بيىل «قازسات-3» جەر سەرىگى ۇشىرىلادى. بۇل تۋرالى «24 kz» حابارلادى.
بايقوڭىر عارىش ايلاعىنان عارىش اپپاراتتارىن ۇشىرۋ تۋرالى قۇجاتتى ۇكىمەت بەكىتتى. قازاقستان مەن رەسەي ۇكىمەتتەرىنىڭ اراسىندا ارنايى كەلىسىم بار. سول بويىنشا بايقوڭىردان عارىش اپپاراتتارىن ۇشىرۋ ءتارتىبى بەكىتىلگەن. سوعان سايكەس, «قازسات-3» بايلانىس جانە تاراتۋ سەرىگىن ۇشىرۋ وسى جىلدىڭ 30 ساۋىرىنەن كەشىكتىرىلمەۋى كەرەك.
بىزگە حابارلاسقان وقىرماندار بايقوڭىر عارىش ايلاعىنداعى قازىرگى اتقارىلىپ جاتقان جۇمىستار جونىندە بىلگىسى كەلەتىنىن ايتتى. وسى ورايدا ۇلتتىق عارىش اگەنتتىگىنىڭ رەسمي ينتەرنەت-رەسۋرسىندا جاريالانعان مالىمەتتى نازارلارىڭىزعا ۇسىنامىز.
بۇگىن, بايقوڭىر عارىش ايلاعىندا 2014 جىلدىڭ العاشقى ۇشىرىلىمدارىنا دايىندىق جۇمىسى باستالدى. ول بويىنشا عارىش ايلاعىنىڭ 31-ءشى الاڭقايىنداعى ماي قۇيۋ ستانساسىندا «يۋجنىي» عارىشتىق ورتالىعى ماي قۇيۋ ستانسالارىن پايدالانۋ ورتالىعىنىڭ قىزمەتكەرلەرى «پروگرەسس م-22 م» تاسىمالداۋشى جۇك كەمەسى وتىنى كومپونەنتتەرىنە جابدىقتار مەن اپپاراتۋرالاردى ازىرلەۋگە كىرىسىپتى. سونداي-اق, عارىش ايلاعىنىڭ «91 ا» الاڭقايىندا ماي قۇيۋ-بەيتاراپتاندىرۋ ستانساسىندا «بريز-م» بلوگىنا سۇيىقتىق قۇيۋ جۇمىستارى باستالدى, ول «پروتون-م/تۇرىكسات-4ا» باعدارلاماسى بويىنشا ۇشىرىلادى. ال تاياۋ كۇندەرى زىمىران-تاسىعىشتاردى, ۇشىرۋ بلوكتارىن جانە عارىش اپپاراتتارىن ازىرلەۋ باستالادى.
اقپان ايىندا بايقوڭىر عارىش ايلاعىنان «پروگرەسس م-22م» تاسىمالداۋشى جۇك كەمەسىمەن «سويۋز-ۋ» زىمىران-تاسىعىشىن جانە «تۇرىكسات-4ا» تۇرىكتىڭ عارىشتىق بايلانىس عارىش اپپاراتىمەن «پروتون-م» زىمىران-تاسىعىشىن ۇشىرۋ جوسپارلانۋدا.
دانيار تۇيمەباي.
دەرەككوز: «24 kz», ۇلتتىق عارىش اگەنتتىگىنىڭ ينتەرنەت-رەسۋرسى
فوتو: Primeminister.kz.