بۇل كۇندەر ويىن-ساۋىق, توي-دۋمانعا ەرىك بەرەتىن كەزەڭ ەمەس. الايدا بالانىڭ اتى – بالا, قاماپ وتىرا المايسىڭ. ونىڭ ۇستىنە شىعارماشىلىق ۇجىمداردىڭ جۇمىسىن دا ايلار, جىلدار بويى شىدەرلەپ وتىرۋ وڭاي ەمەس. مۇنىڭ دا كەرى جاعى كورىنە باستادى. قىسقاسى, شىعىنعا باتقان كينوتەاترلار, ماۋسىمدىق دەمالىسقا شىققان تەاترلار مەگاپوليستىڭ بۇرىنعى ءماز-مايرام ءومىرىن تولايىم توقىراتىپ تۇرا المايتىنى تاعى بەلگىلى.
سونىمەن قازاق مەملەكەتتىك تسيركىندە بيىلعى 3 شىلدە مەن 15 تامىز ارالىعىندا اتى اڭىزعا اينالعان قازاق بالۋانى قاجىمۇقان مۇڭايتپاسوۆتىڭ 150 جىلدىعىنا ارنالعان HELLO CIRCUS اتتى جاڭا باعدارلاماسىن باستادى.
ايلارعا سوزىلعان كارانتيننەن كەيىن ءبىرىنشى رەت الماتى تسيركى سۇيىكتى كورەرمەندەرىنە ەسىگىن ايقارا اشتى. تسيرك باعدارلاماسىندا قازاق مەملەكەتتىك تسيركىنىڭ قايتالانبايتىن قويىلىمدارى مەن جۇلدىزدارى بار. تسيرك مايتالماندارىمەن كوپتەن قاۋىشپاعان كورەرمەن ءۇشىن دۇنيەجۇزىلىك كاسكادەرلەر اكادەمياسىنىڭ «تاۋرۋس» سىيلىعىنىڭ يەگەرى ج.كۇنعوجينوۆتىڭ جەتەكشىلىگىندەگى اتتىلى اكروباتيكالىق «نوماد» توبى, تانىمال قازاقستاندىق سپورتشى, ارمرەستلينگتەن حالىقارالىق سپورت شەبەرى تيمۋر سپاتاەۆ, مونتە-كارلودا وتكەن IX حالىقارالىق «جاڭا بۋىن» تسيرك ونەرى فەستيۆالىنىڭ كۇمىس جۇلدەگەرى, VI حالىقارالىق «مامونتەنوك» تسيرك فەستيۆالىنىڭ التىن جۇلدەگەرى اناستاسيا دەميدوۆا جانە «ازيا جاڭعىرىعى» حالىقارالىق تسيرك ونەرى فەستيۆالىنىڭ التىن جۇلدەگەرلەرى اننا دەميدوۆا, مارينا ستارودۋبوۆا, دايانا جەتپىسوۆالار, ەڭبەك سىڭىرگەن قايراتكەر قۇرمانعالي دوسباتىروۆتىڭ جەتەكشىلىگىندەگى «بەلدىكتەردەگى اۋە گيمناستارى», VII حالىقارالىق «ازيا جاڭعىرىعى» تسيرك ونەرى فەستيۆالىنىڭ گران-پري يەگەرى تيمۋر قورجىمباەۆتىڭ «ۇيرەتىلگەن يتتەرى», حانچجوۋدا وتكەن حالىقارالىق يلليۋزيالىق ونەر فەستيۆالىنىڭ التىن جۇلدەگەرى ءلاززات بايتوقانوۆا, ادىلەت تيكانوۆتىڭ جاڭا «قوس قىتاي ماچتاسى», راۆيل سەيدگاريەۆتىڭ «دارشىلار» سىندى قويىلىمداردى اتاپ ءوتۋ كەرەك.
تسيرك الدىمەن ەلوردا كۇنىنە وراي قازاق مەملەكەتتىك تسيركى مۇمكىندىگى شەكتەۋلى بالالارعا, بالالار ءۇيىنىڭ تاربيەلەنۋشىلەرىنە, ينتەرناتتار مەن از قامتىلعان وتباسىلاردىڭ بالالارىنا قايىرىمدىلىق قويىلىمىن وتكىزەدى.
ء«بىزدىڭ شىعارماشىلىق ۇجىم كىشكەنتاي كورەرمەندەردى قۋانتۋ ءۇشىن تسيرك ارتيستەرى وفلاين رەجىمدە تالماي جۇمىس ىستەدى. الايدا قازىرگى جاعدايدى كورىپ وتىرسىزدار. سوندىقتان Ashyq قوسىمشاسى ارقىلى 30 پايىزعا دەيىن كورەرمەن قابىلداۋعا رۇقسات بەرىلىپ وتىر. ەڭ باستىسى – حالىقتىڭ دەنساۋلىعى, سوندىقتان دا بارلىق كارانتيندىك ساقتىق شارالارىن ساقتاي وتىرىپ, ءجۇمىسىمىزدى جالعاستىرامىز. كورەرمەندەردىڭ الاڭسىز دەمالىپ قايتۋى ءۇشىن ورىندىقتار اراسىنداعى اراقاشىقتىقتار, بەتپەردە كيۋ رەجىمى ساقتالىنعان. وكىنىشكە قاراي, بۇرىنعىداي زالدى كورەرمەنگە تولتىرا المايتىندىقتان, بۇرىن ءبىر ايدا 10 قويىلىم كورسەتسەك بۇل جولى كورەرمەندەر كورىپ ۇلگەرسىن دەگەن جوسپارمەن باعدارلاما ۋاقىتى ءبىر جارىم ايعا سوزىلىپ, 16 قويىلىم كورسەتىلەدى», دەيدى قازاق مەملەكەتتىك تسيركىنىڭ ديرەكتورى باقىت بوكەباەۆ.
الماتى