ءنابي قايىردى 2007 جىلدىڭ 27 ساۋىرىندە دۇنيەگە كەلگەن. كىشكەنتايىنان سپورتقا جانى جاقىن, اسىرەسە فۋتبول دەسە ىشكەن اسىن جەرگە قوياتىن ءنابي 6 جاسىندا فۋتبول سەكتسياسىنا باردى.
ناقتى ايتقاندا, بالدىرعاندى اتاسى, جازۋشى-جۋرناليست قايىردى نازىرباەۆ استاناداعى №8 بالالار مەن جاسوسپىرىمدەر سپورت مەكتەبىنىڭ فۋتبول سەكتسياسىنا جازدىرعان ەدى. ەرىنبەي, جالىقپاي تالابى تاۋداي نەمەرەسىن جاتتىعۋعا اپارىپ ءجۇردى. ءنابيدىڭ اكەسى ارمان دا بالاسىنىڭ فۋتبولعا دەگەن قۇشتارلىعىن بايقاپ, قاجەتتى قۇرال-جابدىقتاردى, وقۋلىقتاردى اپەرىپ تۇردى.
ءنابي الماتى, شىمكەنت, زەرەندىدەگى فۋتبول تۋرنيرلەرىنە قاتىسىپ, تاجىريبەسىن شىڭداي ءتۇستى. قارسىلاستار قاقپاسىنا بىرنەشە رەت دوپ سوققاندا وتباسى مۇشەلەرى ەرەكشە قۋاندى.
ارمان قىزمەت بابىمەن 2019 جىلى كيەۆ قالاسىنا قونىس اۋداردى. 12 جاستاعى ءنابي قاراپ وتىرسىن با, باستاپقىدا اۋلا كلۋبتارىندا باعىن سىنادى. تاجىريبەسى تولىسقان تالاپتى ءوسپىرىم «دينامو» كومانداسىنا قابىلداندى. مۇندا نەگىزىنەن 16 جاسقا دەيىنگى بالالار دوپ تەبەتىن.
2019 جىلدىڭ جازىندا ارمان قايىردى ۇلىنىڭ وتباسى حورۆاتياعا قونىس اۋداردى. ءنابي ول جاققا بارعان سوڭ جەرگىلىكتى «رنك سپليت» كلۋبىنا قابىلداندى. كلۋب بيىلدىڭ وزىندە Dalmatinko cup تۋرنيرىندە شيرەك فينالعا دەيىن جەتسە, تاعى ءبىر تۋرنيردە ەكىنشى ورىنعا يە بولدى. بۇل جەتىستىكتە قازاقستاندىق جاس فۋتبولشى, بولاشاعىنان ءۇمىت كۇتتىرەتىن ءنابي قايىردىنىڭ دا مول ۇلەسى بار.
فۋتبولدان قازاقستاننىڭ ەسەسى كەتىپ, ەڭسەمىزدىڭ ءتۇسىپ جۇرگەنى كوپشىلىككە بەلگىلى. ءنابي سياقتى تالانتتى جاستاردى وسە كەلە ەل نامىسىن قورعاۋعا شاقىرساق, ۇتارىمىز انىق.
– ءنابيدىڭ ەلىنە دەگەن ىقىلاسى ەرەكشە. ونىڭ ارمانى قازاقستاننىڭ فۋتبولىن الەمدىك دارەجەگە جەتكىزۋگە ۇلەس قوسۋ, – دەيدى بىزبەن اڭگىمەسىندە قايىردى نازىرباەۆ.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
وسكەمەن