التىن بەسىك اۋىلداردىڭ ءسانى مەن سالتاناتىن ارتتىرىپ, سۇتتەي ۇيىتۋعا, كەم-كەتىكتى كەلىستىرىپ, ولقىلىقتىڭ ورنىن تولتىرۋعا باعالى باعدارلامانىڭ باياندى شاراپاتى ءتيىپ تۇر.
ۇستىمىزدەگى جىلى اۋداندا «اۋىل – ەل بەسىگى» باعدارلاماسى بويىنشا ءبىر عانا قۇرىلىس سالاسىندا 35 جوبا جۇزەگە اسىرىلۋدا. جوبا بويىنشا 2821,9 ملن تەڭگە قاراجات بولىنگەن. الەۋمەتتىك-تۇرمىستىق مەكەمەلەردىڭ ينجەنەرلىك ينفراقۇرىلىمدارى جوندەلمەك, ءبىلىم وشاقتارى كۇردەلى جوندەۋدەن وتكىزىلىپ, جاڭاشا كەيىپكە ەنگىزىلمەك. تاراتىپ ايتاتۇعىن بولساق, كوپتەن بەرى قوردالانىپ قالعان ماسەلەلەردىڭ باعدارلاما ارقىلى جۇرگىزىلەتىن جۇمىستىڭ ارقاسىندا شەشىلىپ, كەيبىر كونەرگەن عيماراتتاردىڭ قايتادان ەل يگىلىگىنە جارايتىندىعى داۋ تۋدىرمايدى. ەل ىشىندە كوڭىلگە الاڭ تۋعىزعان ماسەلەلەر از ەمەس ەدى. اسىرەسە, اۋدان ىشىندەگى جول جايى. بيىل كوپ تىلەگى قابىل بولىپ, جاقسى اۋىلىنىڭ اباي, ستەپنايا-1, ستەپنايا-2 كوشەلەرىنە ورتاشا جوندەۋ جۇمىستارى جۇرگىزىلۋدە.
– مەملەكەت تاراپىنان كورسەتىلىپ وتىرعان قامقورلىقتىڭ ارقاسىندا اۋىلىمىزدىڭ بەت-بەينەسى وزگەرىپ, ادەمى بولىپ قالدى, – دەيدى ەل اعاسى ومار قوسشىعۇلوۆ, – قانشا كۇتىپ ۇستاسا دا جولدىڭ توزاتىندىعى بەلگىلى. بيىلعى جىلى بىرنەشە كوشەگە جوندەۋ جۇمىستارى جۇرگىزىلىپ, كوپشىلىككە قولايلى جاعداي تۋعىزىلىپ وتىر. انشەيىندە اۋىلعا ەشكىم كوڭىل بولمەيدى دەگەن پىكىر ايتىلىپ جاتادى. نەگە بولىنبەسىن, جاقسىداعى جاقسى شارۋالاردان قامقورلىقتىڭ قانشالىقتى مول ەكەندىگىن اڭعارۋعا بولادى. قازىر اۋىل تۇرعىندارى قۇرىلىستى, اسىرەسە كۇردەلى جوندەۋ جۇمىستارىنىڭ قارقىندى جۇرگىزىلىپ جاتقاندىعىن كوزدەرىمەن كورىپ وتىر.
ايتسا ايتقانداي, ءبىر عانا زاپوروجە اۋىلىندا ءتورت بىردەي جوبا قولعا الىنىپ, ونىڭ ەكەۋى بويىنشا جۇمىس باستالىپ كەتكەن. سونداي-اق لوزوۆوە سەلوسىندا دا 5 جوبا جۇرگىزىلسە, بەلاعاشتا 5, قيمادا 5 جوبا قولعا الىنعان. تىڭعىلىقتى اتقارىلعان جۇمىستىڭ ارقاسىندا بۇل اۋىلداردىڭ بەينەسى ەش جەردەن كەم بولمايدى.
