قازاقستاننىڭ تاۋەلسىزدىكتىڭ وتىز جىلىندا اتقارعان ءىسى مەن جەتكەن جەتىستىگى از ەمەس. قاي سالانى الىپ قاراساق تا, ەگەمەندىك العانعا دەيىنگى ۋاقىتپەن سالىستىرساق, ىلگەرىلەۋ مەن دامۋدىڭ داڭعىل جولىندا ەكەنى ءسوزسىز. مەرەيتوي قارساڭىندا ولاردى جۇيەلەپ حالىققا ۇسىنعان «حابار» تەلەارناسى تاريحي دەرەكتەر مەن ايماقتار تۋرالى اقپاراتتى ەكى ءتۇرلى جوباعا بىرىكتىرگەن ەكەن. «تۋعان ايماق» پەن «تاريح ساباقتارى» انيماتسيالىق روليكتەرى وڭىرلەردىڭ تىنىس-تىرشىلىگى مەن تاۋەلسىزدىك جىلدارى بولعان باستى وقيعالار تۋرالى سىر شەرتەدى.
«تاريح ساباقتارى» دەگەن اتاۋمەن جارىق كورگەن 15 وقيعانىڭ ىشىنەن تاۋەلسىزدىكتىڭ نىشانىنا اينالعان قازاقستان رەسپۋبليكاسىنىڭ مەملەكەتتىك رامىزدەرى تۋرالى روليككە بىردەن كوزىمىز ءتۇستى. 1992 جىلدىڭ باسىندا ەلتاڭبا, تۋ, ءانۇراننىڭ جوبالارىن دايىنداۋعا بايقاۋ جاريالانعانىن بىلگەنىمىزبەن, ول تۋرالى جاستار اراسىندا جانە وتباسىمىزدا كوپ ايتا بەرمەيمىز. تاريحي وقيعالاردى قايتا ەسىمىزگە سالعان بۇل جوبانىڭ ماڭىزى جاستار ءۇشىن ءتىپتى وراسان. انيماتسيا ارقىلى بەرىلگەن بەينەلەر جاستار مەن بالالاردىڭ نازارىن بىردەن اۋداراتىنى ءسوزسىز.
سونىمەن, بايقاۋعا قاتىسۋشىلاردان مىڭنان استام ۇسىنىس كەلىپ تۇسكەن. ءوز جۇمىسىن جىبەرگەندەر اراسىندا قازاقستاندىقتار عانا ەمەس, شەتەل ازاماتتارى دا بولعان ەكەن. الايدا ولاردىڭ كوپشىلىگى سىننان وتە الماعان. مەملەكەتتىك تۋدىڭ ۇلگىسىن جاساۋعا وتاندىق ايگىلى شاكەن نيازبەكوۆ كىرىسەدى. قازىر بارشامىز بىلەتىن كوك جەلەكتى تۋىمىز بىردەن وسىنداي قالىپتا بولعان جوق. العاشىندا تۋدا قىزىل ءتۇس قولدانىلعان. كەيىنىرەك ونى التىن ءتۇس الماستىرعان. ودان بولەك كۇن مەن قىراندى تۋدىڭ قاق ورتاسىنا ورنالاستىرۋ شەشىلگەن. وسىلايشا ءبىز بىلەتىن مەملەكەتتىك رامىزدەر 1992 جىلعى 4 ماۋسىمدا قابىلداندى. بۇل كۇندى ءبىز جىلدا ەرەكشە ىقىلاسپەن اتاپ وتەمىز. تۋدىڭ اۆتورى شاكەن نيازبەكوۆ ۇزدىك يدەياسى ءۇشىن مەملەكەتتەن باعالى سىيلىق – ءتۇرلى-ءتۇستى تەلەديدار العان كورىنەدى.
ال ەلتاڭبامىزدىڭ نەگىزىندە 1991 جىلى قازاقستان تاۋەلسىزدىك الماي تۇرىپ, جەرلەسىمىز توقتار اۋباكىروۆ عارىشقا ساپارىندا تاعىپ ۇشقان توسبەلگى جاتىر ەكەن. ەلتاڭبا وتىز جىل ىشىندە ءۇش رەت وزگەرتىلدى. دەگەنمەن ونىڭ اۆتورلارى جانداربەك مالىبەكوۆ پەن شوت-امان ءۋاليحانوۆ بولىپ قالا بەردى.
قازاقستاننىڭ ءانۇرانىنا كەلەر بولساق, ول وسىدان ون بەس جىل بۇرىن, ياعني 2006 جىلى 7 قاڭتاردا قابىلداندى. 1992 جىلى تاڭدالعان تۇڭعىش ءانۇران حالىقتىڭ اراسىندا كەڭ تاراي قويماعان. سول سەبەپتى ونى اۋىستىرۋعا شەشىم قابىلداعان. سونىمەن 1956 جىلى جازىلعان «مەنىڭ قازاقستانىم» اتتى رۋحتى ءان رەسمي تۇردە قازاقستاننىڭ ءانۇرانىنا اينالدى. قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ءماتىنىن زامانعا ساي بەيىمدەپ, تۇزەتۋلەر ەنگىزدى. وسىلايشا, بۇرىننان حالىق جۇرەگىنەن ورىن العان ءشامشى قالداياقوۆتىڭ ءانى ءار قازاقستاندىقتىڭ بالاباقشادان باستاپ ۇيرەنىپ, حالىقارالىق ارەنادا دا شىرقايتىن باستى انىنە اينالدى.
جوبادا ايتىلعانداي, راسىندا ەلىمىزدىڭ ءار ازاماتى ءوز تۋىن جانىنداي جاقسى كورەدى. قانداي ءبىر ءىس-شاراعا, سپورتتىق جارىسقا قاتىسسا دا كۇن استىندا قىران قالىقتاعان كوك اسپان تۇستەس بايراعىمىزدى بيىككە كوتەرەدى. قازاقستان تۋى حالىقتىڭ قۋانىشتا دا, سىن ساعاتتا دا حالقىمىزدىڭ ءبىرتۇتاس ەكەنىن كورسەتەتىن سيمۆولعا اينالدى. تاريحتاعى ەڭ ماڭىزدى ساتتەردە تۋىمىز قولدان تۇسكەن ەمەس. ال ەلتاڭبا مەن ءانۇران جاڭارعان كوپەتنوستى قازاقستاندى وتىز جىلدا ءبىر اتانىڭ بالاسىنداي بىرىكتىرگەن سيمۆولعا اينالدى دەسەك, ارتىق بولماس. ەلىمىزدىڭ ءتول رامىزدەرى – ءبىزدىڭ تاريحىمىز. ال ونى جاقسى ءبىلۋ – ءار ازاماتتىڭ پارىزى.
راسىندا, تاريح قويناۋىنا كەتكەن كەيبىر وقيعالاردى قايتا جانداندىرىپ, وسكەلەڭ ۇرپاقتىڭ ەسىنە سالىپ وتىرۋ ماڭىزدى. سەبەبى وتان تاريحى – ءار ازاماتتى سول ەلمەن, ونىڭ قۇندىلىقتارىمەن, مادەني بايلىعىمەن بايلانىستىراتىن باستى قۇرال. وسىنداي قىسقا دا تارتىمدى ءارى زاماناۋي فورمات ساپالى اقپاراتقا قۇمار جاستاردىڭ تالعامىنان شىعاتىنى انىق.