ءيزرايلدىڭ بۇرىنعى پرەمەرى اريەل شارون قايتىس بولدى

كەشە, قاڭتاردىڭ 11-ءى كۇنى ءيزرايلدىڭ بۇرىنعى پرەمەرى اريەل شارون قايتىس بولدى. بۇل تۋرالى يتار-تاسس اگەنتتىگىنە سىلتەمە جاساعان Ras.kz حابارلادى.

«ءيزرايلدىڭ ەكس-پرەمەرى اريەل شارون قايتىس بولدى. مۇنى ءباسپاسوز وكىلدەرىنە شاروننىڭ ۇلى گيلاد جەتكىزدى. «ول ءوزى قالاعان ۋاقىتتا كەتتى» دەدى گيلاد شارون», – دەلىنگەن حابارلامادا.

«تەل ا-شومەر» قالپىنا كەلتىرۋ كلينيكاسىنىڭ ديرەكتورى شلومو نوي مالىمدەگەندەي, ءيزرايلدىڭ ەكس-پرەمەرى «بالالارىنىڭ قورشاۋىندا تىپ-تىنىش جاعدايدا» ومىردەن وتكەن. يزرايل تەلەۆيدەنيەسىنىڭ مالىمەتى بويىنشا شاروننىڭ جۇرەگى 13:58 (استانا ۋاقىتىمەن – 18:58) ساعاتتا توقتاعان.

ەكس-پرەمەردىڭ دەنساۋلىق جاعدايى سوڭعى كۇندەرى كۇرت ناشارلاعان. 85 جاستاعى پاتسيەنت تەل-اۆيۆتەگى «تەل ا-شومەر» كلينيكاسىنىڭ «شيۆا» مەديتسينالىق ورتالىعىندا جاتتى.

اريەل شارون سوڭعى 8 جىل بويىنشا ەس-ءتۇسسىز, كوما جاعدايىندا بولدى. يزرايل ۇكىمەتى باسشىسى ورنىندا 2001-2006 جىلدارى بولعان شارون 2005 جىلدىڭ جەلتوقسان ايىندا ميكروينسۋلت الىپ, اۋرۋحاناعا جاتقىزىلدى. بىراق ەكى كۇننەن كەيىن ەمحانادان شىعىپ جۇمىسقا قايتا قوسىلدى. ال ءبىر ايعا جەتپەس ۋاقىتتا – 2006 جىلعى 4 قاڭتاردا كەڭ اۋقىمدى ينسۋلتقا ۇرىنىپ, بىردەن كوماعا ءتۇسىپ كەتتى. سودان بەرى ەس بىلمەيتىن ءولى مەن ءتىرىنىڭ اراسىندا قىبىرسىز جاتتى. ول جاساندى تىنىس الدىرۋ اپپاراتىمەن عانا دەم الدى جانە ءوز بەتىنشە تاماقتانا المادى. جاقىندا بالالارى جاساندى تىنىس الدىرۋ اپپاراتىنان اجىراتۋ جايىن قوزعادى.

مىنە, 8 جىلعى ەس-ءتۇسسىز ءومىردىڭ دە سوڭىنا نۇكتە قويىلدى. كەزىندە پالەستينا مەن اراب ماسەلەلەرىنە كەلگەندە, كوپ كەرى ارەكەتتەر جاساپ, زيان كەلتىرگەن ەكس-پرەمەر عۇمىرىنىڭ سوڭعى ون جىلعا جۋىق ۋاقىتىن وسىلاي قايعىلى جاعدايدى وتكىزىپ, ابىرويسىزداۋ اياقتادى.

ايدار ورىسباەۆ.

دەرەككوز: Ras.kz

فوتو: Gazeta.ru