ەلوردالىق جاستار TikTok الەۋمەتتىك جەلىسىنە ۆيدەو ءتۇسىرۋ ءۇشىن كوپىردىڭ ارقاسىنا شىعىپ كەتكەن, دەپ حابارلايدى Egemen.kz قالالىق پوليتسيا دەپارتامەنتى ءباسپاسوز قىزمەتىنە سىلتەمە جاساپ.
«اتالمىش وقيعا 26 شىلدە كۇنى تاڭەرتەڭ 04:30-دا بولعان. پوليتسياعا قابانباي باتىر داڭعىلىندا ورنالاسقان كوپىردىڭ ارقاسىنا بىرەۋلەردىڭ ورمەلەپ بارا جاتقانى تۋرالى كۋاگەرلەردەن حابار كەلىپ تۇسكەن. پوليتسيا قىزمەتكەرلەرى وقيعا ورنىنا جەتكەندە اتالعان فاكتىنىڭ شىنايىلىعىنا كوز جەتكىزىلدى. ءتارتىپ ساقشىلارى 19 جانە 21 جاستاعى ەلوردانىڭ ءۇش تۇرعىنىن ۇستادى. ولار TikTok الەۋمەتتىك جەلىسىنە ەرەكشە ۆيدەو ءتۇسىرۋ ءۇشىن وسىنداي ارەكەتكە بارعانىن ايتتى», دەپ ءتۇسىندىردى ۆەدومستۆونىڭ ءباسپاسوز قىزمەتى.
«سارىارقا» اۋدانىنىڭ پوليتسيا باسقارماسىنىڭ ۋچاسكەلىك ينسپەكتورلارى ءتارتىپ بۇزۋشىلارمەن قوعامدىق ءتارتىپتى ساقتاۋ بويىنشا پروفيلاكتيكالىق اڭگىمە جۇرگىزدى.