جاقسى اۋىلىنىڭ وزىندە مامىر ايىنان بەرى اۋداندىق مادەنيەت ءۇيى كۇردەلى جوندەۋدەن وتكىزىلۋدە. جوبا بويىنشا بولىنگەن قاراجاتتىڭ كولەمى 213,9 ميلليون تەڭگەنى قۇرايدى. بۇرىن ءسال توزىپ كەتكەن مادەنيەت ءۇيىنىڭ كىرە بەرىسىنەن باستاپ, ىشكى بولمەلەرى دە جاڭارتىلىپ, زامان تالابىنا ساي ارلەندىرىلىپ, قۇلپىرتىلۋدا. الداعى ۋاقىتتا ويعا العان جۇمىس تۇگەل اياقتالعان كەزدە اۋىلدىڭ ورتالىعىنداعى مادەنيەت ءۇيى تۇرعىنداردىڭ رۋحاني دۇنيەسىنىڭ كەمەلدەنۋىنە كەلىستى ۇلەس قوساتىن ورىنعا اينالماق.
زاپوروجە سەلوسىنداعى ورتا مەكتەپتىڭ تەك قابىرعالارى عانا قالعان, قالعانىنىڭ ءبارىن قۇرىلىسشىلار قوپارىپ الىپ تاستاپتى. 1975 جىلى سالىنعان ەكى قاباتتى عيمارات كوپتەن بەرى قۇرىلىسشىنىڭ قالاعى تيمەگەن سوڭ توزىڭقىراعان جايى بار ەكەن. ەندى جوبا بويىنشا بولىنگەن قاراجاتقا مەكتەپتىڭ ەدەنى, توبەسى, تەرەزەسى, سىرتقى قاپتاۋى, قورشاۋى, ەلەكتر جەلىلەرى ءتۇپ-تۇگەل اۋىستىرىلماق. اۋقىمى اتشاپتىرىم مەكتەپ جانىنداعى الاڭ جاڭادان قورشالىپ, اباتتاندىرىلماق. اۋىل بالالارى مەكتەپ جانىنداعى سپورت زالىندا ءتۇرلى ۇيىرمەلەرگە قاتىسا الادى. قازىردىڭ وزىندە ەڭسەلى, كەڭ سپورت زالدىڭ رەڭى كىرىپ قالعان. قۇرىلىس جۇمىستارىمەن 45 ادام اينالىسۋدا. اۋەلگى كەلىسىم بويىنشا 8 ايدا تۇگەل اياقتاپ شىعۋ كەرەك.
– قۇرىلىسشىلار ۋاقىتپەن ساناسپاي جۇمىس ىستەپ جاتىر, – دەيدى قۇرىلىس بريگاداسىنىڭ بريگاديرى ەلۋباي تولەگەن ۇلى, – جالپى كولەمى ەكى مىڭ شارشى مەتردى قۇرايتىن مەكتەپتى جاڭادان سالىپ شىقتىق دەسە دە بولعانداي. جۇمىسقا جەرگىلىكتى تۇرعىندار دا تارتىلىپ وتىر. ال نەگىزگى ماماندار ءوزىمىزدىڭ بريگادانىڭ شەبەرلەرى.
اۋىلداعى وڭ وقيعا وسىنداي بولعاندا, اۋدان ورتالىعىنداعى قاۋىرت شارۋا كوز سۇيسىندىرەدى. جاقسى اۋىلىنداعى وقۋشىلار ءۇيىن جوندەۋگە قىرۋار قاراجات ءبولىنىپ وتىر. شەبەر قولدى قۇرىلىسشىلار ءوز مىندەتتەرىن تاپ-تۇيناقتاي ەتىپ اتقارۋدا. وسىنداعى №1 جانە №2 ورتا مەكتەپتەرگە كۇردەلى جوندەۋ جۇمىستارى جۇرگىزىلەدى. مۇنىڭ بارلىعى ەل بولاشاعى ءۇشىن جاسالىپ جاتقان ايتۋلى قامقورلىق دەپ ايتساق, جاراسىمدى.
جاقسىنىڭ جاعىمدى جاڭالىعى از ەمەس. ماسەلەن, دەنەشىنىقتىرۋ-ساۋىقتىرۋ كەشەنى قولعا الىنعان. وعان 585,6 ميلليون تەڭگە قاراجات ءبولىنىپ وتىر. شالعايداعى شاعىن اۋىل ءۇشىن اق تۇيەنىڭ قارنى جارىلعان ولجا ىسپەتتى دۇنيە. شاعىن فۋتبول الاڭى دا سالىنباق.
شوق جۇلدىزداي شاعىن اۋىل العا باسقان زامانا قادامىمەن قاتار ادىمداپ, كوركەيىپ كەلەدى. ەل دە ەرتەڭىنە سەنىمدى. ەڭ باستىسى, سول ەمەس پە؟!
اقمولا وبلىسى,
جاقسى اۋدانى