سىرتقى ىستەر مينيسترلىگى «پۋسان قالاسىندا (كورەيا رەسپۋبليكاسى) قازاقستان رەسپۋبليكاسىنىڭ باس كونسۋلدىعىن اشۋ تۋرالى» قر پرەزيدەنتى جارلىعىنىڭ جوباسىن دايىندادى, دەپ حابارلايدى Egemen.kz.
قۇجاتتا «پۋسان قالاسىندا (كورەيا رەسپۋبليكاسى) قازاقستان رەسپۋبليكاسىنىڭ باس كونسۋلدىعىنىڭ اشىلۋى, ءبىرىنشى كەزەكتە, قازاقستان رەسپۋبليكاسىنىڭ كونسۋلدىق قىزمەتىنىڭ وسى سالاداعى قىزمەتىن كۇشەيتەدى, سونىمەن قاتار ساۋدا-ەكونوميكالىق جانە ينۆەستيتسيالىق ىنتىماقتاستىق (قازاقستاندىق ەكسپورتتى جىلجىتۋ, ينۆەستيتسيالاردى تارتۋ جانە بىرلەسكەن كاسىپورىندار قۇرۋ) سالاسىنداعى جۇمىستاردى جۇيەلى تۇردە قۇرۋعا مۇمكىندىك بەرەدى», دەپ جازىلعان.
كونسۋلدىق مەكەمەنى اشۋعا بايلانىستى ءىس-شارالار «سىرتقى ساياسي قىزمەتتى ۇيلەستىرۋ جونىندەگى قىزمەتتەر» بيۋدجەتتىك باعدارلاماسى بويىنشا قازاقستان رەسپۋبليكاسى سىرتقى ىستەر مينيسترلىگىنە بولىنگەن اقشا قاراجاتى شەگىندە جۇزەگە اسىرىلاتىن بولادى.
جارلىق جوباسى «اشىق نقا» ۆەب-سايتىندا 12 تامىزعا دەيىن قوعامدىق تالقىلاۋعا ورنالاستىرىلدى.