قازاقستان رەسپۋبليكاسىنىڭ پرەمەر-ءمينيسترى اسقار مامين Eni ەنەرگەتيكا كومپانياسىنىڭ باس اتقارۋشى ديرەكتورى كلاۋديو دەسكالتسيمەن كەزدەسۋ وتكىزدى, دەپ حابارلايدى Egemen.kz قر پرەمەر-ءمينيسترىنىڭ ءباسپاسوز قىزمەتىنە سىلتەمە جاساپ.
Eni كومپانياسى قازاقستاندا 1992 جىلدان بەرى جۇمىس ىستەپ كەلەدى جانە قازاقستان ەكونوميكاسىنا $15 ملرد استام ينۆەستيتسيا سالدى.
تاراپتار قاشاعان جانە قاراشىعاناق كەن ورىندارىندا مۇناي مەن كوندەنسات ءوندىرۋ دەڭگەيىن ارتتىرۋ جانە ونى ساقتاۋ, سونداي-اق قازاقستان رەسپۋبليكاسىنىڭ اۋماعىندا جاڭارتىلاتىن ەنەرگيا كوزدەرى جوبالارىن دامىتۋ ماسەلەلەرىن تالقىلادى.
قر پرەمەر-ءمينيسترى اسقار مامين Eni قازاقستاننىڭ ماڭىزدى ينۆەستيتسيالىق سەرىكتەسى ەكەنىن اتاپ ءوتىپ, كومپانيانىڭ قاراشىعاناق جانە قاشاعان كەن ورىندارىن يگەرۋگە, سونداي-اق يساتاي جانە اباي كەن ورىندارىندا بارلاۋ جۇمىستارىن جۇرگىزۋگە قوسقان ۇلەسىن اتاپ ءوتتى.
Eni كومپانياسى قر-داعى ەنەرگەتيكالىق كوشۋ جانە كومىرتەكسىزدەندىرۋ جوبالارىنا قوماقتى ۇلەس قوسۋدا. وسى باعىت اياسىندا بىرقاتار بىرلەسكەن جوبا جۇزەگە اسىرىلىپ جاتىر. اقتوبە وبلىسىندا قۋاتى 100 مۆت بولاتىن جەل ەلەكتر ستانتسياسىنىڭ قۇرىلىسى بويىنشا جوبا ىسكە اسىرىلۋدا جانە تۇركىستان وبلىسىندا قۋاتى 50 مۆت بولاتىن كۇن ەلەكتر ستانتسياسىنىڭ قۇرىلىسى اياقتالۋدا.
ۇكىمەت باسشىسىنىڭ قاتىسۋىمەن بىرقاتار قۇجاتقا قول قويىلدى.
«قازمۇنايگاز» ۇك» اق مەن Eni كومپانياسى اراسىندا ەلەكتر ەنەرگياسىن ءوندىرۋ جانە ىسكە اسىرۋ ءۇشىن ەنەرگەتيكالىق كوشۋ جوبالارىن ازىرلەۋدەگى ىنتىماقتاستىق تۋرالى جانە قر-دا اۋىل شارۋاشىلىعى جانە سۋتەگى جوبالارىن دامىتۋ تۋرالى مەموراندۋمدارعا قول قويىلدى.
ەكولوگيا, گەولوگيا جانە تابيعي رەسۋرستار مينيسترلىگى, «قازگەولوگيا» اق مەن Eni كومپانياسى اراسىندا قر اۋماعىندا جەر قويناۋىن پايدالانۋ جوبالارىن بىرلەسىپ ىسكە اسىرۋ ماسەلەلەرى بويىنشا ىنتىماقتاستىق تۋرالى مەموراندۋمعا قول قويىلدى.