قاشىقتان ۇرلانعان قاراجات. اتىراۋداعى ەمحانادان 70 ملن تەڭگەنى جىمقىرعاندار سوتتالدى

باسىنان باستاپ بايانداساق, ەل-جۇرتتىڭ كوروناۆيرۋس پاندە­مياسىنىڭ قاۋپىنەن شايلىعىپ, كەيبىرى تۋىستارىنان ايىرىلىپ جاتقان بىلتىرعى قازاندا ەمحانانىڭ ەسەپشوتىنان 70 ملن تەڭگەنىڭ ۇرلانعانى بەلگىلى بولدى. سول كەزدە وبلىستىق دەنساۋلىق ساقتاۋ باسقارماسى باسشىسى­نىڭ مىندەتىن اتقارۋشى بولىپ تا­عايىندالعان اسحان بايدۋاليەۆ ەمحانانىڭ ەسەپشوتىنداعى 70 ملن تەڭگەنىڭ ەلەكتروندى تۇردە ۇرلانعانىن ايتقان ەدى.

«باقساق باقا ەكەن» دەمەكشى, 2019 جىلعى 25 جەلتوقساندا د.ت. دەگەن ازامات كاسىپكەرلىك قىز­مەتپەن اينالىسۋ ءۇشىن الماتى وبلىسىنىڭ تالدىقورعان قالا­سىندا «Lab service plus 1» جاۋاپ­كەرشىلىگى شەكتەۋلى سەرىكتەستىگىن تىركەتىپتى. سودان كەيىن ا.ا. ەسىمدى ازاماتپەن جانە سوتقا دەيىنگى تەرگەپ-تەكسەرۋ كەزىندە انىقتالماعان بەلگىسىز تۇلعالارمەن الدىن الا ءسوز بايلاسادى. ءسويتىپ بىلتىرعى 13 شىلدەدە الماتى قالاسىنداعى بانكتەن شوت اشىپ, بانكوماتتىق كارتوچكا مەن ونلاين بانكينگ كىلتىن العان.

سول جىلعى 3 تامىزدا بەلگى­سىز تۇلعالار ساعات 16:00-17:00 ارا­لىعىندا اتىراۋداعى №1 قالالىق ەمحانانىڭ قارجى-شا­رۋا­شىلىق قىزمەتىنىڭ اقپاراتىنا زاڭسىز قول جەتكىزەدى. ەمحانانىڭ قارجىلىق ەسەپ-قيسابىن اۋدارىپ-توڭكەرىپ قانا قويماي, بۋحگالتەريانىڭ قاشىقتىقتان اقپاراتتىق قول جەت­كىزۋ جۇيەسىنە رۇقساتسىز كى­رەدى. وسىلايشا, ەمحانا ءۇشىن جال­عان تولەمدەر جاساپ, №1 اتى­راۋ قالالىق ەمحاناسىنىڭ ەسەپ­شوتىنان «Lab service plus 1» جشس-ءنىڭ ەسەپشوتىنا جانە د.ت.-نىڭ جەكە شوتىنا كوروناۆيرۋس ىندەتىنە قارسى كۇرەسكە بولىن­گەن قاراجات ەسەبىنەن 70 ملن تەڭگە­نى اۋدارعان. ال ا.ا. ءوڭى تۇگىل, ءۇش ۇيىقتاسا تۇسىنە كىرمەگەن قو­ماقتى قارجىنى قولما-قول شەشىپ الىپ, ەمحاناعا م ۇلىكتىك زور زيان كەلتىرگەن.

جاقىندا وسى قىلمىستىق ءىس قارالىپ, اتىراۋ قالاسىنىڭ №2 سوتىنىڭ ۇكىمىمەن د.ت. مەن ا.ا. قىلمىستىق كودەكستىڭ 188-بابىنىڭ 4-بولىگى, 3) تارما­عى­مەن (ۇرلىق, ياعني الدىن الا ادام­دار توبىمەن ءسوز بايلاسۋ ار­قىلى, اسا ءىرى مولشەردە, اقپا­رات­تىق جۇيەگە زاڭسىز كىرۋ جولى­مەن, بوتەننىڭ مۇلكىن جاسىرىن جىمقىرۋ) كىنالى دەپ تانىلدى. الايدا سوت جازانى جەڭىلدەتەتىن ءمان-جايلار رەتىندە ا.ا.-نىڭ بۇ­رىن سوتتالماعانىن, اسىراۋىندا ءتورت جاس بالاسىنىڭ بارىن, ايىبىن مويىنداپ, شىن نيەتپەن وكىنگەنىن, قىلمىستىق قۇقىق بۇزۋشىلىقتى اشكەرە­لەۋ­گە بەلسەندى تۇردە ىقپال ەتىپ, قىل­مىسپەن كەلتىرىلگەن م ۇلىكتىك زيان­دى ءىشىنارا وتەگەنىن ەسكەردى. سون­داي-اق د.ت.-نىڭ دا بۇرىن سوتتالماعانى, اسىراۋىندا جاس بالاسىنىڭ بارى قاپەرگە الىندى.

سوت قىلمىستىق قۇقىق بۇزۋ­­شىلىقتىڭ سيپاتى مەن قو­عام­عا قاۋىپتىلىك دارەجەسىن ەسكە­رىپ, قىلمىستىق كودەكستىڭ 55-بابى­نىڭ 2-بولىگىمەن د.ت-عا 6 جىل 6 اي, ال ا.ا-عا 5 جىل مەرزىمگە باس بوستاندىعىنان ايىرۋ جازاسىن تاعايىندادى.

اتىراۋ وبلىسى