توي دا, ناۋقاس تا ازايار ەمەس

«كوپشىلىك ءىس-شارالاردى, سونداي-اق وتباسىلىق, ەستەلىك ءىس-شارالاردى, ونىڭ ىشىندە ۇيدە جانە جاپپاي ادامدار جينالاتىن وزگە دە ءىس-شارالاردى وتكىزۋ, ويىن-ساۋىق وبەكتىلەرىنىڭ, بانكەت زالدارىنىڭ, جابىق ءۇي-جايداعى, قوعامدىق تاماقتانۋ وبەكتىلەرىندەگى بالالار ويىن-ساۋىق ورتالىقتارى مەن اتتراكتسيونداردىڭ, ويىن الاڭدارىنىڭ (اۋلاداعىلاردى قوسپاعاندا), كاليان, بۋكمەكەرلىك كەڭسەلەردىڭ, ويىن كلۋب­تارىنىڭ, تۇنگى كلۋبتاردىڭ, مەرەكەلەردى ۇيىمداستىرۋ قىزمەتى توقتاتىلسىن», دەلىنگەن قاۋلىدا.

سونداي-اق كورەرمەندەرى بار سپورت­تىق ءىس-شارالاردى وتكىزۋگە, اشىق اۋا­داعى اتتراكتسيونداردىڭ (دەمالىس سايا­­­باقتارىندا, الاڭداردا), باسسەين­دەرى بار اكۆاپاركتەردىڭ جۇمىسىنا, الاڭ­دارداعى, ساياباقتارداعى, سكۆەرلەر­دەگى, جاعا­لاۋداعى بالالاردىڭ, ەرەسەك­تەر­­دىڭ جىلجىمالى ويىن قۇرالدارىنىڭ ۇساق بولشەك ساۋداسىنا, جالعا بەرۋگە, قالاارالىق, وبلىسارالىق, قالالىق جۇيەلى جانە جۇيەلى ەمەس اۆتوبۋس جانە شاعىن اۆتوبۋس تاسىمالىنا, جينا­لىس­تار, كەڭەستەر, سەمينارلار, كون­فەرەن­تسيا­­لاردى وفلاين رەجىمدە وتكى­زۋگە تى­يىم سالىندى.

وسىنداي كۇشەيتىلگەن شەكتەۋ شارالارى ەنگىزىلگەنىنە قاراماستان, 20 شىلدەدە 348 ادام قاۋىپتى ۆيرۋسقا شال­دىققانى انىقتالدى. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى ۇسىنعان مالىمەتىنە قارا­عاندا, سوڭعى تاۋلىكتە اتىراۋ قالا­سىندا 212 ناۋقاس تىركەلدى. تەڭىز كەن ورنىندا 34 جۇمىسشى ىندەت جۇق­تىردى. جىلىوي اۋدانىندا – 43, قۇرمانعازىدا – 14, يساتايدا – 13, يندەردە – 11, ماقاتتا – 10, ماحامبەتتە – 10, قىزىلقوعا اۋدانىندا ءبىر ادامنان كورو­ناۆيرۋس ينفەكتسياسىنىڭ بەلگىسى تابىلىپ وتىر.

«وڭىردەگى ينفەكتسيالىق ستاتسيونارلاردا 1 105 ناۋقاس ەم قابىلداپ جاتىر. ونىڭ ىشىندە اۋداندارداعى ستاتسيونارلاردا – 271, №2 وبلىستىق اۋرۋحانادا – 203, مودۋلدىك اۋرۋحانادا – 188, تەمىر جول اۋرۋحاناسىندا – 107, كارديولوگيالىق ورتالىقتا – 101, فتيزيو­پۋلمانولوگيا ورتالىعىندا 96 ناۋقاس بار. جىلىوي اۋدانىندا ورنالاسقان تەڭىز كەن ورنىنداعى ين­فەكتسيالىق ستاتسيوناردا 139 پاتسيەنت,­ ءوز ۇيىندە ەمدەلۋ ءۇشىن 2 399 ادام وقشاۋلاندى. ينفەكتسيالىق ستاتسيو­نار­لاردىڭ 113 ورىندىق جان­ساق­تاۋ بولىمدەرىندە جاتقان 65 ناۋقاستىڭ جاعدايى اۋىر ەكەنى بەلگىلى بولىپ وتىر. ناۋقاستاردىڭ ون ءبىرى وكپەنى جاساندى جەلدەتۋ اپپاراتىنا قوسىلعان. قازىر مۇنداعى جۇكتەمە 57,5%-دى قۇرادى», دەپ مالىمدەدى باسقارمانىڭ ءباسپاسوز قىزمەتىنەن.

اتىراۋداعى №2 وبلىستىق ينفەك­تسيالىق اۋرۋحانانىڭ ديرەكتورى ماع­جان سيدجانوۆتىڭ ايتۋىنشا, جۇكتى انالار قاۋىپتى ۆيرۋستى كوپ جۇقتىرعان. ماسەلەن, 20 شىلدەدە مودۋلدىك اۋرۋحا­نانىڭ ينفەكتسيالىق ستاتسيونارىندا كوروناۆيرۋس ينفەكتسياسىمەن جاتقان ناۋقاستار اراسىندا 87 جۇكتى, بوسانعان 10 ايەل مەن جاڭا تۋعان 7 نارەستە بولعان.

