قىزىلوردادا تەرگەۋ يزولياتورىنا كەلگەن سالەمدەمە اراسىنان تەلەفون شىقتى, دەپ جازادى Egemen.kz.
قىزىلوردا وبلىسى بويىنشا قاج دەپارتامەنتىنىڭ زك-169/1 مەكەمەسىندە سالەم-ساۋقاتتاردى قابىلداۋ بولمەسىندەگى باقىلاۋشى قىزمەتكەرلەر تاعى دا تىيىم سالىنعان زاتتى تاۋىپ, تاركىلەدى. مەكەمە قاماۋىنداعى سوتتى بولعان ازاماتقا سالەمدەمە الىپ كەلگەن ايەل «IRBIS» ماركالى تەلەفوندى, ونىڭ قۋاتتاعىش قۇرىلعىسىن جانە Sim-كارتانى پوليتەلين پاكەتكە وراپ, پالاۋ مەن سالات ىشىنە جاسىرىپ وتكىزبەك بولعان. الايدا, تاعامعا جاسىرىلعان «توسىن سىيدى» باقىلاۋشى قىزمەتكەرلەر بىردەن اڭعارىپ, تاركىلەپ, ىشكە ءوتىپ كەتپەۋدىڭ الدىن الدى.
قاماۋداعى سوتتالعان «ۇرلىق» بابىمەن 5 جىل 6 ايعا باس بوستاندىعىنان ايىرىلعان.
قازىر اتالعان فاكتى بويىنشا قر اقبتك-ءنىڭ 481 بابىنا سايكەس ءىس-قۇجاتتارى پروتسەسسۋالدىق شەشىم قابىلداۋ ءۇشىن قىزىلوردا قالالىق اكىمشىلىك سوتىنا جولداندى.