توكيونىڭ تورىندەگى رينگتە ەكى قازاق ءبىر-بىرىمەن كەزدەسۋى مۇمكىن ەدى. ەگەر دە 75 كيلو سالماقتا قىتايدىڭ اتىنان شىققان توقتاربەك تاڭاتقان برازيليالىق بوكسشى ەبەرت كونسەيسان سوۋزادان باسىم تۇسكەندە. قازاق بالاسىنىڭ ءبىر-بىرىنە جۇدىرىق جۇمساۋىن جاراتۋشىمىز قۇپ كورمەگەن ەكەن. توقتاربەك الەم چەمپيوناتىنىڭ قولا جۇلدەگەرىنەن 2:3 ەسەبىمەن جەڭىلىپ قالدى. جەكپە-جەكتەن كەيىن قانداسىمىزدى سوزگە تارتقان بولاتىنبىز.
– توقتاربەك, بۇگىنگى جەڭىلىسىڭدى نەمەن تۇسىندىرەسىڭ؟
– نەگىزى, ءبىرىنشى راۋندتا اقىرىن ءجۇرىپ, قارىمتا سوققىلارمەن شابۋىلدايمىن دەپ جوسپارلاعانمىن جانە سولاي جاسادىم دا. الايدا ءبىرىنشى راۋندتا 0:5 ەسەبىمەن جەڭىلەمىن دەپ ويلاعان جوقپىن. ەكىنشى-ءۇشىنشى راۋندتا ءوزىم شابۋىلعا شىعىپ, ءبىراز سوققى جاسادىم. بىراق بارلىعى مەن ويلاعانداي بولا قويعان جوق. قورىتىندى ەسەپكە كوڭىلىم تولماي تۇر.
– تورەشىلەر شەشىمى ەكىگە جارىلدى. ەكى تورەشى 29:28 ەسەبىن تىركەپ, سەنىڭ پايداڭا شەشسە, ءۇش تورەشى برازيليالىققا 29:28 بەرگەن ەكەن.
– اركىمنىڭ ءوز پىكىرى, ءوز كوزقاراسى بار. سولاي بولۋ كەرەك بولعان عوي. ونىڭ ۇستىنە مەنىڭ حالىقارالىق جارىسقا شىقپاعانىما كوپ بولدى. بۇگىن ويداعىداي بوكستاسپاعانىما سول دا اسەر ەتكەن شىعار.
– ەندى سەنىڭ قارسىلاسىڭ تاعى ءبىر قازاقپەن شيرەك فينالدا كەزدەسەتىن بولدى...
– ءابىلحاندى مەن جاقسى تانيمىن. تاجىريبەلى بوكسشىلاردىڭ ءبىرى. وعان ساتتىلىك جولداس بولىپ, وليمپيادادا چەمپيون اتانسىن دەگىم كەلەدى.
– قازاقستان بوكسشىلارىنىڭ قايسىسى التىن الادى دەپ ويلايسىڭ؟
– نەگىزى مەن بەكزات نۇرداۋلەتوۆتى چەمپيون بولادى دەپ ويلاعانمىن. وكىنىشكە قاراي, بەكزات باۋىرىم جەڭىلىپ قالدى. ەندى قالعان بوكسشىلاردان ءۇمىت كۇتەمىن. بارلىعى جەڭىسكە جەتسىن.
– قازاقستاندا بولدىڭ با؟ ءبىزدىڭ بوكسشىلاردان كىمدەردى تانيسىڭ؟
– قازاقستاندا بۇرىن بولعانمىن, كوپ بوكسشىنى تانيمىن.