قۋ قۇلقىن ءۇشىن ارانى اشىلعان مەدبيكەلەر ۆاكتسينانىڭ ءار كومپونەنتىنە 50 مىڭ تەڭگە, ەكى كومپونەنت ءۇشىن 100 مىڭ تەڭگەنى بانكتىك ەسەپشوتىنا اۋدارتىپ وتىرعان. اقشاسىن اۋدارعان تۇرعىندار ەمحاناعا كەلىپ, ۆاكتسينا سالدىرماسا دا ۆاكتسينا پاسپورتىن الىپ جۇرگەن. مەدبيكەنىڭ ءبىرى جالعان اقپاراتتى جۇيەگە ەنگىزىپ, ەكىنشىسى ۆاكتسينا سۇيىقتىعىن قۇيتىرقى ارەكەتپەن پاتسيەنتكە ەكپەگەنى انىقتالدى.
اتىراۋ وبلىسى