– بيىلعى ناۋرىزدان بەرى مودۋلدىك اۋرۋحانادا 88 ءسابي دۇنيەگە كەلدى. سابيلەردەن كوروناۆيرۋس ينفەكتسياسىنا قارسى الىنعان پتر-تەست تەرىس ناتيجە كورسەتتى. الايدا جۇكتى ايەلدەردە قاۋىپ­تى ۆيرۋستى جۇقتىرۋ قاۋپى جوعارى ەكەنى باي­قالىپ وتىر. سوندىقتان ومىرگە ءسابي اكەلۋدى جوسپارلاعان نەمەسە جۇكتى ايەل­دەرگە قاۋىپتى ينفەكتسيادان بارىنشا قورعانۋعا شاقىرامىن, – دەيدى م.سيدجانوۆ.

وبلىستىق دەنساۋلىق ساقتاۋ باس­قارماسى ءباسپاسوز قىزمەتىنىڭ اقپا­راتىنا قاراعاندا, مودۋلدىك اۋرۋحانادا جاتقان ەمدەلۋشى ءوزىن كۇشتەپ ۇستاپ وتىرعانى تۋرالى ۆيدەو جاريالاعان. ءتىپتى ەمدەلۋشىنىڭ اناسى اۋرۋحانا ىشىنە باسا-كوكتەپ كىرىپ, دارىگەرلەردىڭ جۇمىسىنا كەدەرگى كەلتىرگەن. ءسويتىپ وزگە ەمدەلۋشىلەردىڭ مازاسىن الىپ, شۋ شىعارعان.

«ەمدەلۋشىنىڭ اناسى اۋرۋحانا دارى­گەرلەرىنىڭ ەمدىك شارالارى كورسەتىلىپ جاتقانى تۋرالى ايتقانىنا قۇلاق اسپادى. سونداي-اق ەمدەلۋشىنىڭ ءوزى باس مەملەكەتتىك سانيتارلىق دارىگەرىنىڭ بۇيرىعىن بۇزىپ, اۋرۋحانانىڭ ءىشىن ۆيدەوعا تۇسىرگەن. وسىعان بايلانىستى №2 وبلىستىق اۋرۋحانانىڭ اكىمشىلىگى جال­عان اقپارات تاراتىپ, ونى جاريا ەتكەنى ءۇشىن ءىستى سوتقا بەرۋگە دايىن», دەپ ءمالىم ەتتى اۋرۋحانانىڭ اكىمشىلىگى.

اتالعان اۋرۋحاناعا تۇسكەندە ەمدەلۋ­شىدە كوروناۆيرۋس ينفەكتسياسىنىڭ بەل­گىسى انىقتالعان. سونداي-اق ەكىجاقتى پنەۆمونيا دياگنوزى قويىلعان ەكەن.

«اناسى مەن كۇيەۋى ەكىجاقتى زاڭدى كۋاگەرلەردىڭ قاتىسۋىمەن قولحات جازىپ, ەمدەلۋشى ۇيىنە جىبەرىلدى. ەندى ماحام­بەت اۋدانى تۇرعىنىنىڭ دەنساۋلىعى ۋچاس­كەلىك دارىگەرلەردىڭ باقىلاۋىندا بولادى», دەپ حابارلادى اۋرۋحانا اكىم­شىلىگى.

ال وبلىستىق پوليتسيا دەپارتامەن­تىنىڭ باستىعى قامزا ۇمبەتقاليەۆتىڭ مالىمەتىنشە, كارانتيندىك شەكتەۋدىڭ كۇشەيتىلۋىنە بايلانىستى مونيتو­رينگتىك توپتاردىڭ جۇمىسى شيراتىلدى. توپ مۇشەلەرى قالادا ءبىر كۇندە كارانتيندىك شەكتەۋ تالاپتارىن بۇزعان 9 كاسىپكەرلىك نىساندى انىقتادى. مونيتورينگتىك توپ 17 شىلدەدە بەيبارىس كوشەسىندە ورنا­لاسقان Continental Gold مەيرامحاناسىندا ءوتىپ جاتقان تويدىڭ ۇستىنەن ءتۇستى. بۇل مەيرامحاناداعى تويعا 50-دەن اسا ادام قاتىسقان.

سونداي-اق سول كۇنى اتىراۋ شاعىن اۋدانىنداعى «اكۆاراي» اكۆاپاركى كارانتين تالاپتارىن بۇزىپ, جۇمىس ىستەگەن. Zheka’s doner house كافەسى ءتۇن ورتاسىندا كەلۋشىلەردى قابىلداعان. الايدا بۇل نىساننىڭ يەسى تۇسىنىك بەرۋدەن باس تارتقان.

مىنە, «قىزىل ايماقتاعى» اتىراۋ­دىڭ بۇگىنگى احۋالى وسىلاي قۇبىلىپ تۇر. دەمەك, جۇرت جاقىنىنا جاناشىر بولۋ­دى ءالى تۇسىنبەگەن سەكىلدى.

اتىراۋ وبلىسى