ءىىم ەڭبەك كوشى-قونى مەن بوسقىندار ماسەلەسىن قر ەڭبەك جانە حالىقتى الەۋمەتتىك قورعاۋ مينيسترلىگىنە تاپسىرادى, دەپ حابارلايدى Egemen.kz Polisia.kz سايتىنا سىلتەمە جاساپ.
ەل پرەزيدەنتى قاسىم-جومارت توقاەۆ قازىرگى الەمدە ەڭبەك كوشى-قونى جاھاندىق سيپاتقا يە بولىپ, ەل دامۋىنىڭ ەكونوميكالىق جانە الەۋمەتتىك دەڭگەيىمەن تىكەلەي بايلانىستى ەكەنىن بىرنەشە رەت اتاپ ءوتتى.
وسىعان بايلانىستى ىشكى ىستەر مينيسترلىگىنەن ەڭبەك جانە حالىقتى الەۋمەتتىك قورعاۋ مينيسترلىگىنە كوشى-قون پروتسەستەرىن رەتتەۋگە جانە ەڭبەك كوشى-قونىنا بايلانىستى كوشى-قون سالاسىنداعى فۋنكتسيالاردىڭ ۇشتەن بىرىنەن استامى تاپسىرىلاتىن بولادى.
مەملەكەت باسشىسى «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» جارلىققا 19 شىلدەدە قول قويدى.
2022 جىلدىڭ 1 قاڭتارىنان باستاپ ءىىم ۆەدومستۆوارالىق ۇيلەستىرۋمەن, كوشى-قون پروتسەستەرىن رەتتەۋ جانە مونيتورينگىلەۋ سالاسىنداعى شارالار جۇيەسىن ازىرلەۋمەن, بوسقىن مارتەبەسىن بەرۋمەن, سونداي-اق كوشىپ كەلۋشىلەرگە رۇقساتتار بەرۋمەن اينالىسپايدى. بۇنداي وزگەرىستەر قۇقىق قورعاۋ جۇيەسىن رەفورمالاۋ جانە ىشكى ىستەر ورگاندارىن ولارعا ءتان ەمەس فۋنكتسيالاردان بوساتۋ شەڭبەرىندە ەنگىزىلدى.
كوشى-قون سالاسىنداعى فۋنكتسيالاردى ازاماتتىق ۆەدومستۆوعا بەرۋ كوشى-قون زاڭناماسىنىڭ ساقتالۋىن جانە ازاماتتاردىڭ قۇقىقتارىن قورعاۋدى قامتاماسىز ەتۋگە باعىتتالعان. وسىلايشا, ىشكى ىستەر مينيسترلىگى كوشى-قون سالاسىنداعى مەملەكەتتىك باسقارۋ جۇيەسىن وڭتايلاندىرۋ ءۇشىن ءبىزدىڭ ەل قابىلداعان باعىتتى تولىعىمەن ۇستانادى.
زاڭسىز كوشى-قوننىڭ, زاڭسىز كوشىپ كەلۋشىلەردىڭ رەادميسسياسىنىڭ جولىن كەسۋ, قازاقستان رەسپۋبليكاسىنان كەتۋگە جانە ەلگە كەلۋگە ۆيزالار بەرۋ, سونداي-اق حالىقتى جانە ازاماتتىقتى قۇجاتتاندىرۋ جونىندەگى وكىلەتتىكتەر ءىىم قاراماعىندا قالادى.