ۇستىمىزدەگى جىلعى قاڭتاردىڭ 10-نان 11-نە قاراعان ءتۇنى بۇكىلالەمدىك بوكس سەرياسى (WSB) ءۇشىن پولشانىڭ ۆىشكوۆ قالاسىندا جەرگىلىكتى Poland Hussars كومانداسىمەن كەزدەسكەن Astana Arlans كلۋبى 4:1 ەسەبىمەن باسىم ءتۇستى. ءسويتىپ, وسى كەزگە دەيىن 5 كەزدەسۋدەگى جەڭىستەرى سانىن 4-گە جەتكىزدى. بۇل تۋرالى ras.kz حابارلادى.
ماتچ استانا ۋاقىتىمەن 11 قاڭتار كۇنى ساعات 1:30-دا باستالدى. قازاقستان جىگىتتەرىنىڭ جەڭىستى جولىن 49 كيلوداعى ماردان بەرىكباەۆ باستاپ بەردى. ول داۆيد سەباستيان ياگودزينسكيدى 3:0 (49:46, 48:47, 48:74) ەتىپ ءcۇرىندىردى. بۇدان كەيىن شارشى الاڭعا شىققان 56 كيلوداعى مەيىربولات تويىتوۆ (سۋرەتتە) مارەك پەترۋششۋكتى بىرنەشە رەت تالتىرەكتەتىپ تاستادى. سوعان وراي جەڭىسى باسىمىراق بولدى - 3:0 (50:44, 50:44, 50:44). ال 64 كيلوداعى اسحات ءۋاليحانوۆ پولياك داميان كيۆيورانى 3:0 (48:47, 48:47. 48:47) ەتىپ جەڭگەننەن كەيىن جالپى كوماندالىق ەسەپ 3:0-گە جەتىپ, استانالىقتاردىڭ قورىتىندىدا جەڭىسكە جەتكەنى ايعاقتالدى.
«ءبىر ايتا كەتەتىن جايت, 75 كيلوعا دەيىنگى سالماقتا «ارلانداردان» ۋكراين لەگيونەرى سەرگەي دەرەۆيانچەنكو رينگكە شىعۋعا ءتيىستى بولاتىن. بىراق سوڭعى ساتتە ونى ەرىك ءالجانوۆ الماستىردى. مىنە, قازاقستاندىقتار ساپىنان جەڭىلىسكە ۇشىراعان وسى ماڭعىستاۋلىق بوكسشى بولدى. ول توماش يابلونسكيگە قارسى كەسكىلەسكەن ۇرىسىندا قارسىلاسىنا 0:3 (47:48, 47:48. 47:48) ەسەبىمەن ەسە جىبەرىپ قويدى. مۇنىڭ ەسەسىنە, سوڭعى شايقاستىڭ شىرايىن كەلتىرگەن 91 كيلوداعى ۆاسيلي لەۆيت پولياك لۋكاش زيگمۋنتتى تاس-تالقان ەتتى. مۇنى وسى كەزدەسۋدەگى ەڭ جوعارى كورسەتكىشتىڭ ءوزى بايقاتادى. ال ايقاس 3:0 (50:42, 50:40, 50:44) بولىپ اياقتالدى», - دەلىنگەن سايت حابارلاماسىندا.
وسى ماتچتان كەيىن بىردەن 4 قازاقستاندىق بوكسشى ءوز سالماقتارى بويىنشا ءبىرىنشى پوزيتسياعا شىقتى. ولاردىڭ قاتارىندا مەيىربولات تويىتوۆ (56 كگ), اسحات ءۋاليحانوۆ (64 كگ), ۆاسيلي لەۆيت (91 كگ) جانە فيليپ حرگوۆيچ (+91 كگ) بار. ەكىنشى ورىنداعىلار قاتارىن ماردان بەرىكباەۆ (49 كگ) پەن سەرگەي دەرەۆيانچەنكو (75 كگ) تولتىرىپ تۇر. سول سياقت, مەيىرىم نۇرسۋلتانوۆ رەيتينگىدە ءۇشىنشى بولىپ كەلەدى.
«قازىر استانالىقتار «گۋسارلاردى» جەڭگەننەن كەيىن ۆ توبىندا كوش باستادى. الايدا, كۋبالىقتاردىڭ Baku Fires كومانداسىمەن وينايتىن ءبىر كەزدەسۋى بار ەكەنىن دە ەسكە سالا كەتەيىك», - دەلىنگەن حابارلامادا.
دامير قوجامقۇل.
دەرەككوز: ras.kz.
فوتو: كازاحستانسكي بوكس ۆكونتاكتە.